Kalát 1
1
Ímbikélie
1Iŋúɛ Póole yɔɔ́ŋɔnɛ́ɛ ɔmbɔp ewe, inyɛ etúmí, pútipá ɔ́ kuɔyɛt kú pɛɛnd, tɛ ɔ́ kuɔyɛt kú mɔɔnd, maná ɔ́ kuɔyɛt kú Yésus Kilíis nɛɛyɛ́ na Támbák, Táátɛ́ɛ umeényí wɔ á pilɔ́ŋ. 2Naamɛ na paandimán páámɛ pá kuátap pɛnyɛɛ́ naamɛ akɛ, tuɔ́ŋɔnɛ́ɛ ilɔŋ sí péétépí pé Yésus Kilíis sínyɛɛ́ e kúúsí kú Kalasí. 3Yoópísókolonyi Támbákɛ́ɛ, Síí waasɔ́, nɛɛyɛ́ nɔ Ɔkɔ́n Yésus Kilíis ɛ́ɛ́ pónúpooki póond pénúeki kiyeéwe kɔ́ ɔtɛ́m. 4Ɔkɔ́n Yésus mekú káásɔ á pifal ɛ́ɛ́ utúɔk ɔ́ kilɔk kínyɛɛ́ e kúúsí, ɔ́ kuɔyɛt kú Támbák, unyɛɛ́ Síí waasɔ́. 5Nuúmu pá nɛɛyɛ́ é teeníík ne nííkée! Anakáánɛ́.
Insɔ́m Yi indámb nyɛ táŋ imoómi
6Yeésimile táásɛ aná nunyɛɛ́ petúmén Támbákɛ́ɛ kélém kuɛ́kɛt, ɔ́ kuɔŋ kí insɔ́m yi indámb ilotí; Támbákɛ́ɛ unyɛɛ́ anúpílán kɔ ɔtɛ́m peseé ú Kilíis. 7Kémuémue Insɔ́m Yi indámb ilotí tipá; maná pɛɛnd pólotí nyɛ kɔ́ɔk pénupueŋenyée póond páamba ɛ́ɛ́ insí péménukí insɔ́m yi indámb i Kilíis. 8Tɛ kúpá ɛ́ɛ́, mɔɔnd, tɛ pasuɛ́, punyáánɛ Éŋele u mɛnɛ́mɛnɛ́ɛ sianútían Nsɔ́m Yi ndámb itiányípá puandá púmoómi ne eyí tumaánútían, ɛ́nyɛɛ́ Támbák nyɔm wɔ! 9Tuámaná ɔnúɔ́yitɛn puɔ, imóóndítónyí nínuan: índɛ mɔɔnd sianútían Nsɔ́m Yi indámb itiányípá puandá púmoómi ne eyí numaátáp, ɛ́nyɛɛ́ Támbák nyɔm wɔ! 10Akáánɛ, nuúmu núólinonée ku Támbák kúnyáánɛ ku pɛɛnd yaambanɛ́ɛ a? Akáánɛ́, yaákaamba ɛ́ɛ́ pɛɛnd íŋɔ́pinɔn peseé á? Ínsiákáámba epú puɛ́lɛnɛ́ɛ pɛɛnd peseé, indisiándá apá eŋelípuólí u Kilíis.
Muɔ́nɔ́ u Támbák mééyí Póole etúmí
11Paandimán páámɛ pá kuátap, yɔɔ́núɔ́yɔn kemuémue ɛ́ɛ́: Insɔ́m yi indámb eyí yáányínútían tipá yoólinon á mɔɔnd u kúúsí. 12Pútipá á mɔɔnd insɔ́m yi indámb ikáánɛ maásíŋámɛn, utipá mɔɔnd umiíŋónyítónyí yɛ́ɛ, Yésus Kilíise wɔ́ muɛ́t umiímbálúnɛ́n Insɔ́m Yi indámb ikáánɛ.
13Á kiákí ɛ́ɛ́ nuɔ́p pɔɔ́yɔ meelíe máámɛ aká imaápá imanyi imeépíekenyi ɛ́ nuu Pɛyúútɛnɛ kɔ́ɔ́m. Imapá iyóóŋo na pukaaka é kuénesi ɔlɔŋ ú peétépí pe Yésus Kilíis iŋɛ́n, yaamba ɛ́ɛ́ insí imɛ́sɛ́lɔn wɔ. 14Imapá índááma táásɛ á nuu pataatɛ́ɛ, imfámfa ɛ́ nuu Pɛyúútɛnɛ indápukan puólíkóoli pú paandimán páamɛ pámaápá ipakɛ́ yáámɛ. 15Maná, Támbákɛ́ɛ wuundɔ́pɔn imanyi é nipundí ni íyaá, woond wuumbílikɛn kɛ́ɛ́yɛ́ kɔ́ ɔtɛ́m peseé. 16Umɛɛ́lɛ́ umɛ́ɛn pú peseé, wuuŋɔsunɛn Muɔ́nɔ́ wɛɛyɛ́ ɛ́ɛ́ ímenyi wɔ yóond iŋémen epí kitikit pátiányípá Yúútɛn maayɔ́ maatámb móyoosonée wɔ. Nɔ niɔ́kɔ́tɔ́n, tɛ ɛ́ɛ́ yáambɛt ínsúŋɛ í mɔɔnd 17púnyáánɛ íyɔɔk Yelúsalɛm ɛ́ kuɛ́n pɔsɔ́k Támbák maátúan kutɛ́k pɔ petúmí káámɛ, yaayɔɔk Alapíi; é kélém kúɛ́yɛ́ yoond Tamáas. 18Tuɔŋ tútátɔ́ mɛɛ́l tútápukan, yaayɔɔk Yelúsalɛm ɛ́ɛ́ imenyi Piɛlɛ; yɛɛl metúk punyo nɛɛyɛ́. 19Tɛ ɛ́ɛ́ yɛ́ɛ́n etúmí olotí, ɛsiɛ́ Sáakɛ, andimán Ɔkɔ́n. 20Epú inúɔ́ŋɔnɛ́, imɔ́kɔ́l Támbákɛ́ɛ etétúnyí, pútipá kisupɔ́. 21É kélém kúɛ́yɛ, yaayɔɔk é piénsi pí kúúsí pí Silí ne Silisí. 22Maná Ilɔŋ sí peétépí pé Kilíis pamaápá e kúúsí kú Yuté tímiimenyen. 23Simɔɔ́p kɔ́ɔ́m pɔɔ́yɔ ɛ́ɛ́: «Mɔɔnd úmaápa ínsuá utuénesi iŋɛ́n éékéme kuátap nínúan, kuátap umaápá unuenesi kiɛ́tɛ kisikɛl ɛ́ kusɛ́lɔn kuɔ.» 24Siond sílémbesi Támbákɛ́ɛ káámɛ ó pusíó.
Currently Selected:
Kalát 1: yav
Highlight
Copy
Compare
Share
Want to have your highlights saved across all your devices? Sign up or sign in
© 2026, CABTAL