Kalát 3
3
Iŋowunin í Póol
1Ɛɛɛ́! Panɔ́ píeku pí Kalát, nutipá ne meéne á, ɛ́nyɛ́ wéényínúnení iŋilí, panɔ́ epé pémeétíínyényí peseéképese Yésus Kilíise ewú pɔ́mɔɔ́tɔɔ́ndɔ́n ó kolóse? 2Yaákaamba kɔ́ɔ́m ɛ́ɛ́ núóndinyi kí iŋówunín imoómí eye: Támbák menúéki Emfúnukufúúmɛ ó pusíó ɛ́ɛ́ numɔpítɔ́líkɔ́n insɔ́m yi indámb no pipíóndínyí ɔtɛ́m éé, numowóónyósí pikotí pi Moyíis? 3Tiɛkíɛ́ nunyɛɛ́ ɛlɛɛ́ pieku pítiányípá ne meéne é? Nunyɛ petúmén kusɔ́t kuukɔ́si na pukaaka pú Emfunkufuúmɛ, nuasimaná kuɔ na pukaaka púánɔ́ pú pí muɛt á? 4Maandá kitikit Támbák ɛ́ɛ́nyɛ́ɛ́lɛ́ káánɔ́ ɔ́ kusɔ́t nuɛ́nɛn, púápá ɛ́ɛ́ sɛ́kisɛ́k á? Pútipá pukupa ɛ́ɛ́ sɛ́kísɛ́k. 5Támbák áánúfáan Emfúnukufuúmɛ woond wɛɛlɛ pisey káánɔ ɛ́ kikɛtɛ́kɛtɛ́ɛ, wɛɛ́kɛlɛ nɔ ó pusíó ɛ́ɛ́ nuówóónyosi pikotí éé, kúnyáánɛ nuákaátapan Támbákɛ́ɛ nɔ ɔtɛ́m wáánɔ́ wuum? 6Yá aná Ápilaháam maák pipíóndínyí ɔtɛ́m píɛ́yɛ́ á Támbák, Támbákɛ́ɛ wɔɔkɔl wɔ anɛ indɛ́ndɛnɛ i mɔɔnd. 7Nuɛ́kɛɛsikɛnɛn kɔk kumenyi ɛ́ɛ́: peétépí pe Yésus, pɔ pɛ́nyɛɛ́ imbána paán pa Ápilaháam. 8Púnyɛ puɔ́ŋɔ́ á Nukál nú Támbákɛ́ɛ tɔɔm kɔ́ tɔɔm Támbák mɔɔ́yɛ́t ɛ́ɛ́ wɛɛ́nyɛ́ɛl ɛ́ɛ́ pá kati Pɛyúútɛnɛ ɛ́ɛ́yi paán pí indɛ́ndɛ́nɛ kɛ́ɛ́yɛ́ ke eŋis kɔ́ɔ́p á kuátap. Kúúkɔ́ Támbák mɔɔ́yítɛ́n Ápilaháamɛ kisikɛl manyi, kiták kí niɔy ekie: «Yeényípínúúné Punya pitɔŋɛ piim pi kúúsí kuum kááwɔ ɛ́ kisiɛ́n.» 9Ápilaháamɛ waák pipíóndínyí ɔtɛ́m píɛ́yɛ́ á Támbák, Támbákɛ́ɛ weepínúun wɔ; kúúkɔ́ peem epé páátapanɛ́ɛ, Támbák éépínúúne pɔ niaŋ ni Ápilaháam. 10Pɛɛnd pópíóndonyée ɔtɛ́m ó kuwóónyosi pikotí nyɛ pɔnyɔmɔ́n; Ó pusíó ɛ́ɛ́ púnyɛ puɔ́ŋɔ́ ɛ́ɛ́: «Ewú utiányípá uwóónyosi kisikɛl kitikit puum púnyɛɛ́ á kálatɛ u pikotí pi Moyíis pa ɔnyɔmɔ́n.» 11Kúúkɔ́ púnyɛɛ́ kémuémue ɛ́ɛ́, tɛ mɔɔnd utipá pakupá indɛ́ndɛnɛ ke eŋis ya Támbák ó pusíó ɛ́ɛ́ woówóónyosi pikotí, aná púnyɛɛ́ puɔ́ŋɔ́ ɛ́ɛ́: mɔɔnd unyɛɛ́ indɛ́ndɛnɛ ke eŋis ya Támbák, ó pusíó ɛ́ɛ́ Támbák nyɛ pipíóndínyí ɔtɛ́m píɛ́yɛ́, ɔ́ɔ́nyísɔt. 12Maná kunɛkɛn pikotí no pipíóndínyí ɔtɛ́m tipá pɛ́ɛ́ndɛ embul; á kiákí ɛ́ɛ́, púnyɛ kɛ́k puɔ́ŋɔ́ á kiáyí kí pikotí ɛ́ɛ́ ewú uwóónyosíé pikotí piim, tɛ kukua kímoómí, ɔ́ɔ́nyísɔ́tɔnɛn kɛ́ɛ́yɛ́ é meelíe. 13Kúúkɔ́, Kilíis maátap inséésítényí káásɔ ó pusíó ɛ́ɛ́ utúáŋɔn kí nyɔmɔ yoóloninée káásɔ́ á kati kuwóónyosi pikotíe; inséésítényí mɛɛlɛ́ ikuanɛn wɔ, Támbákɛ́ɛ waatútɔ́ɔn inyɔmɔ yaasɔ́, waatúúkɛn Kilíise; Ó pusíó ɛ́ɛ́ púnyɛ puɔ́ŋɔ́ ɛ́ɛ́: «Mɔɔnd pámaátɔ́ŋ wɔ́ á putɛ́ nyɛ ɔnyɔmɔ́n.» 14Yésus Kilíis mɛɛ́l nɔ ɛ́ɛ́ pá kati Pɛyúútɛnɛ pányáátapɛ́ɛ pia kɔ́kɔ́ɔ́p maandá kitikit me peseé Tambák maákɛ́n Ápilaháamɛ indan ɛ́ɛ́ weényéeki wɔ, túond túpia anakáánɛ́, ó pipíóndínyí ɔtɛ́m, Emfúnukufúúmɛ Támbák maák índan ɛ́ɛ́ weényéeki.
No kikotí ni índan
15Paandimán páámɛ, ɛnyɛɛ́ tukɔl pulinsí é meelié maasɔ mɛ́ pɛɛnd pé kúúsí: aká mɔɔnd mányimaná apítiánɛn peseé ne peseé, mɔɔnd olotí tipá pékuséndi muɔ́nɔ́ u puandá kɔ́ɔk, kúnyáánɛ wɛɛ́l ɛ́ɛ́ imbítíínɛ ikáánɛ́ tipíwóónyi. 16Índɛ kɔk ɛ́ɛ́ Ápilaháamɛ Támbák maákɛn wɔ indán i maandá maatámb, wɔ́ ne ewú ukeényípípíen kɛ́ɛ́yɛ́: Nukál nú Támbák tipá nuɔyɔ ɛ́ɛ́ «é meeyin ma Ápilaháam kitikit», manyɛ á mɔɔnd tíŋ omoómí unyɛɛ́ Kilíise. 17Epú yaambanɛ́ɛ kuɔyɛt púnyɛ ɛ́ɛ́: Támbákɛ́ɛ waapítɛ́ɛn Apilahamɛ aná kúɛsikɛnɛnɛ́ɛ. Pikotí pi Moyíis pímaasíám tuɔŋ ímbak íni nɔ tuɔŋ nitin na túát é kélém kuɛ́yɛ tipá pékunyúkusit imbítíínɛ ikáánɛ́, yoond ikányi ni indan. 18Índɛ kɔk kuwóónyosi pikotí kúɛ́lɛnɛ́ɛ ɛ́ɛ́ túpia maándá maatámb akaánɛ kɔk pútikápá kí indan. Maná kɔk ni indan Támbák mɛɛ́l Ápilaháamɛ peseé. 19Kayi púólíe pikotí moól ɛ́ kuɛsiɛlɛ́? Pikotí moól ɛ́ɛ́ pítíínyi pɛɛnd ɛ́ɛ́ pányɛ pakuán, kuám aná meeyin ma Ápilaháam Támbák maákɛ́n mɔ indan áányáasiámánɛ́ɛ. Peéŋele pómoól no pikotí, páátápukɛn á mɔɔnd omoómí, umɛɛ́yí kinɔn,Moyíise. 20Púákaamba kinɔn kisikɛl piáyí nyɛɛ́ píandɛ́; maná, Támbák nyɛ weéŋényí, utipa waamba kinɔn. 21Anakaánɛ́ kúnyɛɛ́ ɛ́ɛ́ pikotí éenuenesi indán i Támbák a? Aákóo, tɛ pukéti. Támbák sɔ́tɔ weeki pikotí písíápáánɛ kueki mɔɔnd kusɔ́t kú teeníík, tusíɛl ɛ́ɛ́ kémuémue mɔɔnd nyɛ pákupá indɛ́ndɛnɛ ke eŋis ya Támbák índɛ woówóónyosi pikotí. 22Nukál nú Támbák ɔ́ɔ́kɔɔyɔ ɛ́ɛ́: «pɛɛnd pe kúúsí peem nyɛ piɔ́lí pí kifal», ɛ́ɛ́ Támbák éeki peétépí epú umaák indán á puɔ, kɔ́ɔ́p ó pipíóndínyí ɔtɛ́m é Yésus Kilíis. 23Pipíóndínyí ɔtɛ́m é Yésus mɛɛlɛ́ pimanyi pítiasíám, pikotí mapá pitúfɛɛ́línɛ́n, pítúkííka á pimbɔk, kuám puɔ́s epú Támbák maátúpalunɛn pipíóndínyí ɔtɛ́m é Yésus Kilíis. 24Anakaánɛ́ kúnyɛɛ́ ɛ́ɛ́ pikotí mápa ɛlɛɛ́ ekíík waasɔ́ kuám aná Kilíis moól, ɛ́ɛ́ túpá indɛ́ndɛnɛ ké eŋis ya Támbák káásɔ́ ó pipíóndínyí ɔtɛ́m é Yésus. 25Pipíóndínyí ɔtɛ́m é Yésus mɛɛlɛ́ píasiaman, puólí pú ekíík ukáánɛ́ púáman, tutikapá kɛ́ɛ́yɛ́ á kipia. 26Á kiákí ɛ́ɛ́ káánɔ́ ó pipíóndínyí ɔtɛ́m é Kilíis Yésus, nunyɛ paán pa Támbák. 27Panɔ́ peem péényínútuénén ó moomb ɛ́ kisiɛ́n kí Kilíis, nuapílat ne Kilíis nuond nuɛpílɛŋ wɔ. 28Pátikápá páand kueye ɛ́ɛ́ eŋétépí u Yúútɛn ewe, eŋétépí utiányípá Yúútɛn ewe, kiɔ́lí ekie ewe tipá kiɔ́lí; ɛnúmɛndɔ́ ewe akáandɔ́ ewe; Ɛ́ kuɛ́nyɛl ɛ́ɛ́ é Yésus Kilíis panɔ́ peem nunyɛ púmoómíe. 29Panɔ́ nukanyɛɛ́ pé Kilíis nunyɛ meeyín má Ápilaháam; nukanyi na niap á maándá maatámb Támbák maákɛn pɔ́ indán ɛ́ɛ́ weényéeki pɔ.
Currently Selected:
Kalát 3: yav
Highlight
Copy
Compare
Share
Want to have your highlights saved across all your devices? Sign up or sign in
© 2026, CABTAL