Kalát 6
6
Kupínɛ́ɛ́kinɛn pasúɛ na pasúɛ
1Paandimán, índɛ nusiokóóki waakúánɔ́ wɛɛlɛ epú púnyɛɛ́ kilɔk, panɔ́ nupianɛ́ɛ kiliínditíe kí Támbák, nuɛ́kɛɛsikɛnɛnɛɛ́ ɛ́ɛ́ nusúŋa wɔ, nɔ ɔtɛ́m owoókón; aŋú muɛt apíkííka ɛ́ɛ́ atikɔɔn ɛ́ɛ́ puɛ́tɛ putámb púmoómí. 2Índɛ andimán ááwɔ nyɛ é muyu, áákɛ́n wɔ́ ɔmbɔk, pítúúkɛ́n muyu mukáánɛ́ nɛɛyɛ́; anakáánɛ́ omówóónyí kikotí kí Kilíis. 3Á kiákí ɛ́ɛ́ índɛ mɔɔnd áápítááka ɛ́ɛ́ wúú unyɛ kiandákáand kí mɔɔnd, wúú kɔk sɛ́kísɛ́kíɛ u puandá, weépípúle wɔ́ muɛ́t. 4Ɛ́nyɛɛ́ siki mɔɔndɛ yoosinon yá kɛ́ɛ́yɛ́ é meelíe; índɛ mányɛ maatámb, ɛ́nyɛɛ́ mápá maatámb kɛ́ɛ́yɛ́ ó pusíó wééŋényí, kútiɛl ɛ́ɛ́ ó pusíó ɛ́ɛ́ weéketesi meelíe mɛ́ɛ́yɛ́ ɔ́ mɔ́ sɔ́k. 5Á kiákí ɛ́ɛ́ puandá puum mɔɔnd ɛ́ɛ́lɛnɛ́ɛ óóyooson wɔ. 6Ewú póónyonyée wɔ Nukál nú Támbák ɛ́ɛ́kɛɛsikɛnɛn ɛ́ɛ́, á puandá puum pú peseé usiápia, weeki ewú woónyonyée wɔ níɛ́yɛ́ niap. 7Mɔɔnd tinúpúlít: atipá kuɔnɛt Támbákɛ́ɛ; á kiákí ɛ́ɛ́ epú mɔɔnd mányinyimɛ́, púú wookonée. 8Ewú unyimanɛ́ eme kusɔ́t kúɛ́yɛ́ kú insúá ɔ́ɔ́yɔɔnɛ́ɛ óókooko yá epú kusɔ́t kú insúá óómonée: niku. Ewú unyimanɛ́ɛ emé Emfúnukufúúmɛ ɔ́ɔ́yɔɔnɛ́ɛ óókooko yá emé Emfúnukufúúmɛ óómonée: kusɔ́t kú teeníík. 9Tutiánd kuɛlɛ peseé; á kiákí ɛ́ɛ́ índɛ tusiɛl tutiotó imbɔk, tuónyóok maandá maatámb puɔ́s Támbák ɔ́ɔ́nyɔ́ɔ́yɔnɛ́ɛ. 10Tuɛl tumanyi na kisikɛl, ɛ́nyɛɛ́ túkɔtɔ ó pusíó pú peseé u pɛɛnd peem, sol sol peétépí pe Yésus Kilís.
Insúŋɛ sí kusúkin no kukóndi
11Ónuyoósin pinɔ́m pí imfíɔ́ŋ esie, yɔɔ́núɔ́ŋɔ́n sɛ́ɛ nɔ ɔmbɔk wáámɛ ú pímuɛ́t! 12Pɛɛnd páambanɛ́ɛ kuwóónyosi epú púɛlɛnɛ́ɛ pɛɛnd pé kúúsí peseé, pɔ́ pánúkútanɛ́ɛ na puansá. Páákaamba kɔ́ɔ́m ɛ́ɛ́ pɛ́písɛ́mb muyú múnyɛɛ́ é nikú ní Kilíis ó kolóse. 13Pɛɛ́tɛ pakáánɛ́ pɛnyɛɛ́ pansán, pɔ́ muɛt tipá pówóónyosi pikotí pí Moyíis piim, tɛ anakáánɛ́, pákaamba ɛ́ɛ́ núpíánsa, pɔ́kɔ́lɔn nuúmu ɛ́ɛ́ numɔ́ɔ́ŋɔ́ kɔ́ɔ́p kí iŋilí. 14Káámɛ ó pusíó kolóse u Ɔkɔ́n waasɔ́ Yésus Kilíis wéeŋényi unyɛɛ́ núámɛ nuúmu; nikú níɛ́yɛ́ ó kolóse níɛlɛnɛ́ɛ ɛ́ɛ́ yɛ́ɛ́nɛn maandá me kúúsí asɛ meekúén, yá aná mɔ́ kɔ́kɔ́ɔ́p mííŋɛ́nɛnɛ́ɛ asɛ kiku. 15Á kiákí ɛ́ɛ́ tɛ anyɛ aŋasán, tɛ ɛtiɛl aŋasán Támbák tipá uyooson pukáánɛ́; kúpá kiluŋaluŋa kiikɔ́s, kú kúnyɛɛ́ puandá kɛ́ɛ́yɛ́ ke eŋis. 16Epé pɔ́ɔ́pɔninɛ́ɛ Támbákɛ́ɛ, ɛ́nyɛɛ́ Támbák eeki pɔ́ kiyeéwe nɛ niɛ́nɔsɔ́k níɛ́yɛ́, andíkɛ́k ne nikúli kitikit níɛ́yɛ́. 17Kutúm ninuan, mɔɔnd tiandá kundiokoliti ɔtɛ́m; á kiákí ɛ́ɛ́ pitúlie pínyɛɛ́ káámɛ ɔ́ nuɔ́l éétíínyenyi ɛ́ɛ́ yɔɔ́kɔɔ́pɔnɛn Yésuse. 18Paandimán, ɛ́nyɛɛ́ Ɔkɔ́n waasɔ́ Yésus Kilíis nupinúun kɛ́ɛ́yɛ́ kɔ́ ɔtɛ́m peseé. Anakáánɛ́.
Currently Selected:
Kalát 6: yav
Highlight
Copy
Compare
Share
Want to have your highlights saved across all your devices? Sign up or sign in
© 2026, CABTAL