Súut 1
1
Imbíkélie
1Iŋúɛ Súute andimán Isáak, eŋelípuólí u Yésus Kilíis, yɔɔ́ŋɔnɛ́ paápílán, Támbák sí ɔ́ɔ́yɔɔnɛ́ɛ woond unɛkinɛn Yésus Kilíise pɔ. 2Niɛnɔsukɛ, ne yeéwée, ni iŋɔyɔ, mapá naanɔ́ tɛ indítíkínín.
Epé póónyonyée kisupɔ́, puónyi puɔ́pɔ́ kanyɛ pusúmbá
3Panɔ́ pekúl páámɛ pá nipaná, yaápian kiták kátak kí kilɔ́ɔ́ŋɛ́t kí kunuɔ́ŋɛn ɔmbɔp ó pusíó pú kisótio kiásɔ́ kí peem. Ínyɛ akútíkánán ɛ́ɛ́ inúɔ́ŋɛn ɔmbɔp ewe, é kunúliikiti kí insália i kuátap eyí Támbák éékenyinyée kómoómí é peepe pɔ́ɔ́pinɔnɛ́ɛ wɔ. 4Pɔsɔ́k pómotí, pɔ́ pilɔ́k pí meelíe mɔɔsípíɔ́sɛ́t ɔ́ kiɔ́p kiánɔ́, papákala iŋilí sí peseé sí Támbákɛ́ɛ waasɔ́, ɛ́ɛ́ pɔ́sɔ́tɔn tɛ tiɛkiɛ, papísáŋuna Yésus Kilíise unyɛɛ́ wééŋényí Oŋónyóonyi, nɔ Ɔkɔ́n. Ɔmfiɔ́ŋ metúm ekéme kikua kikuaninɛ́ɛ pɔ.
5Tɛ numenyen moónyi makáanɛ́ peseékése, yaákaamba kunúpítéékiti aná Ɔkɔ́n moósótí nikúli ni Ísilayɛ́l ɔ́ kitɔŋ kí Esípit, é kélém Wɛɛsɛ́lɔn pɛfɛ́lɔ́fɛlɔ. 6Peéŋele pamaátɔ́k kɔ́ɔ́p ké etényí pááyap ɔnyɔ́lɛ́ yɔ́ɔ́p, Waákííka pɔ́ kí imbíne pakútá téníík ne níík kuám á kikaaka kí puɔ́s pú isɔ́ɔ́sɔ. 7Yá aná nɔ Sɔ́tɔm nɔ Kɔmɔ́ɔl, maápikɛ́ é yiik í teeníík, na papálɛ́k pɛ́ mɛɛŋɛ́l pémeépíekí ɛ́ kuɛndɛ musɔm nɛ pɛɛnd pátiányípá nunamá núɔ́p, ne meelíe má pifal pɛ́mɛɛ́lɛ, akáánɛ́ panyɛ pulinsí, 8Yá anakáanɛ́ pɛɛnd pakáánɛ́, kɔ́ɔ́p é mulimí, nyukusenée tuɔ́l, péféne pukaaka pú Áŋaaŋa, pásikan Peéŋele pɔ́ niɔlɔ́. 9Tɛ eŋelímasɔ́m wɔɔkɔ́n Mikayɛ́l, timaámbɔn niít á kusikɛt okóyíkoyi aká pémeépekenyípekenyí ó pusíó pú kilɔ́ŋ kí Moyíis, Mikayɛlɛ kɛ́ɛ́yɛ́ ɛ́ɛ́: «Ɛ́nyɛlɛ́ Ɔkɔ́n kufá inséésítényí!» 10Pɛɛnd pakáánɛ́ áásikan epú péleemenée, epú pémenyenée niáŋ ní inyam sítiányípá na tutátɔ́, púú púándɛɛ́ atúútan pɔ́ ké ekít. 11Ɔsɔ́k nɔɔpɔ́, á kiákí ɛ́ɛ́ pɔ́ɔ́kɔɔŋɔn kí iŋilí i Káyɛn; ó pusíó pú pinamá, páápíyap á tamátamá u Paláam pɔ́ɔŋ á pikɔndɔkɔnd pí Kolé, péeku. 12Pɔ́ kɔk pényúkusenée múkunyá muánɔ́ mú peétépí nunyáanɛ́ɛ. Akáanɛ́ páányáan nɔ ɔlɔt, pápúwáan póótukon, tɛ ɛtɔ́ kunuá pápítáákan yá ké emundí yɔ́ɔ́p. Pésiénen ɛlɛɛ́ kilɔndɔ́ kí katɛ moombe emfún títikenée, kítiányípá kínuenesi iŋum. pányɛ ɛlɛɛ́ matɛ́ mákati kuóme á kisikɛl kí niok, mapálá mekuén káandɛ. 13pányɛ ɛlɛɛ́ moomb ma mááŋ mépítuuŋulenée móoto pinyík píóp pí ɛtɔ́ kunua: Piteŋel pí múmuɛnyimuɛnyɛ imbíne í teeníík péétenyée pɔ. 14Kɔ́ɔ́p Ínɔk u kátíndátɔ́neémue é kélém kú Átam mɔɔ́yɛ́t: Índɛ́, Ɔkɔ́n óókoólon ne Peéŋele pɛ́ɛ́yɛ́ tɛ nianɛ́n 15ó kuosisóósósí pɛɛnd kitikit woond upɛn epe kitikit pɔ pilɔk pí meelíe, nɔ pilɔk pí pipúk ni insikɛ́ péémenyée kɛ́ɛ́yɛ́ ó pusíó. 16Pɛɛnd pakáánɛ́ powóónón nɛ ɛmbítɛ́tɛ́l áásuŋuna kɔ́ɔ́p ɔ́ pilɔk pí pilɔ́ɔ́ŋɛ́t, péémenyi pilɔk pí tukál, pɔ́tɔ́ɔ́ndɔ pɛɛnd aká pemenyenée pákaná apút kɔ́ɔ́p.
Insúŋɛ é peétépí
17Panɔ́ kɔk, pekúl páámɛ pí iŋɔyɔ, ánupítááka tukál etú petúmí pɔ́ Ɔkɔ́n waasɔ́ Yésus Kilíis maánútíán kisíósíó. 18Pɛ́mɛɛlɛ́ káánɔ́ ɛ́ɛ́: Á kisikɛl kí kusúkin pɛɛnd áányáam pékúéle Támbákɛ́ɛ póond pɔ́ɔ́ŋɔn kɔ́ɔ́p ɔ́ pilɔ́ɔ́ŋɛ́t. 19Pɔ́ɔ páákanɛ́ɛ tusalasala ɛ́ɛ́ kikɛtɛ́kɛtɛ́ɛ kí peétépí, pápian imbítáákítɛ́n sí kúúsí, pátipá ne Emfúnukufúúmɛ. 20Panɔ́ kɔk pekúl páámɛ, ánuwááká kusɔ́t kúánɔ́ káánɔ́ á kiandá kí kifúúmak kí kuátap: Ɔnupisokoloni ke Emfúnukufúúmɛ. 21Ɔ́nulɔpɔ́ kí iŋɔyɔ i Támbák: Ánuák pipíóndínyí ɔtɛ́m píánɔ́ ɛ́ niɛ́nɔsɔk ni Ɔkɔ́n waasɔ́ Yésus Kilíis ɔ kusɔ́t kú teeníík. 22Ɛ́nupínɛ́ɛ́kínɛn epí pámanyɛɛ́ pátipiá kuátap kuulúndán. 23Énutúkún pɔ, núsúkat pɔ é yiik. Ó pólotí ɛ́nuɛ́n pɔ́ ɔsɔk, maná ni iŋuɛ́lí, nufɛmɛ kinyuŋa kíɔ́p pényúkusenée nɔ pilɔk píɔ́p pí meelíe 24É wúúwú unyɛɛ́ kunúnɛk á kiányí kitikit woond unúténikenyi tɛ kipalalá na anyamɔ́ kɛ́ɛ́yɛ́ ke eŋis owóónón na nukanyi, 25á Támbákɛ́ɛ weŋeni osoti waasɔ́ é Yésus Kilíis Ɔkɔ́n waasɔ́, nukany, puŋaaŋa na numiansina, na pukaaka, kisíósíó kisikɛl kitikit, ninuan ne tenik nenik. Anakáánɛ́.
Currently Selected:
Súut 1: yav
Highlight
Copy
Compare
Share
Want to have your highlights saved across all your devices? Sign up or sign in
© 2026, CABTAL