Isáak 1
1
Imbíkélie
1Niŋúɛ Sáakɛ eŋelípuólí u Támbák nɛɛyi nɔ Ɔkɔ́n Yésus Kilíis. Imépíkélítí esíp#1.1 Ekuli yi isiyaɛl yamapa ata na andɛ. yá Támbák yɛ́nyiɛ́ áát na áandɛ́ yasálámándán e kúúsí kitikit. 2Paandimán ánuátápán ká anyamɔ́ kisikɛl ekí nutápukanɛ́ɛ ɔ́ muɔ́pítíní á tunamɛ́ɛ á tunamɛ́ɛ. 3Nuemenyen peseé ɛ́ɛ́, índɛ kuátap kúánɔ́ nyɛ kupílúndánɛ́n ɔ́ yɔɔ́pítɛ́n, yɔɔ́pítɛ́n ikáánɛ́ éépíéne kuésepenye. 4Púókóówon ɛ́ɛ́ núésepenyi kuám á nukamá, akáánɛ́ nuányíkúninanɛ́ɛ á kuátap, andíkɛ́k nutiényisemén puandá. 5Índɛ káánɔ́ kɔ́ ɔlɔŋ, omotí tipá na tutátɔ́, ɛ́nyɛɛlɛ́ wóówun Tambákɛ́ɛ, ukeeki wɔ́, wɔ́ weekenyée sɛ́kísɛ́kí á mɔɔnd kitikit kati kupɛnɛ. 6Maná ɛ́nyɛɛlɛ́ wóówon no pipíóndínyí ɔtɛ́m kati kuák imfɛ́lúɛ; á kiákí ɛ́ɛ́ mɔɔnd waákanɛ́ɛ imfɛ́lú nyɛ ɛlɛɛ́ emfúnu wéétukenyenyée moomb á mááŋ piáyí piim. 7Nunamá nú mɔɔnd nukáánɛ́ tipítááká ɛ́ɛ́ núnyɛ kutáŋap puandá púólinonée ku Ɔkɔ́n, 8á kiákí ɛ́ɛ núnyíɛ nunamá nú mɔɔnd nútamatamɛ́ɛ nútiányípá númenyen iŋilí núkɔ́lɔnɛ́ɛ.
Nɔ ɔsúkɔsukɔ ni inɛm
9Eŋétépí ewú unyɛɛ́ kɔ́ ɔsúkɔ pá ká anyamɔ́ á kiákí Támbák áányínyálɛk wɔ. 10Eŋétépi unyɛɛ́ ínɛ́m pá ká anyamɔ́ á kiákí Támbák éényíseli wɔ, á kiákí ɛ́ɛ́ waanyikua ɛlɛɛ́ kisɛl kiiyɔ́ɔ́yítɔ́n kí putíɛ́púlɛ́ɛ. 11Á kiákí ɛ́ɛ́ ɔɔ́nyí áákaatúkán, na kupál kitikit úpiki kikúnakúna, kisɛl yɔ́ɔ́yitɛn, kíkua kupɔ́t kúɛ́yɛ́ sákɛn; nuɛ́tɛ nunamá inɛ́m i mɔɔnd áányísákinanɛ́ kɛ́ɛ́yɛ́ á masɔ́m.
Kusɔ́t kúólinonée ɔ́ yɔɔ́pítɛ́n
12Peseé na mɔɔnd ewú weésepenyenyée yɔɔ́pítɛn, á kiáki ɛ́ɛ́ é kélém kú yɔɔ́pítɛ́n ukatáŋap indany i kusɔ́t eyí Támbák maátánɛ́n epé pɔ́ɔ́yɔnɛ́ɛ wɔ. 13Tɛ mɔɔnd kisikɛl ekí unyɛɛ́ ɔ́ yɔɔ́pítɛ́n utiɔyɛ́t ɛ́ɛ́; «yɔɔ́pítɛ́ni yáámɛ óókoólínon kú Támbákɛ́ɛ.» Á kiákí ɛ́ɛ́ Támbák tipá ukupia imbítáákítɛ́n i kuɛl kilɔk, andíkɛ́k Támbák tipá wɔɔ́pítɔn mɔɔnd. 14Mɔɔnd kitikit áápian imbítáákítɛ́n sí kilɔk aká pilɔ́ɔ́ŋɛ́t píɛ́yɛ́ túmanɛ́ɛ wɔ, ukɔn á pɛ́ɛ wɛɛl kilɔk. 15Kisikɛl ekí pilɔ́ɔ́ŋɛ́t pikáánɛ́ mányiluá iŋaŋá, píépíéne kifal, kí nakukúnɛn kípíen nikú. 16Paandimán páámɛ pí iŋɔyɔ, nutiandá apínan. 17Tupoo tú peseé kitikit ne pitéésie pí Támbák óókoólínon mɛnɛ́mɛnɛ́ɛ, móókoólinon ku Támbák elúŋí pisie pí mɛnɛ́mɛnɛ́ɛ, Támbák tipá uséndesi, kuɛyɛ́ kipueŋitenye tipá, melíndie tipá. 18Támbákɛ́ɛ kɛ́ɛ́yɛ́ kí imbítáákítɛ́n, matúfá kusɔ́t á nukál núɛ́yɛ́ nú kémuémue ɛ́ɛ́ tupá pákutúan kɛ́ɛ́yɛ́ á piluŋaluŋa kitikit.
Kupítɔ́likɔn no kuwóónyi nukal
19Paandimán páámɛ pí iŋɔyɔ énumenyí peseé ne peseé, ánupá mekúye ɔ́ kupítɔ́likɔn, maná kaáyɛ́ á kukálɛt nɔ kuɔ́p kutɛɛ. 20Á kiákí ɛ́ɛ́ ilópi í mɔɔnd tipá i wóónyosi indɛ́ndɛ́nɛ i Támbák. 21Tɛ ɔ́ɔ́kɔɔ́pɔn inúɔ́yɔnɛ́ɛ ɛ́ɛ́ núpílɛŋunɛ epú púnúnyúkusenée, ne epú púnúéyesíé pefílefile, ánupákɔ́n nukál nú Támbák nuyɛɛ́ nukúnán káánɔ́ kí itɛ́m ne kupíseli, á kiákí ɛ́ɛ́ núápian pukaaka pú kunúfa kusɔ́t. 22Nutipítɔ́líkɔ́n kupítɔ́likɔn nukál nú Támbák, maná ɛ́nuɛlɛ́ epú núnúɔ́yɔnɛ́ɛ kati nɛ́ɛ nuépípúle panɔ́ muɛ́t. 23Á kiákí ɛ́ɛ́ mɔɔnd ewú upítɔ́likɔnɛ́ɛ nukál nú Támbák kati kuák nú é meelínyée nyɛ imfúényée ɛlɛɛ́ mɔɔnd upíyoosoné ɛ́ kiɛ́nɛ upíɛ́nɛn yá aná unyɛɛ́. 24É kélém kú kupíyooson uyɔɔk upíeliti aná úmɛ́nyipíɛ́n. 25Maná ewú upíónyonyée kikotí kí Támbák peseé ke peseé kiékenée weéŋelí woond upínááfan kɛ́ɛ, upílétileti kɛ́ɛ, waák kɛ́ɛ ɔ́ niɔlɔ́, ukáánɛ́ áányípá é peseé á puandá kitikit wɛɛ́nyɛ́ɛ́lɛnɛ́ɛ. 26Índɛ mɔɔnd ɛ́píɛ́nɛn kiták kí eŋétépí, kati ɛ́ɛ́ umɛɛ́tíkɛ́n kilémbi kíɛ́yɛ́, weépípúle wɔ́ muɛ́t kuátap kúɛ́yɛ́ nyɛ sɛ́kísɛ́kí. 27Índɛ́ kuátap kati kipalalɛ́ɛ ekue Támbákɛ́ɛ Síí áákanɛ́ɛ ɔ́ niɔlɔ́: kukɔ́lɔn niap ni insé, ne pisíkí kɔ́ɔ́p é muyu, kupítɛ́ŋɔn kilɔk kinyɛɛ́ e kúúsí ekue ɛ́ɛ́ atikɔɔ́n é kupínyúkuse.
Currently Selected:
Isáak 1: yav
Highlight
Copy
Compare
Share
Want to have your highlights saved across all your devices? Sign up or sign in
© 2026, CABTAL