Filimɔn 1
1
Imbíkélie
1Iŋu Póole kimbɔk kí Kilíis Yésus, embul ne Timoté andimán waasɔ́ tuɔ́ŋɔ́nɛ filemoŋɛ ekúl waasɔ́ na andimán waasɔ́ u puólí, 2Na andimán waasɔ́ u kuátap wu akaand Apia, na wakuasɔ u puólí Alisipe nɔ ɔlɔŋ ú peétépí upikusanɛ kuawɔ: 3Támbákɛ́ɛ Síí waasɔ́ nɔ Ɔkɔ́n waasɔ́ Yésus Kilíis nufa peseé ne kiyeéwe.
Iŋɔyɔ na kuátap ku Filemɔn
4Indipa yandan kuekenyi Támbákɛ́ɛ waamɛ ilémbie káámɛ kí imbísókólí kisikɛl eki iŋupitakanɛ; 5A kiákí ɛ́ɛ́ yɔkɔpɔn pɛtɛtɛn iŋɔyɔ na makanakana ɛlɛnɛ ó pusíó pu Yésus Kilíis ne peétépí kitikit. 6Yokowon wu ɛ́ɛ́: kuátap kukan kunyɛ kúásɔ́ páásɔ́ peem pitinyenyi kuondo kuɛlɛ ɛ́ɛ́ tumenyi peseé ewu upiwonyosie káásɔ́ ɛ́ kikɛtɛ́kɛtɛ́ɛ ó pusíó pu Kilíis. 7Makanakana maakan andimán ɛkɛlɛ ɛ́ɛ́ imba á kianda kí anyamɔ́ no piwonitin andilɛ, á kiákí ɛ́ɛ́ kááwɔ andimán peétépí apia ilúndɛ kɔ ɔtɛ́m.
Póol akaminɛ ó pusíó pú Onesim
8Tɛ ɔpɔn, taani imbiananɛ pukaaka é Yésus Kilíis ɛ́ɛ́ iŋupunduna, yɔpilɔŋo ɛ́ɛ́ insi iŋupilikɛn kááwɔ á makanakana mí inanu. 9Niŋu Póole, yaani iŋanyɛ ninuan ewe kilunu, niŋu kɔk, kimbɔk kí Yésus Kilíis, 10yaakamba ɛ́ɛ́ iŋupisokoliti ó pusíó pu muɔnam u kuátap imepien kɛɛ́n é mesuŋ nɛkɛtɛ́ɛ, Onesime. 11Insua utimapa kianda kí puandá kááwɔ ó pusíó, maná ninuan ukapa kianda kí puandá kááwɔ yá aná unyɛ kaamɛ. 12Imokuondini wɔ, wu unyɛ ɛlɛɛ́ ɔtɛ́m wáámɛ. 13Yɔɔpilɔŋɔ́ kulop nɛɛyɛ́ kaam á masia, ɛ́ɛ́ ukɔl ninyol nyawɔ wu ɔkuŋɔkɔnɔkɔn á maasɔm akɛ á kiansi kí imbíne inyɛ ó pusíó pu insɔ́m yi indámb. 14Maná indipa yamba kuɛl puandá kaati kááwɔ ɔkuɔyitɛ: Peseé ewu ɛlɛnɛ, indipa yaamba ɛ́ɛ́ iŋukutikan maná ɛlɛɛ́ kááwɔ ɔ kuɔyɛt. 15Punyi nɔ ɛ́ɛ́: Umatukan naawɔ ɔ monɔ kipeneŋ ɛ́ɛ́ wosiondo é teeníík, 16kútipá ɛlɛɛ́ kiɔ́lí, maná kutápɔk kiɔ́lí. Kɔl wɔ ɛlɛɛ́ andimán u iŋɔyɔ kaam ó pusíó naawɔ kakawɔ. A nilat ni kúúsí nɔ kuɔyɛt ku Ɔkɔ́n waasɔ́ Kilíis. 17Indi kɔk ookiŋolosi ɛlɛɛ́ ekul waawɔ, kooli wɔ aná iŋolosie iŋúɛ muɛt. 18Indi umɔ́ɔ́kulɔkɛ́n, indi waákupianan ɔɔlɔ́ áák mɔ́ɔ káámɛ ɛ́ kisiɛ́n. 19Imasan nɔ ɔmbɔk wáámɛ, iŋúɛ Póol iŋanikunam, maná kútipá ɛ́ɛ́ iŋupitekiti aŋupuɛt akimbian kusɔ́t kuawɔ. 20Ɛɛ andimán, infa anyamɔ́ ukáánɛ́ kɔ Ɔkɔ́n ɛ́ɛ́ imbia ilúndɛ kɔ ɔtɛ́m anipilat nyasɔ ne Kilíis. 21Kalatɛ ewe iŋuɔŋɔnɛ, yeketesi ɛ́ɛ́ kááwɔ ɔ kuɔpɛn, ɛkɛlɛ kutápɔk epú iŋuowone.
Kuosiondo kú Póol
22Tɛ anakan iŋamban insumbiɛ, káánɔ́ kí imbísókólí yopiondonyi ɔtɛ́m ɛ́ɛ́ iŋɛkɛt yosinuondin.
Inŋondiɔ
23Apafilasɛ unyɛ á kiansi kí imbíne embul naamɛ ó pusíó pú Yésus Kilíis menupikeliti. 24Malakuse kɛ́kɛ́ɛ́yɛ́ nɛɛyɛ́ na Alisitálak na Tamas na Lukas pakuas po puólí. 25Nupoo nú Ɔkɔ́n Yésus Kilíis pa naanɔ́.
Currently Selected:
Filimɔn 1: yav
Highlight
Copy
Compare
Share
Want to have your highlights saved across all your devices? Sign up or sign in
© 2026, CABTAL