MATAYO 12

Yesu ko na sabata

(Boindja pongono a Mal 2, 23-28; Luk 6, 1-5)

1Ta ehole iyena, Yesu akatisa gbie dji mbuma dji ble ta busa bo sabata. Batingami ba nde badaaka ndja; babanga bobuka mihɔngbu mi ble ko bayaka#12, 1 Boindja Dit 23, 26.. 2Ehole eɛnɛ Bapalisai modjɔ momina, babala na Yesu bo: «Indja batingami ba wɛ bakɔkɔdea midjɔ misiama ta busa bo sabata#12, 2 Boindja Boi 34, 21.!» 3Endelo Yesu abasɔmbedja bo: «Oilangani eka ekɔɔ Dhapiti busa bomɔti iyo na bato badalaka na nde adaaka bo na ndja? 4Akweya ta ndako e Ndjakomba, ko ayaka mapa imia mapamaka iyo na bato badalaka na nde; a bonie baipama ndjea e bomayaka dongedja oko banganga ba Ndjakomba#12, 4 Bayaka mapa: Boindja 1Sa 21, 2-7. Epama ndjea oko adii banganga ba Ndjakomba: Boindja Lew 24, 9.. 5Kaoko na ikina, oilangani ta mibeko bo, ta busa bo sabata banganga ba Ndjakomba ibia bakasale ta tepelo te basume mobeko mo sabata, ko batakwaka na mobeko momina#12, 5 Boindja Mit 28, 9-10.? 6Enakoboa naotɔndeakadeani bo, iya lodii na moto onɔi tepelo! 7Oso sipoani eka epalaka kɔpi iyeye botingodja: “Mbi nakapale molema mo pɛhɛ bonɔɔ mbeka#12, 7 Ose 6, 6.”, obwanakitini bopa etumbu ta dii bia badii pɛpɛ bodaa na modjɔ. 8Modjɔ mo Mwana o moto adii Kumu o sabata.»

Moto o ebɔ ekatatake

(Boindja pongono a Mal 3, 1-6; Luk 6, 6-11)

9Yesu akina ena ko akɛɛ ta ndako e bobo e miɔngɔnɔ. 10Edaka na moto omɔti ena adaaka na ebɔ ekatatake. Bapalisai bawadja Yesu bo: «Ebwani bopama ndjea bo baheledje moto ta busa bo sabata?» Iyena edaaka mondumba mo hombaka bo bamopunde. 11Yesu abasɔmbedja bo: «Ekadaa omɔti ta tei e bino akadaa na bhata o nde omɔti ko bhata omina akakwa ta mombɔndɔ ta busa bo sabata, abwaniti bomodubodja? 12Singandeloko moto onɔi bhata na motswiya! Iboa elomama bokɔɔ bopele ta busa bo sabata.» 13Iboa abala na moto omina bo: «Ninodja ebɔ.» Aninodja ebɔ ko eimea bopele ondingo iyena ekina. 14Bapalisai baimana ko baso bakɔɔ inginda bɛngi bahombe mondumba mo bomowa.

Mosali ohɔɔmi na Ndjakomba

15Endelo Yesu amayo djeba modjɔ momina, adonga ta esika emina ko bimumu bi bato banɛnɛ bamokimana. Aheledja bato ba bipeko basusu, 16endelo abatuba matoi badae pɛpɛ botɔndea eka edii iyo. 17Akɔɔ iboa bɛngi eka ebala motɛli Isaya ekokedjame:

18«Indja mosali o mbi ohɔɔ mbi,

Mopalani o mbi ko iyoo nasepi na nde.

Naisabi Mwembo mo mbi ta dii iyo

ko atɔndeabi bodju ta dii bikomi.

19Atanoanabi na bato ko atagamabi,

ko moto omɔti ataokabi nongo moholi mo nde ta ndjea djinɛnɛnɛnɛ.

20Atabukabi mososongo moɛmbɛke mosia boimbama

ko atadimabi esendja e molinda mokaimedje mididi.

Mbunoko abolodje bodju bolongake;

21Ko bikomi biisabi elɛndɛ ta kombe e nde#12, 21 Isa 42, 1-4..»

Yesu asɔmbedji ta pundi e mopunda bo

(Boindja pongono a Mal 3, 22-30; Luk 11, 14-23)

22Iboa balwɛɛ Yesu moto apeamaka na mwembo mobe adaaka na miso mago ko adaaka pongono emimi. Amoheledja, ta mondumba mo bo emimi aimea bobala ko na boɛnɛ. 23Bimumu bi bato basusu bakamoa, ko babalaka bo: «Iyoo te Mwana o Dhapiti?» 24Ta ehole eoka Bapalisai, babalaka bo: «Abenganakadea membo mibe na ngulu e Bɛlɛdjɛbule#12, 24 Boindja 10, 25 ko na nase., mokondji o membo mibe!» 25Endelo Yesu asipoa malɛi ma bobo; iboa aso abala na bu bo: «Bokondji bosusu bokabotɔɔ ta tei e bu bɛnɛ bokabehe. Ko ngando enɛnɛ esusu ko na ndako esusu edii bato bayu pɛpɛ bookana ebwaniti bombimbima. 26Ekadaa Satana abengani Satana, iyana aimei bosanedja iyo mɛnɛ; bokondji bo nde bobwani bombimbima ndenge nda? 27Ko ekadaa bo mbi nabenganakadea membo mibe na ngulu e Bɛlɛdjɛbule; ko batingami ba bino babenganakabi na ngulu e nda? Ta tina emina ibo bɛɛnɛ badaabi ba djudji ba bino! 28Endelo ekadaa bo mbi nabenganakadea membo mibe na Mwembo mo Ndjakomba, etingodjakadea bo Bokumu bo Ndjakomba boimei ta dii ino.

29«Mondumba ndani mobwani moto bokwea ta ndako e moto o ngulu bɛngi akatoe leka lo nde amiti nanga moto omina mbɔti; endelo ngɔngɔ dji bomonanga mbɔti akatoadea leka losusu lo ndako e nde. 30Moto odii pɛpɛ bodaa engbanga emɔti na mbi adii moloni o mbi; ko moto okadae pɛpɛ boputoanedja na mbi aka nangakake. 31Ta tina emina naotɔndeakadeani sooti bo: pekato djisusu ko na masinga masusu makasinge bato Ndjakomba makutubanabi, endelo moto obwani bosinga Mwembo Mosɛnɔke abwaniti bodia ekutubanedji. 32Moto obwani bobala bobe ta tina e Mwana o moto adiabi ekutubanedji; endelo moto obalabi bobe na Mwembo Mosɛnɔke atadiabi ekutubanedji edae ta ngondo iyeye, edae ta ngondo ekɛkɛdea adoe.»

Mole ko mbuma dji mu

(Boindja pongono a Luk 6, 43-45)

33«Mole mo pele, mokabote mbuma dji pele; mole mobe mokabote mbuma djibe. Modjɔ mo bakadjebe mole na mbuma dji mu. 34Ibota di mimbitɔ! Obwanini bobala midjɔ mipele mondumba nda, abo odiini bato babe? Modjɔ mo mibalo mi moto mikainedje malɛi madii ta molema mo nde. 35Moto mopele akabale midjɔ mipele mikadonge ta molema mo nde mopele; moto mobe akabale midjɔ mibe mikadonge ta molema mo nde mobe. 36Naotɔndeakadeani bo: ta busa bo Sambi, bato basambabi na mibalo mi pɛpɛ sɔngi mi balaka ibo. 37Modjɔ mo mibalo mi wɛ mɛnɛ mibwani bolongedja isa mibwani boodumba.»

Esɛngi e embete e modjɔ mo bokamodja

(Boindja pongono a Mal 8, 11-12; Luk 11, 29-32)

38Iboa bakina balehi ba mobeko ko na Bapalisai babala na Yesu bo: «Molehi, lopalakadea oloinedje embete emɔti.» 39Abasɔmbedja bo: «Mbota ebe ko e bɔɔli ehombakadea embete, endelo bataopadeani embete ekina oko embete e motɛli Yona. 40Modjɔ mo, abo Yona akɔɔ masu mayake ko na madipake masato ta sɔpɔ dji moswi#12, 40 Boindja Yna 2, 1. monɛnɛ, Mwana o moto pongono akɔɔdea masu mayake ko na madipake masato ta molema mo kpɔtɔ. 41Ta busa bo Sambi, bato ba Niniwe baangɔbi ko bapabi bato ba mbota iyeye etumbu, modjɔ mo basɔmbɔtɔnɔ milema ta ehole eokabo eleho e Yona#12, 41 Niniwe: kombe e boso e ngando e mokondji o monɛnɛ e Asilia, ta dɔɔngɔ dika angɔe modakabusa ta dua e Tigele. Bato ba Niniwe basɔmbɔtɔnɔ milema: Boindja Yna 3, 5.. Enakoboa iyaya edii na Iyona onɔi Yona! 42Ta busa bo Sambi, mokondji mwali o Satina apabi bato ba mbota iyeye etumbu, adonga ta suka suka e ngondo ta tina e bohokamedja konga e Sɔlɔmɔ#12, 42 Boindja 1Ba 10, 1-10.. Enakoboa iyaya edii na Iyona onɔi Sɔlɔmɔ!»

Bosɔmbɔ bo mwembo mobe

(Boindja pongono a Luk 11, 24-26)

43«Ta ehole ekaimane mwembo mo pita ta dii moto, mokakɛe apukane ta bitengelenge ahombe esika e iheme. Endelo te mobolodjake, 44naboa akasabalee bo: “Nasɔmbe ta ndako e mbi, iyena ekinakabi mbi.” Ta ehole eimeadea iyo ko aetanei pɛpɛ eka otei, baambɔ, ko ebɔngedjami bopele. 45Iboa akɛdea atomba membo mibe mikina sambo mimonɔi na bobe; bakweadea ena ko badikamadea. Mondumba mo moto iyona moimeadea mobe bonɔ modaki iyo boso. Ko edabi oko mondumba momina momɔti ta tina mbota iyeye ebe e busa ibubu.»

Yesu na nango ko na baangi i nde

(Boindja pongono a Mal 3, 31-35; Luk 8, 19-21)

46Iyana abalaka Yesu naikina na bimumu, nango ko baangi i nde baemaka sokolu bahombaka mwɛngi mo bosola na nde. 47Moto omɔti abala na nde bo: «Ngwao na baana ba ngwao ba baami badii sokolu ko bakambakadea basole na wɛ#12, 47 Molɔngɔ imumu modiiti ta makomi manɛnɛ mayou. .» 48Endelo asɔmbedja moto iyona obalaka na nde bo: «Odii nange o mbi nda ko baangi i mbi banda?» 49Iboa aninodja ebɔ ta dii batingami ba nde ko abala bo: «Indja nange o mbi ko bangi i mbi. 50Modjɔ mo moto mosusu okakɔe bolulea bo Sesa iyona odii ta busa edii iyo moto odii mwange o mbi, ngɛnɛ o mbi ko nange o mbi.»

Currently Selected:

MATAYO 12: ngc

Highlight

Copy