زىفانىيا 1
1
1بۇ زىفانىياغا پەرۋەردىگاردىن كەلگەن ۋەھىيدۇر. زىفانىيا كۇشىنىڭ ئوغلى، كۇشى گىداليانىڭ ئوغلى، گىداليا ئاماريانىڭ ئوغلى، ئاماريا خىزكىيانىڭ ئوغلىدۇر. بۇ ۋاقىتتا ئاموننىڭ ئوغلى يوشىيا يەھۇدىيەگە پادىشاھ ئىدى.
پەرۋەردىگارنىڭ سوراق كۈنى
2پەرۋەردىگار مۇنداق دەيدۇ:
«مەن يەر يۈزىدىكى ھەممە نەرسىنى سۈپۈرۈپ تاشلايمەن.
3ئىنسانلارنى، ھايۋانلارنى، ئاسماندىكى قۇشلارنى، دېڭىزدىكى بېلىقلارنى ھالاك قىلىمەن.
رەزىللەرنى يوقىتىمەن، يەر يۈزىدىن ئىنسانلارنى يوق قىلىمەن.
بۇنى مەن پەرۋەردىگار جاكارلىدىم.
4مەن يەھۇدىيە ۋە يېرۇسالېمدا ياشاۋاتقانلارنى جازالاش ئۈچۈن قول كۆتۈرىمەن.
ئىلاھ بائالغا چوقۇنىدىغانلارنىڭ ھەممىسىنى يوق قىلىمەن،
بۇتپەرەس روھانىيلار ھېچكىمنىڭ ئېسىدە قالمايدۇ.
5ئۆگزىلەرگە چىقىۋېلىپ، كۈن، ئاي ۋە يۇلتۇزلارغا چوقۇنىدىغانلارنى،
ماڭا سەجدە قىلىپ، مېنىڭ نامىمدا قەسەم قىلغان تۇرۇقلۇق،
يەنە ئىلاھ مولەكنىڭ نامى بىلەن قەسەم قىلغانلارنى ھالاك قىلىمەن.
6مەندىن يۈز ئۆرۈگەن، مېنى ئىزدىمىگەن،
مەندىن مەسلىھەت سورىمىغانلارنى يوق قىلىمەن.»
7ئىگىمىز پەرۋەردىگارنىڭ ئالدىدا جىم تۇرۇڭلار،
چۈنكى پەرۋەردىگارنىڭ سوراق كۈنى كېلىدىغانغا ئاز قالدى.
ئۇ ئۆز خەلقىنى قۇربانلىققا تەييارلاپ، قۇربانلىق قىلغۇچىلارنى تاللىدى.
8پەرۋەردىگار مۇنداق دەيدۇ:
«مەن قۇربانلىق قىلىدىغان كۈنى ئەمەلدارلارنى، خان جەمەتىدىكىلەرنى ۋە
يات خەلقلەرنىڭ ئۆرپ-ئادەتلىرىگە بېرىلگەنلەرنى جازالايمەن.
9ئۇ كۈنى بۇتپەرەسلەرنىڭ ئادەتلىرىگە ئوخشاش بوسۇغا دەسسىمەيدىغانلارنى#1: 9 «سامۇئىل 1» 5: 5 قارالسۇن. ۋە
خوجايىنلىرىنىڭ ئۆيلىرىدە
زوراۋانلىق ۋە ئالدامچىلىق قىلغانلارنى جازالايمەن.»
10پەرۋەردىگار يەنە مۇنداق دەيدۇ:
«ئۇ كۈنى سىلەر ‹بېلىق دەرۋازىسى›دىن يىغا ئاۋازىنى،
شەھەرنىڭ يېڭى مەھەللىسىدىن پەرياد ئاۋازىنى
ۋە تاغلاردىن گۈلدۈرلىگەن ئاۋازنى ئاڭلايسىلەر.
11ئەي شەھەر مەركىزىدە ياشايدىغان كىشىلەر، پەرياد قىلىڭلار.
چۈنكى پۈتۈن سودىگەرلەر ھالاك بولىدۇ،
سېتىقچىلار يوقىتىلىدۇ.
12ئۇ چاغدا مەن يېرۇسالېمنى چىراغ بىلەن يورۇتۇپ، تەكشۈرۈپ چىقىمەن.
گۇناھقا پېتىپ ئولتۇرغان بىپەرۋا گۇناھكارلارنى،
يەنى ‹پەرۋەردىگار ياخشىلىقمۇ قىلمايدۇ، يامانلىقمۇ قىلمايدۇ› دېگۈچىلەرنى جازالايمەن.
13ئۇلارنىڭ مال-دۇنيالىرى بۇلاڭ-تالاڭغا ئۇچرايدۇ،
ئۆيلىرى خارابىلىككە ئايلاندۇرۇلىدۇ.
ئۇلار ھېچقاچان ئۆزلىرى سالغان ئۆيلەردە ئولتۇرالمايدۇ.
ئۇلارغا ئۆز ئۈزۈمزارلىقىدىن چىققان شارابنى ئىچىش نېسىپ بولمايدۇ.»
14پەرۋەردىگارنىڭ چوڭ سوراق كۈنىنىڭ كېلىشىگە ئاز قالدى،
ئاز قالدى، ئۇ كۈن ناھايىتى تېزلا كېلىدۇ!
ئۇ كۈلپەتلىك بىر كۈندۇر!
ئۇ چاغدا ئەڭ باتۇر ئەزىمەتمۇ پەرياد قىلىدۇ!
15ئۇ غەزەپ، دەرد-ئەلەم كۈنىدۇر،
خاراب بولىدىغان، ۋەيران بولىدىغان كۈندۇر،
قاراڭغۇ، زۇلمەتلىك ۋە قارا بۇلۇتلۇق كۈندۇر.
16ئۇ كۈن بۇرغىلار چېلىنىپ، چۇقان-سۈرەنلەر سېلىنىپ،
مۇستەھكەم شەھەرلەر ۋە ئېگىز مۇنارلارغا ھۇجۇم قىلىنىدىغان كۈندۇر.
17پەرۋەردىگار مۇنداق دەيدۇ:
«مەن ئىنسانلارغا بالايىئاپەت ئەكېلىپ،
ئۇلارنى ئەمالاردەك تىمىسقىلاپ ماڭدۇرىمەن.
چۈنكى ئۇلار ماڭا قارشى گۇناھ قىلدى.
ئۇلارنىڭ قانلىرى يۇندىدەك تۆكۈلىدۇ،
جەسەتلىرى چىرىتىپ تاشلىنىدۇ.»
18پەرۋەردىگارنىڭ غەزىپى كەلگەن كۈنى
ئالتۇن-كۈمۈشلىرىمۇ ئۇلارنى قۇتقۇزالمايدۇ.
ئۇنىڭ غەزەپ ئوتى پۈتۈن زېمىننى كۆيدۈرۈپ،
يەر يۈزىدىكى ھەممە ئىنسانلارنى دەھشەتلىك ھالدا ھالاك قىلىدۇ.
Currently Selected:
زىفانىيا 1: HZUT
Highlight
Copy
Compare
Share
Want to have your highlights saved across all your devices? Sign up or sign in
Uyghurche Muqeddes Kitab Jemiyiti
