Isáak 5
5
Kukua kú inɛ́m í mɔɔnd
1Panɔ́ kɔk inɛ́m sí pɛɛnd, ánupaŋá puólílóoli ó pusíó pú pilɔk pí maandá pínúpéétenyée. 2punɛ́m púánɔ́ nyɛ puyiká, insíŋ áámaná anyáan pisɔnɔ́ píánɔ́; 3Kóol ne muenyi múánɔ́ nyɛ ni isɔ́kɔlimbí, isɔ́kɔlimbí í punɛ́m púánɔ́ pukáánɛ́ kɔnúsɔ́ɔ́mɔn, íkepikesi emekú wáánɔ́ ɛlɛɛ́ yiik. Nunyɛ petulé punɛ́m á pisikɛl pí kusúkin! 4Nuén kunaman peelímoólí pɔmɔɔ́kɔtɔ káánɔ́ é pisíén, páákákan tukokóo, indumúdumú yɔɔpɔ́ áásíám kí itú sí Ɔkɔ́n u pukaaka. 5Akɛ e kúúsí nuɔ́sɔ́tɔn kusɔ́t kú peseé, nupíyaka nuóyon kuám ɔ́ puɔ́s pɛɛnd meekúen. 6Nuɛ́pɛnɛn nuond nuɔ́nɔ pá kati kipalalɛ́ɛ tɛ ɛ́ɛ́ pémépítukítée.
7Énupílimbit paandimán, kuám ó kuól kú Ɔkɔ́n. Ónuyoósín aná eŋelípuólí pílimbenée ɛ́ɛ́ kúúsí óómo masamɔ́ kuák ó niok na níkutúan ne níkusúkin. 8Panɔ́ kákáánɔ́ énupílimbe núpílúndanɛn kɔ́ ɔtɛ́m, á kiákí ɛ́ɛ́ kuól kú Ɔkɔ́n kanyɛ mekúyekúye. 9Paandimán nutipítɛtɛ́ɛ panɔúɛ na panúɛ katinɛ́ɛ Támbák óónyínúsóósosi, á kiákí ɛ́ɛ́ esúmbí pisɛn kanyɛ mekúye. 10Ó pusíó pú muyu, ne kuésepenyi, ɔ́nukɔ́l pulinsí paandimán é peémímekélíe pámaákálá ɛ́ɛ́ kisiɛ́n kí Ɔkɔ́n. 11Tuékeekenyi ilúndɛ ɛ́ɛ́ pɛɛnd epí péésepenyée; Numɔɔ́p kiluúme kí Sɔ́ɔp úmepílimbit nuémenyen epú Ɔkɔ́n meékí wɔ á kuamaná á kiákí ɛ́ɛ́ Ɔkɔ́n nyɛ peseé owóónón nɛ niɛ́nɔsúkɛ. 12Kisíósíó paandimán nutipílian tɛ á kinɔn kí mɛnɛ́mɛnɛ́ɛ tɛ á kinɔn kí kúúsí tɛ á puandá púmoti: ɛ́nyɛɛlɛ́ iŋátápɛ́n i Kisíósíó pá iŋátapɛ́n, kusáŋɔn kúánɔ́ pá kusáŋɔn, á kiákí ɛ́ɛ́ nutikɔɔ́n kí isɔ́ɔ́sɔ í Támbák. 13Índɛ waakúánɔ́ káánɔ́ ke embul ɔ́ɔ́kɔɔ́pikɔn, ɛ́nyɛɛlɛ́ úpísókolonyi. Índɛ unyɛ ká anyamɔ́ ɛ́nyɛɛlɛ́ utɔ́ŋɔn Támbákɛ́ɛ pilɛ́l. 14Índɛ waakúánɔ́ káánɔ́ ke embul áápítáyan ɛ́nyɛɛlɛ́ úpílikɛn posíósíó pá kitamb pópísókolonyi kɛ́ɛ́yɛ́ ó pusíó, akáánɛ́ ɛ́ɛ́ pémékúkúlít wɔ́ kisɛŋ ɛ́ɛ́ kisiɛ́n kí Ɔkɔ́n. 15Imbísókólí á kuátap nɛkɛtɛ́ɛ, keéŋuki ewú upítáyanɛ́ɛ, Ɔkɔ́n éetukenyi wɔ, índɛ unyɛ ɛŋɛlɛ́ pifal pikapá piyapán. 16Ánupípalán pifal píánɔ́ panúɛ na panúɛ nuond nupísókolonyi panúɛ na panúɛ, ɛ́ɛ́ núéŋuk. Imbísókólí í mɔɔnd u indɛ́ndɛ́nɛ áápian pukaaka puólílóoli. 17Ilias mapá mɔɔnd ɛlɛɛ́ pasúɛ. Woopísókolonyi ní imbekí kitikit ɛ́ɛ́ nupɔ́l tikuá e kúúsí, nupɔ́l tɛ ɛ́ɛ́ núkua tuɔŋ tútátɔ́ no siólí ítindátɔ́. 18É kélém akáánɛ́ woopísókoliti andíkɛ́k, nupɔ́l núakua kúúsí kúókoómo masamɔ́. 19Paandimán índɛ waakúánɔ́ siapɔmb kaáyɛ́ɛ ne kémuémue énutényíkényí wɔ kí iŋilí. 20Énumenyi ɛ́ɛ́: Ewú usiétényikenyi afalfál ɔ́ kilɔk kí iŋilí waánípá á kɛ́ɛ, ɔ́ɔ́nyɔ́ɔk wɔ́ é niku, ó pusíó pú kuɛlɛ yá anakáánɛ́ Támbák áányíyapinanɛ́ wɔ́ á pifal piim pínyɛɛ́ kutek.
Currently Selected:
Isáak 5: yav
Highlight
Copy
Compare
Share
Want to have your highlights saved across all your devices? Sign up or sign in
© 2026, CABTAL