Filipiɛ́ŋ 1
1
Imbíkélie
1Niŋúɛ Póole, naamɛ ne Timoté peelímoólí pé Kilíis Yésus, pasɔ́ tuɔ́ŋɔnɛ́ ɔmbɔp ewe ó pusíó pú pɔsɔ́k kitikit pɔ́ɔ́pɔninɛ́ Yésus Kilíise, no posíósíó pɔ́ɔ́p, ne peélímasɔ́m pɔ́ ɔlɔŋ u Támbák peem á pálɛ́k u Filip. 2Ɛ́nyɛɛ́ taatá Támbák nɔ Ɔkɔ́n Yésus Kilíis nútíínyi ɔtɛ́m peseé wɔɔ́p póond pánúfá kiyeéwe.
Póol éélémbesi Támbákɛ́ɛ
3Yeélémbesi Támbákɛ́ɛ waamɛ kisikɛl kitikit ekí ímányinúpítáákɛt. 4Yoópísókolonyi kisikɛl kitikit na anyamɔ́ káánɔ́ ó pusío panɔ́ peem, 5á kiákí ɛ́ɛ́ numindálɛ́n ɔmbɔk é kusélemendi insɔ́m yi indámb kutúm puɔ́s púkutúan kuasiám nínuan. 6Yeémenyen puandá púmoómí peseékese: ɛ́ɛ́ Támbákɛ́ɛ ewú umeétúm kinɔ́k kí puólí ekie káánɔ́ kasuŋuna na púú kuám á nukamá, kuám puɔ́s Kilíis Yésus óónyóólonée. 7Púnyɛ peseé ɛ́ɛ́ ímbian sikáánɛ́ imbítáákítɛ́n káánɔ́ ó pusíó panɔ́ peem, á kiákí ɛ́ɛ́ nunyɛ káámi kɔ ɔtɛ́m. Nuɔ́kɔ́lɔn niap kɔ ɔtɛ́m peseé ewu Támbák ímfáanɛ́ɛ tɛ á kisikɛl ekie inyɛɛ́ á kiansí kí imbíne, tɛ á kisikɛl ekí inuananɛ́ɛ ó pusíó pú insɔ́m yi indámb, ne kulúndesi yɛ́ɛ. 8Ɛ́ɛ́ŋ kémuémue, Támbák nyɛ etétúnyí waamɛ weémenyen ɛ́ɛ́ nunyɛ pokookée páámɛ panɔ́ peem á makánákana mé Yésus Kilíis. 9Índɛ́ imbísókólí yaamɛ eye káánɔ́ ó pusío: Ɛ́nyɛɛ́ iŋɔyɔ yaánɔ ɔ́ɔ́mbɔ kuɔmbɔ, yóond ípíɔ́yikɔnɛn kupíɔ́yikɔnɛn, kí iŋuɛ́lí na tutátɔ́ táásɛ. 10A kuátuna epú púnyɛɛ́ peseé. Anakáánɛ́ nukaányípá pasukúná núond nupá kati kipalalá puɔ́s Kilíis óónyóósiondónée. 11Yésus Kilíis nútálɛn ɔmbɔk ɛ́ɛ́ kusɔ́t kúánɔ́ pá kuwóónón ne meelíe mí indɛ́ndɛ́nɛ ó pusíó pú nuúmu no kiómoko kí Támbák.
Insɔ́m yi indámb áásálamandan
12Paandimán páámɛ pá kuátap na paakáandɔ́ nɛ pɛɛnúmɛndɔ́, yaákaamba kunútían puónyi púmoómí: kémuémue puandá púányíŋámɛ́n ɛ́lɛ́ ɛ́ɛ́ insɔ́m yi indámb suŋuna. 13Á kiákí ɛ́ɛ́ peelímoólí pɔ́ ɔŋgɔ́mun kitikit, nɔ pɔsɔ́k pólotí kitikit éémenyen nínúan ɛ́ɛ́ inyɛ á kiansi kí imbíne, á kiákí ɛ́ɛ́ yɛɛ́kɛɛlɛn Kilíise puólí. 14Peétépí kitikit óópíóndonyi ɔtɛ́m nɔ Ɔkɔ́n aná pííŋɛ́nɛnɛ́ɛ á kiansi kí imbíne, páand ɔyɔkun kuyɔkɔn kukéme mekélíe má Támbák kati pumbílɛ. 15É kémuémue pólotí éekéme Kilíise ɔ́ kilɔ́ɔ́ŋɛ́t ne kupekenyi pekenyi, maná pólotí nyɛ ni imbítáákítɛ́n yi indámb. 16Pɛ́ɛ́kɛlɛ púú kí iŋɔyɔ ɛ́ɛ́ inyɛ á kiansi kí imbíne á kiákí yaánuanan ó pusíó pú insɔ́m yi indámb. 17Maná pólotí ɛ́ɛ́kɛɛlɛ nɔ́ á yaák, é kukéme Kilíise ɛ́ɛ́ túpekenyi pekenyi nɔɔpɔ, ɛ́ɛ́ pátúpíányɛn. Tuketi túɔ́p nyɛ pifólí, páapítááka kuulúndinyi kusɔ́t á kiansi kí imbíne. 18Tɛ imbítáákítɛ́n síɔ́pɔ́ pá tiɛkíɛ, sítipá síimbála ipɔ́tɔ́! Tɛ péékéme Kilíise tiɛkiɛ́! púúpú inyɛɛ́ anyamɔ́ na puɔ, yoónyóond yaand ayayaapa. 19A kiákí yeémenyen ɛ́ɛ́ é kuesúkín imbísókólí síánɔ kiínsóti ni iŋakina i Emfúnukufúúmɛ ú Yésus Kilíis. 20Yɔɔ́kɔyɔ ɛ́ɛ́ púpíɛl, yoond imbíóndonyi ɔtɛ́m. Indiányipá kí imbúsúnáanɛ, inyɛ no pipíóndínyí ɔ́tɛm kiandákáand, é metúk mí ínanɔ ne metúk móolonée, pɛ́ɛ́kɛɛ́n káámɛ ɛ́ɛ́ Kilíis nyɛ kiandákáand tɛ ɔ́ kusɔ́t kúámɛ tɛ é nikú níámɛ. 21Ákáámɛ, kusɔ́t, nyɛ Kilíise, nikú nyɛ pinɔ́k pí pinamá káámɛ ó pusío. 22Maná índɛ insiasuŋuna nɔ kusɔ́tɔn, inyɛ pɛ́kuɛl puólí púɔkɔnɔkɔnɛ́, indipá imenyen epú inyúúnɛ́ɛ. 23Piáyí piim píandɛ́ áákilaluna: yáatɔk ɔ́ kusɔ́t ɛ́ɛ́ imbá ne Kilíis, púú púnyɛɛ́ peseé kutápɔk; 24maná kulɔ́p akɛ e kúúsí nyɛ imfíí káánɔ́ ó pusío. 25Kúúkɔ imenyenée ɛ́ɛ́ yɔɔ́lɔpɔn, yoópíóndonyi ɔtɛ́m nɔ́. Iŋapá káánɔ́ á masíá panɔ́ peem á kunútálɛn ɔmbɔk á kusuŋɔn no puólí, tuópíóndonyi ɔtɛ́m na anyamɔ́. 26Kúúkɔ́, aká yoosiondonée kúánɔ́, nukand apá ká anyamɔ́ káámɛ ó pusíó, á nipílat ne Yésus Kilíis.
Insália ó pusíó pú insɔ́m yi indámb
27Maná ɔ́nusɔ́tɔ́n aná insɔ́m yi indámb i Kilíis núɔyɔnɛ́ɛ. Ɛ́ɛ́, índɛ insiól, yɛɛ́nyínuɛn, índɛ insiɛl indiól, yɔɔ́nyɔɔ́p aná pákálanɛ́ káánɔ́ ó pusío. Akáánɛ́ iŋeényímeny ɛ́ɛ́ nunyɛ papílúndánɛn, papílatá panúɛ na panúɛ́, nunuanan embúl ómoómí nɔ ɔtɛ́m ómoómí, á kukííka pipíóndínyí ɔtɛ́m insɔ́m yí indámb núólinonée na pɛ́ɛ. 28Yeényímenyi kákáámɛ ɛ́ɛ́ nutipá nupian pumbíla no pokóyikoy páánɔ́, ɔ́ kíɔ́p kiáyí, púétíínyenyi ɛ́ panyɛ penyímén. Káánɔ́ á kiáyí, púétíínyenyi kisótio kíánɔ́ kíólinonée ku Támbák. 29Wúú waányínúfá peseé wɛɛlɛnɛ́ɛ ɛ́ɛ́ núpíóndonyi ɔtɛ́m é Kilíis núond núɛ́nɛn muyú kɛ́ɛ́yɛ́ ó pusío. 30Á kiákí ɛ́ɛ́ namɛ naanɔ́ tuánuanan ɔlɔŋ, é metúk mí insúá, imanuánán káánɔ́ ké eŋis, imaásuŋuna na kunuanan, nuémenyen nɔ.
Currently Selected:
Filipiɛ́ŋ 1: yav
Highlight
Copy
Compare
Share
Want to have your highlights saved across all your devices? Sign up or sign in
© 2026, CABTAL