1 Samweli 3
3
Mtuwa kankumlawira Samueli
1Shaka ashi, muntemba Samueli pakaweriti kankumtendera Mtuwa Mlungu pasi pa ulolera wa Eli, ulagilagi kulawa kwa Mtuwa Mlungu uweriti uvuwa ndiri, ata na maonu kulawa kwakuyi gaweriti gavuwa ndiri. 2Lishaka limu pashiru, shaka ashi Eli masu gakuyi gaweriti gawona ndiri toziya ya uzewi, kaweriti kagonja mushumba shakuyi. 3Samueli na yomberi kaweriti kagonja mngati mnumba nkulu ya Mtuwa Mlungu pakwegera na Lisandiku lya Lipatanu lya Mlungu. Taa ya Mtuwa Mlungu iweriti yankali yakwaka toziya kuweriti hakweni langali. 4Mtuwa Mlungu ndo kamshema Samueli. Na yomberi Samueli, kitika, “Yina!” 5Shakapanu, Samueli kamgendera Eli kalongola, kamgambira, “Niza toziya gunshema.” Kumbiti Eli kamgambira, “Neni nikushema ndiri. Gugendi gwakagonji.” Samueli kawuya na kugonja.
6Mtuwa Mlungu kamshema kayi, “Samueli!” Samueli kimuka, kamgendera Eli na kumgambira, “Niza, toziya gushema.” Kumbiti Eli kamgambira, “Nikushema ndiri mwanagwangu, kagonji kayi.” 7Samueli kaweriti hakanilipikinili liziwu lywa Mtuwa Mlungu, pota ulagilagi wa Mtuwa Mlungu uweriti haweni gubutulwi kwakuyi. 8Mtuwa Mlungu kamshema Samueli mala ya ntatu na yomberi kamgendera Eli na kumgambira, “Niza, toziya gushema.” Panu ndo Eli pakayambula kuwera Mtuwa Mlungu ndo yakamshemiti Samueli. 9Hangu Eli kamgambira Samueli, “Gugendi gukagonji na pakakushema kayi gulongi, gutakuli neni ntumintumi gwaku mpikinira.” Hangu Samueli kawuya na kugonja pahala pakuyi. 10Su Mtuwa Mlungu kiza na kugoloka palii, kamshema Samueli handa kwanja, “Samueli! Samueli!”
Samueli kalonga, “Gulongi, toziya neni ntumintumi gwaku mpikanira.”
11Shakapanu, Mtuwa Mlungu kamgambira Samueli, “Guloli, nfira kutenda mlandu tunga Muisraeli gweni kila yakapikanira hakalilimuki. 12Lishaka ali, hantendi goseri galii gantakuliti kwanjira kwanja mpaka upeleru kuusu Eli na kaya yakuyi. 13Nimgambira kala kuwera haniyikomangi kaya yakuyi mashaka goseri, kwa makontola gakagamana toziya wana wakuyi wapalu wanigiranga neni na kawabera ndiri. 14Hangu nililapa kuusu kaya ya Eli handa ukondola wawu hapeni uwusiwi nakamu kwa tambiku ya kulunguziwa pota malaviwu goseri.”
15Samueli kagonja palii mpaka mandawira, shakapanu kimuka na kuvugula ligomi lya numba ya Mtuwa Mlungu. Kumbiti Samueli katiliti kumgambira Eli shakamgambiriti Mlungu. 16Ata hangu, Eli kamshemiti Samueli, kamgambira, “Mwana gwangu Samueli.”
Samueli kitika, “Yina!”
17Eli kamkosiya, “Hashi, Mtuwa Mlungu kakugambiriti shishi? Nagunfifa shakakugambiriti. Payiwera hagunfifi shakakugariti, Mlungu hakakomangi nentu.” 18Su, Samueli kamgambira Eli goseri gakagambilitwi, pota kumfifa shoseri. Eli ndo kalonga, “Yomberi ndo Mtuwa Mlungu, na katendi shakawona ndo shiherepa kwakuyi.”
19Samueli kendereya kukula na Mtuwa Mlungu kaweriti pamuhera na yomberi, na goseri galii gakatakuliti kwahera ata shimu shashitendekiti ndiri. 20Wantu woseri koseri kuisi ya Israeli kulawa Dani, uwega wa kushana, mpaka Beeri Sheba, uwega wa kusika, wavimana kuwera Samueli kaweriti mtambika nakaka gwa Mtuwa Mlungu.
21Mtuwa Mlungu kongeriti kulilanguziya aku Shilu, toziya kamlawiriti Samueli na kuyowera nayu. Na Samueli pakapikiniriti shintu, Waisraeli woseri wampikiniriti.
The Bible version in the Pogoro Language. @The Word for The World International and Pogoro Language translation. All rights reserved.