Kalát 5
5
Yésus átuáŋúna
1Kilíis metutúkún ɔ́ puɔ́lí ɛ́ɛ́ túpá weéŋelí. Ánupílúndɛn, nutipíyapá ɛ́ɛ́ mɔɔnd áand onuóndi ɔ́ puɔ́lí. 2Iŋúɛ Póole, yɛɛ́pí káánɔ́ ɛ́ɛ́: índɛ nusiátap puansá, Kilíis tíákandá apá puandá káánɔ́ ó pusíó. 3Imóndítónyi, mɔɔnd kitikit úmányipíánsá ɛ́ɛ́kɛɛsikɛnɛn kuwóónyosi pikotí piim, tɛ kukua kímoómí. 4Panɔ́ nuambanɛ́ɛ ɛ́ɛ́ núpá indɛ́ndɛ́nɛ ke eŋis yá Támbák ó pikotí mápiatɔn ne Kilíis, numópíóm imɛmɔ́ i Támbák. 5Á pasɔ́ epé tuátapanɛ́ɛ, tuópíóndonyi itɛ́m, á pukaaka pú Emfunkufuúmɛ ɛ́ɛ́ Támbák katúyɔ́ɔ́n asɛ pɛɛnd pí indɛ́ndɛ́nɛ ó pusíó ɛ́ɛ́ tuákaátapan. 6Á kiákí ɛ́ɛ́, á mɔɔnd waátapanɛ́ɛ Yésus Kilíise, Támbák tipá uyooson índɛ unyɛ aŋansán kúnyáánɛ utipá aŋansán; epú púnyɛɛ́ peseé ke éŋis yá Támbák nyɛ kuátap kúɛ́ndɛnɛ́ɛ ɔlɔŋ ni iŋɔyɔ. 7Nuápá nuwóónyosi aná kúɛsikɛɛnɛnɛ́ɛ emé Támbák ɔ́ɔ́yɔɔnɛ́ɛ; ɛ́nyɛ́ wáányínúkɛ́mb iŋilí ɛ́ɛ́ nutiandá kuɔŋ é kémuémue é? 8Kuɛl kukáánɛ́ tipá kúólonin ku Támbák unúpílanɛ́ɛ. 9#5.9 Kilɔk kí iŋónyítónyí tɛ kiípa puketi enenesi ɔlɔŋ kitikit.Nutipá numenyeneé muɔ́nɔ́ u kinyútukie ééméketesi ekuŋ á? 10Ɔkɔ́n ɛ́ɛ́kɛlɛɛ́ imbíóndonyi ɔtɛ́m káánɔ́: yaápitááka ɛ́ɛ́ naamɛ naanɔ́ tunyɛ ekelú. Ewú unúpueŋenyée, tɛ upá ɛ́nyɛ́ɛ, Támbák keséésitenyi wɔ. 11Paandimán, kusíákápá ɛ́ɛ́ yɔɔ́kɔɔ́yɔn pɛɛnd ɛ́ɛ́ pɛ́ɛ́kɛɛsikɛnɛn kupíánsa, ó pusíó pú kiákí pémeékiŋenesie iŋɛ́n? Akáánɛ́ nikú ní Kilíis ó kolóse tíákandá epueŋitenyi mɔɔnd. 12Ɛ́nyɛɛ́ pɛɛnd pénúpueŋenyée tisúk kí íŋili, ínsi pɔ́píɔ́punɔ kiɔpɔ́ nuɔ́l kitikit. 13Paandimán, panɔ́, Támbák nyɛ anúpílán é weéŋelí. Weéŋelí ukáánɛ́ tiɛ́yí kinɔn kínyɛɛ́, ɛ́ nuand kuond ɔ́ kusɔ́t kú imbá insúɛ! Ɔ́nuɔyɔ́nɛ́n, ɔnuɔkɔ́nɛ́n panúɛ na panúɛ. 14Á kiákí ɛ́ɛ́ nukál tíŋ númoómí enue óówóonyosi pikotí piim: Ɔyɔ́ sɔ́k mɔɔndɛ yá aná ɔpíɔ́yɔnɛ́ɛ aŋú muɛt. 15Maná índɛ nusiond ɛ́ɛ́ núsíkaanɛn, nuónd núnyáánɛn, ɔ́nukɔ́lɔ́n iŋuɛl, katɛ nɔ nukɔɔ́ninɔn panúɛ na panúɛ.
Puólí pú Emfúnukufúúmɛ
16Kúúkɔ́ inúɔ́yɔnɛ́ɛ ɛ́ɛ́: ánuyapá Emfúnukufúúmɛ núendesi, nutiákandá kuɛlɛ maándá mɔ kusɔ́t ku insúá. 17Á kiákí ɛ́ɛ́ kusɔ́t kú insúá tipá ekelú ne Emfúnukufúúmɛ, Emfúnukufúúmɛ kɛ́kɛ́ɛ́yɛ́ tipá ekelú nɔ kusɔ́t kú insúá; pányɛ asɛ yiik no moomb, péépekenyipekenyi ɛ́ɛ́ nutiɛlɛ́ epú nuɔyɔnɛ́ɛ. 18Índɛ Emfúnukufúúmɛ únúendesíe, nutikapá á kipia kí pikotí pí Moyíis. 19Tuémenyen maandá mɔ́ kilɔk imbá insúɛ pílɔ́ɔ́ŋɔnɛ́ɛ, púnyɛ: ɛŋɛnd ú musɔm, piyepú, kusɔ́t kú puɛndɛndɛ, 20kuekenyi pifɛ́lɛfɛ́lɛ nuúmu, maanyɛ́, ifɛmɔ́, pitul, yaák, meliŋí, kipísala, kiátuna, yaákinakina, 21kilɔ́ɔ́ŋɛt, kuótukon makɛp, ɔtɛ́m na maandá molotí mɛ́ wɛɛ́tɛ ɔlɔŋ; yaámaná ɔnúɔ́yitɛn, énumenyi ɛ́ɛ́ pɛɛnd pɛ́ɛ́lɛnɛ́ maandá makáánɛ́ tiápia ninyɔ́l é pufuŋ pú Támbák. 22Pusámɔ́ Emfúnukufúúmɛ óómonée nyɛ: iŋɔyɔ, iyayɔ́, kiyeéwe, ɔtɛ́m útiányípá kundukund, ɔtɛ́m peseé, makánákana, kuátap, 23kumán ɔtɛ́m, kiyeéwe; kupimɛmɛ pikotí tipápúkányan na makáánɛ maandá. 24Epé pɔ́ɔ́pɔninɛ́ɛ Yésus Kilíise nyɛ pɔtɔɔ́ndɔ́n imbá insúɛ yɔɔpɔ́ ó kolóse, ne meelíe mɔ́ɔ́p mɔ́ kilɔk nɔ pilɔ́ɔ́ŋɛ́t. 25Índɛ tuɔ́sɔ́tɔn á pukaaka pú Emfúnukufúúmɛ, ɛnyɛɛ́ tuyap Emfúnukufúúmɛ túendesi 26Tutipíɔ́yɔ́n pɔsɔ́k: tutitɔ́kɔnɛn pasúɛ na pasúɛ, mɔɔnd tipíséémitenyi wɔɔkúɔ́p.
Currently Selected:
Kalát 5: yav
Highlight
Copy
Compare
Share
Want to have your highlights saved across all your devices? Sign up or sign in
© 2026, CABTAL