Efesiɛ́ŋ 4
4
Nipílat ní ɔlɔŋ u peétépí nyɛ é Kilís
1Yaánúsúŋa kɔk niŋúɛ kimbɔk kí Ɔkɔ́n, énunemekenyenyi kusɔ́tu kuánɔ kɔ́mbílíkínín nuányípiá; 2Nuɔ́lú nuselésí ne meliemelie, nekupílimbit, nuésepenyenyi kí iŋɔyɔ panúnapanuɛ. 3Ánupikanikan ɔ́ kulɔpɔn á nipílat ne kiyeéwe kiólinoné ké Emfúnukufúúmɛ. 4Nuɔ́l nyɛ táŋ numoómi, Enfúnukufuúmɛ táŋ omoómí, yáná tunyiɛ́ papílán ó pipióndínyí ɔtɛ́m táŋ pímoómí. 5Ɔkɔ́n omoómí, kuátap kúmoómi, induéne imoómí; 6Támbákɛ́ɛ omoómí sí u mɔɔnd kitikit, upianɛ mɔɔnd kitikit, ukɔtɔnɛ á siki mɔɔnd, unyiɛ á mɔɔnd kitikit. 7Támbák otupoóki, maná Kilíise wɛ́nyífɛkínɛ siki mɔɔnd niɛ́yí niap. 8púnyɛ puɔ́ŋɔ́nɔ́ kí imfiɔŋ ɛ́ɛ́:
«Aká umanyálimitɛ mɛnɛ́mɛnɛ́ɛ kaáyɛ é kietelie, wɛtikɛn iŋol; wopoki pɛɛnd.»
9Waányálimɛt! Puɔ́kɔyɔ ɛ́ɛ́ kiaki? Puétínyenyi ɛ́ɛ́ umandá etúnuku kɔɔm nimbát ke eŋulum e kúúsí. 10Ewú umeétúnúk nyɛ andá ewú umaámákát kaáyɛ́ kukányini insaá nupúlɛ́ ɛ́ uwónyi epú kitikit Támbák maluŋɔ. 11wɔ́ emeékényí pɛɛnd tupoo á tunamɛ á tunamɛ, epe petúmí, epe peémimekélié ma Támbák, pólotí poóyi insɔ́m yí indámb, pólotí andíkɛ́k peékííkí melúk ne péépé póónyonyé, 12ɛ́ kuɛlɛ ɛ́ɛ́ pifúmak pá na pukaaka púkuwónyi pusɔ́m pú kuwáka nuɔ́lo nú Kilíis, 13kuám aná tukaányíipi kuám á nipílat ní kuátap ne kumenyi kú muɔ́nɔ́ u Támbák, ké etényí ú pɛɛnd pɛ ɛsɛ́kúmɛ́n ánunamá nú indɛ́ndɛ́nɛ nú Kilíis. 14Akáanɛ, tutíákandá apá paápayɔ, pátamtamɛ́ ni iŋónyítónyí tɛ sínín Pɛɛnd púmbesié pɔ́ á kipinanɔ nɛ nunɛ́m nuɔ́p. 15Maná, kémé kémuémue kí iŋɔyɔ, akáánɛ́ tuanyi kuman á puandá kitikit kuam ke eteny u Kilíis unyɛ ɛtɔ. 16Kɛɛyi malaaŋ mɔ nuɔ́l kitikit nyɛ embul andíkɛ́k malata. Piluŋɛn táásɛ álata nuɔ́l, aká siki kiénsi kí nuɔ́l ɛ́ɛ́lɛnɛ́ɛ puólí púɛ́yɛ́ aná púɛsikɛnɛnɛ, nuɔ́l ákumam núɛ́ndukɛn kí iŋɔyɔ.
Kusɔ́t kuukɔ́si kú peétépí
17Puúpu inuɔyɔnɛ na pukaaka ɛ́ɛ́ kisiɛ́n kí Ɔkɔ́n: Nutianda ɔsɔtɔn aná pindiatapɛ sɔɔtɔnɛ, imbítáákítɛ́n siɔp yukana nɔɔ́pɔ́ é punyim. 18Imbitakitɛn siɔp nyɛ kí imbíne, panyi peenyi ɔ kuúsɔt ku Támbák, á kiákí kuleme kúɔ́p okolinon kɔ́ɔ́p kí itɛ́m kulal. 19A kati kumenye wɔɔ́pɔ́ pakanyɛ ɔsɔtɔn tɛ tiɛkiɛ, pepiekenyi ɛkuɛlɛ pilɔk pí maandá tɛɛ́ kutumutene. 20Panuɛ, kútipá anakanɛ numopionitonyi Kilíise. 21Indi wu numɔpɔ pakala, póond ponuonyitonyi wɔ, é kémuémue unyɛ é Yésus. 22Nuɛkɛsikɛnɛn kuyapan kusɔ́t kuanu kú insúá, nutume meelíe máánɔ́ minsua mɔ pilɔk pi pitɔndɔ kélém. 23Anupiyap ɛ́ɛ́ enfúnkufuúmɛ nukun imbítáákítɛ́n sian. 24Nuupa, pɛɛnd pɔkɔsikɔsiɛ, indɛ́ndɛ́nɛ na kati kipalala, poolinone é kémuémue, paaluŋa ɔ kilɔ́ɔ́ŋɛ́t kí Támbák. 25Nutipa nuanda epule, siki mɔɔnd wɔɔyɔn wɔkuɔp kémuémue, á kiákí tunyi maalaŋ mo nuɔ́l taaŋ numɔɔ́mi. 26Aká ilópi mɛnyɛtikɛn wɛtɛ, utikɔn á kifal; ilópi yɛyi seéle kisíósíó ɛ́ɛ́ ɔɔni apitimɛn. 27Nutiyapɛn Saatanɛ nuasi. 28Ewú umapa wepe, wɛtikɛn puepi; Ukɔtɔ ní imbɔk siɛyi peseé á kutaŋapa epú unyɛ kuapɛt nɔ sɔku utianipa upian. 29Pilɔk pí tukál tiamana kaanu é niít, maná indɛ púókoówon, enuemenyi pinɔ́k pí tukál pinyɛ kuaka ilúndɛ piondo piekenyi peseé é peepi pɔpitɔlikɔnɛ tuɔ. 30Nutinyokolonyi enfúnkufuúmɛ Támbák maanuak ɛlɛɛ́ sitambɛ ó pusíó pú puɔ́s pu kiáŋuna. 31Ekund, kuúpinyukusa, ilópi, insikɛ, iŋɔmɔn nɔ pilɔk pi máanda kitikit, meeme mɛɛsíkɛnɛn kuuman káánɔ́. 32Ɔnuɔkɔnɛn paanu na paanuɛ, nií itɛ́m si makanakana. Anuyapinan pifal yá aná Támbák maanuyapɛn píánɔ́ é Kilíis.
Currently Selected:
Efesiɛ́ŋ 4: yav
Highlight
Copy
Compare
Share
Want to have your highlights saved across all your devices? Sign up or sign in
© 2026, CABTAL