Daniyeli 8
8
Malola ga Daniyeli ga kondolu shipalu na mbuzi pongu
1Mushinja sha tatu sha ukolamlima wa mfalumi Belishaza gwa Babeli, neni Daniyeli, mpatiti malola gamonga. 2Mumalola aga, niliwoniti na kumji mkulu gwa Susa yaguweriti mkowa gwa Elamu. Weriti ng'oloka kumbeku mwa lushemba Ulai. 3Pandoliti, moniti kondolu shipalu kagoloka kumbeku mwa lushemba Ulai. Kondolu ayu kaweriti na magoli mawili, kumbiti ligoli limu liweriti litali nentu kuliku limonga, na lyeni iyendeleyiti kukula kuliku ya kwanja. 4Nimwoniti kondolu shipalu ayu pakakomanga kugenda kwaguzyeta mshenji, kushana na kusika. Kwahera nkanyama yoseri yakajeriti kulikoma na yomberi, pota kugashapira makakala gakuyi. Katenditi ntambu yakafira, na kawera na makakala nentu.
5Paweriti nankulihola shitwatira ashi, moniti mbuzi pongu yumu, kulawa uwega wa kwaguzyeta mshenji kiza kalongola pota kushinkula pasi. Kaweriti na ligoli likulu pakati pa masu gakuyi. 6Kamgendiriti kondolu ulii shipalu yakana magoli mawili kumtuwi, yanimwoniti kagoloka kumbeku kulushemba, kamkomanga kwa makakala gakuyi goseri. 7Nimwoniti pakamkomanga kondolu shipalu ulii kwa kukalalira nentu, hangu kamkomanga kwa likakala na kugameganga magoli gakuyi mawili. Kondolu shipalu ulii kawelitindiri na makakala ga kumkaka mbuzi pongu ayu, su wamgusiya pasi na kutimbangwatimbangwa pota kuwera na yoseri gwa kumlopola mumakakala ga mbuzi pongu ayu.
8Su, mbuzi pongu ulii kaweriti na makakala nentu. Kumbiti pakaweriti na makakala nentu ligoli lyakuyi likulu litupuka. Pahala palii pameliti magoli ga msheshi yagawonikiti paweru, pagawera galola wega za msheshi za pasipanu. 9Mumagoli aga ga msheshi, lilawiti ligoli limu lididini, likuliti nentu kugenda uwega wa kusika kwagulawa mshenji na kugenda isi ilii iherepa nentu. 10Ligoli ali liweriti na makakala kufikira lishonta lya kulyera lyeni ndo ntondu, ilitulusiya pasi limu lya lishonta lilii lya ntondu na kuzitimbangatimba. 11Ligoli ali lilikwisa kuliku Mtuwa Mlungu gwa kumpindi. Na kuwalewelera wantu kulaviya tambiku za kulunguziwa zyeni Mlungu gwa kumpindi kalavilirwa kila lishaka na kuhalibisiya Numba ya Mlungu. 12Toziya ya ukontola awu, wantu wa Mlungu pamuhera na tambiku zakuyi za kulunguziwa kila lishaka kapananitwi ligoli ali na wantu walemiti kujimira unakaka. Su ligoli ali liweriti na uwezu wakutenda kila shintu.
13“Shakapanu, nimpikinira malayika yumu pakayowera na myaguyi. Myaguyi ayu kamkosiyiti, hashi mirandu ayi yayibweritwi na malola aga hagendereyi kwa shaka gaa? Kwa shaka gaa tambiku za kulunguziwa kila lishaka haziyendeleyi kulekwa kutendeka? Kwa shaka gaa upotuziya wa kwagamiziya kila shintu hawendereyi na Numba ya Mlungu pamuhera na wantu wa Mlungu hawendeleyi kutimbangwa?”
14Malayika ulii gwa kwanja kankula, “Hapaweri mashaka elufu mbili na miya tatu pamihi na mandawira. Shakapanu Munumba ya Mlungu hayilumikwi kayi.”
Ntumintumi gwa Kumpindi Gabriyeli katakula mana ya malola
15Neni Daniyeli panigawoniti malola aga, na panjeriti kuvimana mana yakuyi, vumu, ntumintumi gwa kumpindi yumu yakaweriti gambira muntu kagoloka kulongolu kwa neni. 16“Mpikinira liziwu lya muntu kulawa mulushemba Ulai palishema, Gabliyeli, gumgambili muntu ayu mana ya malola gakawoniti.” 17“Gabliyeli kiza pakwegera na pahala pangolokiti. Neni ntiriti nentu, nguwiti makukama. Kumbiti kang'ambira,
muntu gwenga, guvimani kuwera malola yagugawoniti gawusu mashaka ga upeleru.” 18Pakaweriti kankuyowera na neni, weliti nahera makakala nentu ng'onja makukama. Kumbiti yomberi kankola pakangolusiya. 19“Shakapanu kang'ambira gupikinili, hanikugambiri shashifira kulawira, Mlungu pakawera na maya. Malola aga hagalawiri mashaka sha upeleru.”
20Kondolu shipalu ulii yagumwoniti yakana magoli mawili, galangaziya wafalumi wa Mediya na Perisia. 21Mbuzi pongu ulii kana vinyolewu vivuwa ndo kagangaziya mfalumi gwa Ugiriki. Ligoli likulu pakati pa masu gakuyi ndo mfalumi gwa kwanja gwa ugiliki. 22Ligoli lilii lyalimegikiti na pa gakuyi gamela magoli ga msheshi, mana yakuyi ndo ufalumi wumu awu hawulibaguli kuwera falumi msheshi, kumbiti falumi azi hapeni ziweri na makakala gambira ufalumi uli wa kwanja.
23Pa falumi azi kusoka upeleru wakuyi na ukontola pawuwela uvuwa nentu, hapalawiri mfalumi yumu yakatabisiya na mjanjamjanja na kakalipa. 24Hakaweri kana makakala nentu, hakajegi maagamiziya madoda na hakatendi shoseri shakashifira kushitenda. Hakawagamiziyi wantu wanakakakala na wantu wa Mlungu. 25Kwa ujanjaujana wakuyi, hakatendi shoseri shakashifira kwa kuwanzanga wantu na yomberi hakalikwisi mweni. Hakawagamiziyi wantu wavuwa pota womberi kuvimana, na hakafiri kulikomanga na Mlungu, Kumbiti mfalumi ayu mjanjamjanja hakaagamiziwi pota kutendera makakala ga muntu. 26Malola galii ga mashaka ga tambiku ga pamihi na mandawira geni gupananwa ndo ga nakaka. Su nagumgambira muntu yoseri toziya ndo ga bada, na hashipiti shaka shitali mpaka galawili.
27Pa goseri aga neni Daniyeli ndwaliti kwa mashaka saba. Shakapanu nimukiti na nendeleyiti kutenda mahengu kwa mfalumi. Kumbiti malola galii gankangashiti ata wezandiri kugamana.
The Bible version in the Pogoro Language. @The Word for The World International and Pogoro Language translation. All rights reserved.