Iŋɛ́nínɛ yi Isáaŋ 1
1
Nitúmín
1Maandá mɛ́nyɛɛ́ mɔɔ́ŋɔ́ á kálatɛ ewe nyɛ maandá Támbák mɔɔ́súnɛ́n Yésus kilíise,
ɛ́ɛ́ útíínyi peelímoólí pɛ́ɛ́yɛ́ epú pukɛɛ́nyɛɛ́kɛt púpíɛ́lɛ.
Yésuse waatɔ́m Éŋele wɛɛyɛ́ ku eŋelípuólí wɛɛyɛ́ Isáaŋɛ ɔ́ kuɔyítɛ́n wɔ́ maandá makáánɛ́ meem ɛ́ɛ́ úmenyi mɔ.
2Isáaŋɛ wɛɛ́tɛ upiákanɛ́ itóy ɛ́ɛ́ epú kitikit umɛɛ́n nyɛ mekélíe má Támbák ne kémuémue Yésus Kilíis meétíínyi.
3Peseé ne ewú ulááŋanɛ́,
ne epé pɔ́pítɔ́likɔnɛ́ insɔ́m ikésitenyé á maandá moóloné pond páákan ɔ́ niɔlɔ́ maandá kitikit mɛnyɛɛ́ mɔɔ́ŋɔ́ á kálatɛ ewe póond pówóónyosi mɔ́!
Á kiákí ɛ́ɛ́ kisikɛl kí mɔ́ kuasiám kanyɛ mekúye.
Isáaŋ éépíkélikeli ilɔŋ sí peétépí ítíndátɔ́neémue
4Iŋúɛ Isáaŋɛ yɔɔ́ŋɔnɛ́ ilɔŋ sí peétépí pé Yésus ítíndátɔ́neémue sínyɛɛ́ ɔ́ nulɔp nú Asi:
Ɛ́nyɛɛ́ Támbákɛ́ɛ unyɛɛ́, umaápá, woóloné,
nɛɛyɛ́ ne piliínditíe pítíndátɔ́neémue pínyɛɛ́ ó pusíó pú indáŋa yɛɛyɛ́, nútíínyi ɔtɛ́m peseé wɔ́ɔ́p póond pánúfá kiyeéwe.
5Ɛ́nyɛɛ́ Yésus Kilíise, etétúnyí u nulátát nútíínyi kɛ́kɛ́ɛ́yɛ́ ɔtɛ́m peseé wɛ́ɛ́yɛ́ wóond únúéki kiyeéwe kí ɔtɛ́m; wɔ́ unyɛɛ́ mɔɔnd ukutúan ukuɛnyɔk á pilɔ́ŋ, wɔ́ unyɛɛ́ Efuŋ u pefuŋ pé kúúsí! Yésus Kilíis ɔ́túɔyɔ táásɛ, wɔ́ umeétútúkún káásɔ́ á pifal na manɔ́ŋ mɛ́ɛ́yɛ́. 6Weetúéyi nisíp ní pafunɔ́fɔn, peelímoólí pé Síí wɛɛyɛ́ Támbák. Ɛ́nyɛɛ́ Yésus pá ne nuúmu na pukaaka á kisikɛl kitikit! Anakáánɛ́.
7Ɛ́nuɛ́n, wɔ́ ewe woóloné ɔ́ kilɔndɔ́, mɔɔnd kitikit ɛ́ɛnyɛ́ɛ́n wɔ́, tɛ epé pémeékúsé wɔ́ kiáyíkiáyɛ́; ésípi kitikit yé kúúsí áányípá ká ambaŋɔ́ ó pusíó púɛ́yɛ́. Ɛ́ɛ́ɛ, yá aná púkaányípá nɔ! Anakáánɛ́! 8Ɔkɔ́n Támbák ɛ́ɛ́pí ɛ́ɛ́: «Iŋúɛ inyɛɛ́ nitúmín na nimanɛ́n, Inyɛ ewú unyɛɛ́ ɔ́ kusɔ́t, umaápá, woosiondónée, Iŋúɛ Pukaakɛ.» 9Iŋúɛ Isáaŋɛ, andimán waanɔ́ u kuátap, pasɔ́ peem tuɛ́kɛɛ́nɛn muɛ́tɛ muyú múmoómí, tuond tupílúndinan é pufuŋ pú Támbák á nipílat ne Yésus. Péekimbínde, píiŋɛtikɛn póond pááp kuyapá kaáyɛ́ kí ilua pápílanɛ́ ɛ́ɛ́ Patmos ɛ́ kikɛtɛ́kɛtɛ́ɛ kí asaá, ó pusíó ɛ́ɛ́ yeékéme nukál nú Támbák, Iŋúɛ andíkɛ́k etétúnyí u Yésus. 10Ɔ́ puɔ́s pú Ɔkɔ́n, Emfúnukufúúmɛ wáakinsaman, yɔɔkɔɔ́p káámɛ é kélém kikaaka kí ekelú úpíéyesi ekelú ú insɛ́p, 11wɔ́ɔyɔ ɛ́ɛ́: Ɔ́ɔ́ŋ á kálatɛ epú eŋís yááwɔ ɛ́ɛ́nɛnɛ́, átúmɛn Ilɔŋ sí peétépí pé Yésus esie ítíndátɔ́neémue á papálɛ́k epe: Ifɛ́ɛs, Isimilíne, Pɛlɛkáam, Tiyatíil, Sálɛdɛ, Filatɛlɛfí na Lawotisé. 12Yɛɛpíkɛkɛlɛt ɛ́ kuɛ́n mɔɔnd ewú umaákálá káámɛ; imɛ́ɛ́n atálɛ́n mulámba átíndátɔ́neémue pámaátúánán no kóol, na mulámba múɛ́yɛ́. 13Imáand kuɛ́n ɛ́ kikɛtɛ́kɛtɛ́ɛ kí mulámba kiluŋaluŋa ɛlɛɛ́ mɔɔnd, opíómbón kinyuŋa na kiamaám kí kóol á nitál. 14Ɛtɔ́ wɛ́ɛ́yɛ́ ne tuúnye túɛ́yɛ́ nyɛ fuúm ɛlɛɛ́ indɛf; eŋís yɛ́ɛ́yɛ́ muɛnyɛ ɛlɛɛ́ kilémbi kí yiik. 15Pikɔ́nd píɛ́yɛ́ muɛnyɛ ɛlɛɛ́ pilééŋú, ekelú wɛ́ɛ́yɛ́ ááman ɛlɛɛ́ ɔfɔ́l ú awaŋ aká moomb ményeemenyi. 16Mɔɔnd wɛɛ́tɛ mapá asamanán muótiótio mútíndátɔ́neémue kɛ́ɛ́yɛ́ kɔ ɔmbɔ́k wɔɔnɛ́m, imfak i pitíí ifaátá, isɛ́kɛ́ piáy piim píándɛ́ áaman wɔ́ é niít. Pusió púɛ́yɛ́ punya ɛlɛɛ́ ɔɔ́ny ú ɔtɛ́m puɔ́s. 17Imɛɛ́l yɛɛ́nɛn wɔ́ yaakɔɔn wɔ́ ɔ́ pikɔ́nd, yeesíen ɛlɛɛ́ inyɛ ekuén. Waakindál ɔmbɔ́k wɛ́ɛ́yɛ́ wɔɔnɛ́m, wɔ́ káámɛ ɛ́ɛ́: Atipiá puwaá! Iŋúɛ inyɛɛ́ Túmínikɛ́ɛ́yɛ́ɛ ne Súkínikɛ́ɛ́yɛ́ɛ. 18Inyɛ ewú unyɛɛ́ ɔ́ kusɔ́t. Imapá ekuén, nínúan inyɛ nɔ kusɔ́t kútiányípá kúmanan. Nikú nɔ kitɔŋ kí pilɔ́ŋ ɔ́ɔ́kiŋɔ́pɔnɛn. 19Ɔ́ɔ́ŋ kɔk epú ɛ́mɛ́nyɛɛ́n, epú púpíɛlɛnɛ́ nínúan ne epú púólonée. 20Pítɔ́líkɛ́n íŋupálɛn pulinsí púnyɛɛ́ punɛmbɛ́n, iŋélémée i muótiótio mútíndátɔ́neémue ɛɛ́nɛnɛ́ɛ káámɛ kɔ́ ɔmbɔ́k wɔɔnɛ́m na atálɛ́n mulámba átíndátɔ́neémue pámaátúánán no kóol: muótíótio mútíndátɔ́neémue nyɛ Peéŋele pí Ilɔŋ sí peétépí pé Yésus sínyɛɛ́ ítíndátɔ́neémue, atálɛ́n mulámba átíndátɔ́neémue nyɛ Ilɔŋ sí peétépí pé Yésus sínyɛɛ́ ítíndátɔ́neémue.
© 2026, CABTAL