MATAYO 28

Bopusoa bo Yesu

(Endja pongono ta Mlk 16, 1-10; Luk 24, 1-12; Yoa 20, 1-10)

1Ngɔngɔ i isu i sabata, ehuma e busa bo eyenga, Malia o ngando e Magadala ko na Malia ekina bakɛkɛ boendja ikila. 2Mbala emɔti, kpɔtɔ ikumanaka na ngulu; obwɛndji o Kumu atitaka ta busa, ahilingodjaka ibanga ko adaka ta diko i du. 3Moda mo nde modaka elenge bongɛsɛ bo mokaikai ko bisendja bi nde bidaka bipu ipɛɛ elenge mamwɛ ma mbuwa. 4Basoda baimeaka na bɔɔ bonɛnɛ mbunoko boimea elenge bato bago. 5Endolo obwɛndji abalaka na bali: «Pɛ bobangani. Nadjebaka boo wahombakani Yesu, yona obakakabo ta ekulusu. 6Aditi naikina iya, apusoi oko elenge abalakayo. Duani, endjani polo emoisakabo. 7Na bea kɛni pɛpɛlɛ botɔndea batingami ba nde boo apusoi ta tei e bago ko akɛi boambani ta Galilea, wamoenɛkeni oho. Endjani bwɛndi bopalaki mbi bobala na nu.»

8Badongaka pɛpɛlɛ ta ikila, balumaka na bɔɔ ko na mongandi monɛnɛ, bapotaka tine bopa bwɛndi adi batingami ba nde. 9Mbala emɔti, Yesu aduaka tine bosakana na bu ko abalaka: «Ndese e bino yena e!» Babatamaka mbuti na nde, bapeaka mako ma nde ko bamokumedjaka. 10Yesu abalaka na bu: «Pɛ bobangani. Kɛni bobala adi bange i mbi bakɛ ta Galilea: edi oho baenɛkeni.»

Mibalo mi basoda

11Yana adakabo na ndjea, ekenge ekina e basoda ibadaka tine bobanea ikila basɔmbɔkɔ ta ibonga ko batɔndeaka bakondji ba banganga ba Ndjakomba, midjɔ misusu imimeaka. 12Bakondji ba banganaga ba Ndjakomba baputoanaka engbanga na basuku ba ngando ta ikita: ngɔngɔ i bodimeana bopaka palanga inɛnɛ adi basoda 13ko babalaka na bu: «Balani na bato: batingami ba moto omina baduaki boiba mokuku mo nde na bulu ehole edakiso lohwɛli. 14Ko ekadabo gupɛnɛlɛ aoki modjɔ momina, iso bɛnɛ lamopangoake bɛngi odaeni pɛ bodiani lindo.» 15Basoda batombaka palanga ko badimaka simbisi ibapakabo. Nongokobea, gala emina enanganaka ta tei e bayuda mbunoko busa bu.

Yesu asinedji na batingami ba nde

(Endja pongono ta Mlk 16, 14-18; Luk 24, 36-49; Yoa 20, 19-23; Bik 1, 6-8)

16Batingami domi na omɔti bakɛkɛ ta Galilea, ta ikoli ibatɔndeaka Yesu. 17Ehole emoenɛkɛbo, bamokumedjaka; bakina ta tei e bobo, badaka na kitɛ. 18Yesu abatamaka mbuti na bu ko abalaka: «Bokondji bosusu bopami na mbi donga ta busa mbunoko ta ngondo. 19Na bea kɛɛni, adi bato basusu ba bikomi bi ngondo ko baimedjani batingami ba mbi; bainani ta kombe e Sango, na Mwana ko na Mwembo Mosɛnɔke. 20Balehani boo babanee simbisi isusu iopakani mbi. Ko djebani boo nadi na nu masu masusu mbunoko ta suka e ngondo.»

Currently Selected:

MATAYO 28: ngc

Highlight

Copy