Esta 1
1
Mfalumi Ahasuero kankumuwinga malikiya Vashiti
1Ali ndo lyalilawiriti shaka sha ukolamlima wa mfalumi Ahasuero, mweni kakolitimlima mikowa miya ishilini na saba, kwanjira India mpaka Isiopia. 2Kayikolitimlima mikowa ayi agawu mweni pakawera kalikala kumji gwa Susa.
3Mshinja sha tatu sha ukolamlima wakuyi, Mfalumi Ahasuero kawatenderiti msambu walonguziya na wantumintumi wakuyi na wakulu wa mashonta wa Perisia na Mediya na wana wa wafalumi na wakulu wa miji. 4Kwa shaka sha miyezi sita, mfalumi Ahasuero kalanguziya uvuwa wa ulunda wa ufalumi wakuyi na ukwisa wa ukolamlima wakuyi.
5Mashaka aga pagaperiti, Mfalumi kawatenderiti msambu wantu woseri wa mji gwa Susa, wakulu kwa wadidini. Msambu agu guweriti gwa mashaka saba, gutendikiti kuligeleri lya shiwunga sha liboma lya mfalumi. 6Pahala panu paweriti paherepeziwa kwa mapaziya mafufu na ga langi ya buluwu. Mapaziya aga ga pamba gaweriti gatawalirwa kwa ngoyi nfufu na zambalawu na kukowekwa mumpanda za mabuhi yagalembitwi malumalu. Na viti vya zahabu viweriti vitulwa musakafu yayinyawitwi kwa mabuhi ga rangi na mabuhi ga malumalu na mabuhi mafufu na mabuhi gamonga. 7Wantu walanditi divayi yayitulitwi muvikombi vya zahabu vya ntambu yingiyingi, yomberi kaweritindiri kawapananiti divayi ya shifalumi. 8Kila muntu kalanditi na kutosiya, toziya mfalumi kawalagaliriti wantumintumi wa numba ya shifalumi, wampanani kila muntu shakaweziti kulanda.
9Shaka shiraa ashi, malikiya Vashiti kawatenderiti msambu wadala yawaweriti mliboma lya mfalumi Ahasuero.
10Mulishaka lya saba lya msambu agu, mfalumi Ahasuero, pakawera na nemeru nentu kwa kulanda divayi, kawashemiti matowashi saba yawamtendiriti yomberi gweka yakuyi, Mehumani na Bizata na Haribona na Bigita na Abagita na Zetari na Karikasi. 11Kawalagaliriti wantumintumi awa wamjegi malikiya Vashiti mdala gwakuyi, pakawera kavala lijenjeri lyakuyi lya shimalikiya. Malikiya ayu kaweriti na sheni sha kuherepiziya nentu, hangu mfalumi kafiliti kuwalanguziya wahenga wakuyi na walonguziya uherepa wa malikiya ayu. 12Kumbiti wantumintumi awa pawamgambiriti malikiya shilii shawalagaliritwi na mfalumi, malikiya Vashiti kalemiti kugenda. Shitwatira ashi shimkalaziyiti nentu mfalumi.
13Iweriti shitiba sha mfalumi kupata ugambiziwu kulawa kwa wanaluhala, hangu kawashemiti wantu wa lagiru na wamahakimu su wamgambiziyi shakutenda. 14Wagambiziya wakuyi wapakwegera waweriti Karishena na Shetari na Adimata na Tarishishi na Maresi na Marisena na Memukani, awa waweriti walonguziya saba wa Perisia na Mediya yawaweriti wakulu muukolamlima wakuyi. 15Kawakosiyiti hangu, lagiru lilonga hashi, katenderwi shishi malikiya Vashiti? “Toziya niwalagaliriti wantumintumi waneni kwakuyi, kumbiti yomberi kalemiti lagalira ya neni, neni mfalumi Ahasuero?”
16Shakapanu Memukani kankula kulongolu kwa mfalumi na wakulu, “Malikiya Vashiti kankoseya nentu, kamkoseya ndiri mfalumi gweka yakuyi kumbiti viraavirii kawakoseya wakulu woseri na wantu woseri yawawera muisi ya mfalumi Ahasuero! 17Mlandu agu gwakatenditi malikiya Vashiti pagumanika kwa wadala woseri na womberi hawawabeziyi wapalu wawu. Shakapanu hawalongi, mfalumi Ahasuero kalagaliriti malikiya Vashiti kajegwi kulongolu kwakuyi, kumbiti yomberi kalemiti. 18Leru ayi, wadala wa wakulu wa Perisia na Mediya weni yawapikiniriti gakatenditi malikiya Vashiti, hawalongi hangu kwa wakulu woseri, hangu su hawatubeziyi na twenga hatuwawoneri maya. 19Vinu gwenga mfalumi, paguwona ndo iherepa, gulagaliri Vashiti nakiza kayi palongolu paku, lagiru ayi ilembwi mulagiru za Perisia na Media, su nayigalambulwa. Shakapanu umalikiya wakuyi kapananwi mdala yumonga yakaherepa kuliku yomberi. 20Lilagaliru ali lya mfalumi palibwerwa kila pahala muukolamlima wakuyi, wadala woseri hawawapikiniri wapalu wawu, yakawera mlunda ama mhushu.”
21Liholu ali limfiriziya nentu mfalumi na wakulu na yomberi katenda ntambu yakatakuliti Memukani. 22Su, mfalumi kapelekiti barua mukila mkowa pakakolitimlima kwa luga yawu na ntambu yawalemba, handa kila mpalu kaweri mlonguziya gwa kaya yakuyi na kushibwera shisoweru ashi kwa luga yakuyi.
Currently Selected:
Esta 1: PBV
Highlight
Copy
Compare
Share
Want to have your highlights saved across all your devices? Sign up or sign in
The Bible version in the Pogoro Language. @The Word for The World International and Pogoro Language translation. All rights reserved.