Filipiɛ́ŋ 4
4
Póol éékeekenyi insúŋɛ
1Paandimán páámɛ pɔ́ niɔy imbílɔ́ɔ́ŋɔnɛ́ɛ na pukaaka ɛ́ɛ́ yáand kuɛn, nunyɛ anyamɔ́ wáámɛ ni indanyáa yaam, ánupílúndɛn nunamá nukáánɛ́ kɔ́ Ɔkɔ́n, paandimán páámɛ pɔ́ niɔy. 2Efoti naawɔ nɛ sintis yoónúówon ɛ́ɛ́ núsɔ́tɔn ekelú ómoómí kɔ́ Ɔkɔ́n. 3Aŋúɛ ɛnyɛɛ́ ekúlíkuli waamɛ u nulátát ó puólí, yoókuówonée áákɛ́n pɔ́ ɔmbɔk, pémenúénésí naamɛ kí insɔ́m yi indámb ne Kelemen ne pekúlíkuli páámɛ pó puóli pólotí, pisiɛ́n píɔ́p kanyɛ á kálatɛ ú kusɔ́t. 4Ánuyayáápá kɔ́ Ɔkɔ́n á pisikɛl kitikit; yookonditonyi ánuyayáápa. 5Ɛ́nyɛɛ́ mɔɔnd kitikit menyi ɔtɛ́m peseé wáánɔ́. Ɔkɔ́n kanyi mekuyekuye 6Nutitúmútén na puandá, maná á puandá kitikit ónuówón Támbákɛ́ɛ kí imbísókólí ni ilémbie é pepeseé pɛ́ɛ́yɛ́. 7Kiyeéwe kí Támbák kítápukanɛ́ɛ insiŋi kitikit, kɛnɛkɛn itɛ́m siánɔ́ ni imbítáákítɛ́n síánɔ́ é Yésus Kilíis. 8Maná kɔk, paandimán, epú kitikit púnyɛɛ́ kémuémue, epú púɛsikɛnɛnɛ́ɛ nɔ kukɔl ɔ́ niɔlɔ́, puunimíkánán, epú kitikit pɛ́nyɛɛ́ kuɔyɛt, epú kitikit pɛ́nyɛɛ́ kuátap, epú kitikit púnyɛɛ́ peseé, puutɛ́fítɛ́n, epú kitikit púɛsikɛnɛnɛ́ɛ na nukanyi, pá imbítáákítɛ́n síánɔ́. 9Epu kitikit numɛɛ́n, nuatáŋap, nuɔkɔɔ́p, nuopíónyitonyi káámɛ, puum ánuák púú káánɔ é meelíe Akáánɛ́ Támbákɛ́ɛ weekenyée kiyeéwe kapá naanɔ́.
Póol éélémbesi Pefilipien
10Yɔɔ́kɔɔ́pɔn ipali taásɛ kɔ́ Ɔkɔ́n aná númányandá kundínyi ɛ́ɛ́ nuákimbítááka, maná kipán tiápá ɛ́ɛ́ nútíínyi puɔ, aná kíɛ́nyɛ́ɛ́nikɛ́ɛ nuand etíínyi makánákana nupianɛ́ɛ káámɛ ó pusíó. 11Indipa kí insaná na puandá kɔ́ɔ́kɔ́ iŋálanɛ́ɛ anakáánɛ́, á kiákí imopíónítónyí kúɔ́p peseé ne epú imbianɛ́ɛ. 12Yemenyen kusɔ́t é puséé, imenyen kusɔ́t á puyupuyɛ. Imopíónyítónyí á tunamá na kisikɛl kitikit, na kupa oŋoyón na kupian insaná nɔ kusɔ́tɔn á kisikɛl púnyɛɛ́ puyupuyɛ kúnyáánɛ á kati kupia. 13Indɛ kupíkányɛ́k á púú kitikit é Kilíis wuuŋákanɛ́ɛ pukaaka. 14Naánɛ́ kɔk ɛ́ɛ́ numɛɛlɛ́ peseé ɔ́ kukɔ́l niap káámɛ é muyu. 15Nuemenyen panɔ́ Pefilipiɛn aká tumeétúm é kupéke insɔ́m yi indámb, yaatɔk masetoan. Á kisikɛl kikáánɛ́ tɛ ɔlɔŋ u peétépí ómoómí timimfá puandá numapá pééŋényí numiíŋɔkɔnɔkɔn. 16Panɔ́, aká imaápá tesalonik, á pisikɛl kutek nuundúmɛn epú pumiínséménin. 17Pútipá ɛ́ɛ́ yaákaamba pinamá; epú yaambanɛ́ɛ, púnyɛɛ́ núpia kipinúúne káánɔ ó puólí. 18Yaápian epú kitikit púówónée kutápɔk. Iŋanyi ɔpɔkímɔ́t nínuan epú Epafotit mányimfá númányindúmɛ́n, nupoo núnyɛɛ́ ɛlɛɛ́ kisɛŋ kí niaŋɔ́ pɛ́pítɛkɛnɛ́ɛ Támbákɛ́ɛ wɔɔyɔnɛ́ɛ kíi woond waátapan. 19Támbákɛ́ɛ waamɛ kowóónyi epú kitikit púnúsémenenée, kɛ́ɛ́yɛ́ ɔ́ kinɔ́k kí punɛ́m é Yésus Kilíis. 20Tuékenyi Támbákɛ́ɛ Síí waasɔ́ nukúm é teeníík ne nííké. Anakáánɛ́.
Iŋondion
21Enupikeliti epi kitikit pɔ́ɔ́pinɔnɛ́ɛ Támbákɛ́ɛ é Yésus Kilíis. Paandimán páásɔ́ pɛ́nyɛɛ́ nam menupikeliti. 22Peétépí kitikit menupikeliti, solsol epi pɔkɔtɔnɛ á kiansi kí efuŋ wɔkɔn Sesal. 23Ɛ́nyɛ́ Ɔkɔ́n waasɔ́ Yésus Kilíis nupinun.
Currently Selected:
Filipiɛ́ŋ 4: yav
Highlight
Copy
Compare
Share
Want to have your highlights saved across all your devices? Sign up or sign in
© 2026, CABTAL