MALAKO Eingeli e buku.
Eingeli e buku.
Edi mokanda monɔi na bokue ta mikanda imi mimɛi. Ta makomi mabalaka boo Malako, adi mwange e Polo na Piɛlɛ. Mibalo mi boso midi pungola: Bwɛndi Bopele, bodimedjaka boo Yesu adi «Kilito» ko «Mwana o Ndjakomba» 1, 1-2, 44. «Kilito» adiakabi tingo esusu ta monɔkɔ mo Piɛlɛ ngɔngɔ i mibalo ko na misala ta Galilea 8, 29 ko «Mwana o Ndjakomba» ta monɔkɔ mo ikita inɛnɛ i bayuda ta boso bo bogwa ta ekulusu 15, 39.
Modjɔ mo tina.
Bwɛndi Bopele bobangi na bokue 1, 1-2, 13. Botɔndɔmɔkɔ na mbaeli o Ndjakomba Isaya, Yoane Mobatisi abɔngedjaka bato banɛnɛ tine boasɔ molomami o Ndjakomba: edi Yesu o Nasaleta.
Ekenge e boso e mokanda 1, 14-8, 30 ebalamaka tine Bwɛndi Bopele ko tine bodua bo bokumu bo Ndjakomba. Donga ta mbangi e Bwɛndi Bopele, Yesu aputoanedjaka batingami ba nde. Malako ainedjaka bokondji bo nde, oko ta ehole elehakayo bato banɛnɛ, ehole eheledjakayo bato ba bipeko, ehole egameakayo bakomi ba mobeko ko bapalusai. Ta ekenge e babae, Yesu akɛkɛ ta bosukedja mohelo mo nde na binɔngi ko bokɛ agwa ta Yelusalɛmɛ 8, 31-10, 52. Ta mbala e isato atɔndeaka batingami ba nde, endolo baisipoaka. Yesu asinedjaka seko oko elenge «Mwana o Moto», edi ebaeli e bokamoa eidaka na ngulu ebosidja bo Ndjakomba ibodaka ta tei e bomoto bo nde. Ekenge e basato enɔmɔkɔ ta Yelusalɛmɛ 11, 1-13, 37. Yesu akumedjamaka endolo, abenganaka batɛki ta tepelo, anedjaka badaledji ba tepelo e Isalɛlɛ; aenɛkɛ meako mabalamake ta tina e batingami ba nde, na bea abapingedjaka tine «Boda na edinga» ta tei e bodima.
Ekenge e banɛi ko e suka ebangaka na midjɔ mipipo 14, 1-16, 8. Bikenge bimina bisundolamake na bato basusu ko pongono na batingami ibayakaka na nde mia ma pasika. Yesu ainedjaka boo apeamake, asambedjamake na bakumu ba Ekelesa ko na Pilato, gupɛnɛlɛ o Loma. Yesu akabamake ko abakamake ta ekulusu. Na bea pumasɛnɛ esena e bogwa bo nde, edaka na bali ibataneaka ikila i nde bwase. Ta boenɛ meako mia mibokamoa boo Yesu adi na bomɔ, bayekamaka ko batiaka. Makomi makina mabakeamaka tine boenɛmɛ, bopusoama bo Yesu ko na elomu e batingami ba nde 16, 20.
Ta boinedjama boo eidaka ta malako ma bakilito, tengasa bikenge bisusu ibidaka isa adi Matayo, Luka ko ta Bwɛndi Bopele bo Malako, ibolangamaka naikina ta bohu ta yanga e koto tuku ibae. Malɛi ma nde ko na djebeli e nde e bobala edi busa bu edimamake mɛnɛ. Ta tei e mokanda mu, Yesu adaka mbuti ba bato ibanɔngɔkɔ, endolo edikamaka elenge mobunga mopɛ bopala boinedja bohu ta modjɔ momina. Bomoto bo nde ko Bokumu bo Ndjakomba bodi modjɔ momɔti. Ko lasahɔdjɔkɔ naikina mbunoko busa bu. Edi Bokumu bo Ndjakomba nde? Epalaka bobala mɛnɛ kombe e «Kilito» nde? Ta mahɔdjɔ mamina maendji bodima, pɛ moto oboani bosɔmbedja pɛpɛlɛ. Etungi moehole ko etungi odale na ilɛno imɔti engbanga na batingami. Etungi enɔme na djenge eimedjaka modjɔ moendji bogwa ko mo bopusoa bo «Mwana o Ndjakomba». Bwɛndi Bopele bo Malako bodi mokanda mopele mo boikoa, napɛ ebango bɛngi oimee mokilito. Embete e nde edi elenge tito o swa, edi elenge epweya e tito ba esika ibadaka nase i bokondji bo Yesu ehole edakayo ta etengelenge 1, 1-2, 13.
Tine bokɛ bohali
Ta tine balangi bakina ba mobalo mo Ndjakomba, edi mokanda mo boso. Mokanda momina mobalamakabi tine tati e Piɛlɛ. Edae Matayo, Luka badjebaka. Boso bo bianga 65-70 ngɔngɔ i bobotama bo Yesu ta ehole yena einedjamaka etumba ta ekenge enɛnɛ e 13. Elenge etingodjaka misala mi bayuda, lalɛdjɛkɛ boo abalaka na bapangano. Na bonɔ pongono Matayo ko Luka, alonaka bato ba indjendje. Apingedjaka ta tine moda mo binɔngi bipipo bi Yesu, yona ogwaka ko asundolamaka na bato basusu. Endolo Yesu aenɛmɛkɛ elenge «Kilito», Masiya yona olumedjaka ndingo e Isalɛlɛ, endolo napɛ boda na malɛno mabe. Ekada ta tine bomoto bo nde elenge «Mwana o Ndjakomba», bomoto bua ibodjebamaka ta ehole e inelo e nde ko edimedjamaka ta ehole esendjakayo mokuku, elonamaka na bokumu bosusu ko na sueya esusu tine boo bosoti bo nde boenɛmɛkɛ ta ekulusu!
Currently Selected:
MALAKO Eingeli e buku.: ngc
Highlight
Share
Copy
Want to have your highlights saved across all your devices? Sign up or sign in
©2025 Communauté des Eglises Travaillistes (CET)