Mbwera 7
7
Maholu ga utanga mumakaliru
1Mbaka litawu liheri kuliku utuli wa beyi nkulu na lishaka lya kuhowa kuliku lishaka lya kwiwuka.
2Mbaka kugenda kushiwembu, kuliku kugenda kumsambu, toziya kuhowa ndo upeleru wa kila muntu, su yawawera wakomu wafiruwa kulitula ali mumiyoyu mwawu.
3Mbaka kwinginika kuliku kuseka, toziya tulifunda nentu patuwera na hinginiku.
4Wantu yawanaluhala wawera munumba yana shiwembu, kumbiti wazigizigi wawera munumba ya msambu.
5Mbaka kupikila maberiziya ga wana luhala kuliku kupikinira nyimbu za wazigizigi.
6Kuseka kwa wazigizigi ndo handa liziwu lya misontu mumotu. Ashi viraa ndo shintundiri.
7Kuzyanga kumtenda muntu yakana luhala kuwera mzigizigi. Kwanka swinda kuhalibisiya moyu.
8Upeleru wa mlandu ndo mbaka kuliku mwanjiru gwakuyi.
Uhepeleru ndo uherepa kuliku kulitumba.
9Naguyewuka kuwera na maya, mana maya ilikala kwa wazigizigi.
10Nagutakula, hashi mashaka ga makashu gaweriti gaherepa kuliku mashaka ga vinu? Mana kukosiya hangu luhalandiri.
11Luhala ndo luhelepa handa uhala, toziya lwana mota kwa walii woseri yawawera wakomu. 12Luhala lulolera handa mpiya ntambu yayitulolera. Kumbiti mota ya umani ndo ayi, luhala lulolela ukomu wa muntu yakawera nalu.
13Guliholi weri lihengu lya Mlungu. Gaa yakaweza kushitula weri shakashipinditi Mlungu? 14Mumashaka ga mbatiru gunemeleri, kumbiti mumashaka ga ntabiku guliholi aga, mbatiru na ntabiku. Toziya Mlungu kagatenda goseri aga gaweri pamuhera. Su muntu nakavimana shintu shoseri kuusu makaliru gakuyi gagiza.
15Mumakaliru gangu yagahera mana, mona mirandu ayi miwili, muntu mheri kahowa kalongola tembera ndo mheri na muntu mkontola kendeleya kulikala makaliru matali muukontola wakuyi. 16Naguwera gwa mheri nentu, pota naguwera gwana luhala nentu. Hashi gufira kulilaga gamweni? 17Kumbiti naguwera mukontola nentu, ama naguwera mzigizigi, ntambu gaa gufira kuhowa pamberi pa shaka shaku? 18Mbaka gugakoli goseri aga, mana yakamjimira Mlungu hakaweri na mpatiru.
19Luhala lumtenda muntu kuwera na likakala nentu kuliku wakolamlima kumi mu mji.
20Kwahera muntu yakatenda yagafiruwa pasipanu yakatenda aga mashaka goseri pota kutenda vidoda.
21Nagupikinira visoweru vyoseri vyawalonga wantu, nagwiza kumpikanira ntumintumi gwaku pakakupangira. 22Mana gamweni guvimana mumoyu handa mala zivuwa guwapangira wantu.
23Goseri aga nigajeriti kwa luhala, pantakula nfira kuwera yakana luhala. Kumbiti luhala luweriti kutali naneni. 24Muntu hapakawezi kuvimana mana ya mirandu ayi? Mlandu agu gukamala nentu kugumana. 25Ata hangu nkazaniti kuvimana na kulolalola na kusakula luhala na mana ya mirandu ayi na viraa kuvimana ukontola ndo upungasesi na uzigizigi ndo lukwali.
26Mona mlandu gumu gwagukamala kuliku kuhowa, gwa mdala yakawera handa mgomiziwu, toziya ufiru ndo handa wavu wa kuyambira na mawoku gakuyi ndo minyololu. Su muntu yakamfiriziya Mlungu kamshapira mdala ayu, kumbiti yakana vidoda kagomiziwa na yomberi. 27Mfunda katakula, aga ndo ganigamaniti, pantenditi ulolalola shididini. 28Nendeleyiti kusakula milandu ayi, kumbiti mpatitindiri. Pakati pa wapalu elufu yimu, nimpatiti mpalu yumu, yakana ligoya, kumbiti pakati pa wadala elufu yimu nimwonandiri ata yumu yakana ligoya. 29Na nilifunda mlandu gumu, Kuwera Mlungu kamwumbiti muntu mheri, kumbiti muntu kasyagula njira yakuyi mweni.
Currently Selected:
Mbwera 7: PBV
Highlight
Copy
Compare
Share
Want to have your highlights saved across all your devices? Sign up or sign in
The Bible version in the Pogoro Language. @The Word for The World International and Pogoro Language translation. All rights reserved.