Kolosiɛ́ŋ 2
2
1Yaákaamba ɛ́ɛ́ numenyi panɔ́ pɛɛnd pó Kolóos kikaaka kí insália inuananɛ́ kilɔk kɔ́lɔk káánɔ́ ó pusíó, no ó pusíó pu pɔsɔ́k pa Lawotisé, nɔ pɔsɔ́k pómotí puólíkóli pamapásiɛ́ pɛ́tiiŋɛ́n ne eŋís yɔ́ɔ́p; 2Akáánɛ́ yaákaamba ɛ́ɛ́ itɛ́m síɔ́p pá kutáam, pápá ɔtɛ́m ómoómí kí iŋɔyɔ nɛkɛtɛ́ɛ, powóónón na tutátɔ́. Káakáánɛ́ péényímenyeé iŋetí i Támbák inyɛɛ́ iŋɔsíkɔ́n, Kilíise, 3kɛ́ɛ́yɛ́ Támbák mɛɛ́nɛmbɛ́ punɛ́m pú tutátɔ́, ne kumenyi. 4Yɔɔ́núɔ́yɔn nɔ ɛ́ɛ́ mɔɔnd tiesínúpúlít na tukál tú nunɛ́m. 5Púnyɛ kemuémue ɛ́ɛ́ inyɛ kaáyɛ́ naanɔ́, ɔtɛ́m wáámɛ nyɛ naanɔ́. Inyɛ anyamɔ́ ɛ́ɛ́ maandá máánɔ́ atápukan peseé katɛ ambákálɛ́, inyɛ́ ká anyamɔ́ ɛ́ɛ́ nunyɛ no pipíóndínyí ɔtɛ́m é Kilíis.
Ɔ́nulɔpɔ́ á nipílat ne Kilíis
6Aná núányáátáp ɛ́ɛ́ Kilíis Yésuse unyɛɛ́ Ɔkɔ́n, ɔnusɔ́tɔ́n ɔtɛ́m omoómí nɛɛyɛ́. 7Anuluán iŋaŋá kɛ́ɛ́yɛ́, wɔ́ unyɛɛ́ indin yaanɔ́ i kusɔ́t, nupílúndɛn á kuátap yá aná pómoónúónyítonyi, nulémbesi Támbákɛ́ɛ. 8Nutiátáp ɛ́ɛ́ mɔɔnd nupúlit na tutátɔ́ tú punya pɛɛnduɛ, tútiányípá túɔkɔnɔkɔn. Tutátɔ́ asɛ tukáánɛ́ túólinon ɛ́ pinɛ́m pi punya pɛɛnduɛ na pikaaka pí piliínditíe pi indikis pifuŋenée e kúúsí ekue. Tutátɔ́ tukáánɛ́ tipá tu Kilíis. 9Á kiákí ɛ́ɛ́ epú kitikit púnyɛɛ́ á Támbák mɔɔsípɔkímɛ́t é Kilíis, púɔ́lɔp kitikiteékitikite kɛ́ɛ́yɛ́. 10Púnyɛ kɛ́ɛ́yɛ́ numaátáŋáp puandá kitikit táásɛ lééŋ, wɔ́ ewu unyɛɛ́ ɔkɔ́n u numíánsina kitikit na kipia kitikit. 11Kɛ́ɛ́yɛ́ á nipílat pamaánúansa, pútipá puansá á nunamá nú pɛɛnd, maná púnyɛ epú púólinonée é Kilíis, pútúáŋunanɛ́ɛ ké etényi wáásɔ́ ú pafalfál. 12Kí induén pómoónúnyoó nɛɛyɛ́, nuɛnyɔk ɔlɔŋ aná numoópíóndi ɔtɛ́m na pukaaka pú Támbák umeényí wɔ́ é piku. 13Panɔ́ epe numaápá pekúén insúá ó pusíó pu pifal píánɔ́ na kati kupíansɛ, maná Támbákɛ́ɛ waanúfá kusɔ́t é Kilíis:
waátuyapɛn pikua píásɔ́ piim,
14Waalaf ɔmbɔp ú kisɔ́ɔ́mɔnɔ
útíínyenyée aná pikotí tuɛ́tikɛnɛ́ɛ,
Weenyúkusit wɔ,
Wɔɔtɔɔndɛn wɔ́ ó kolóse,
15Wɛɛsɛ́ndɔn piimfuŋáfuŋa na pikaaka pí kúúsí,
Waatambɛk pɛ́ɛ kɔ́ ɔɔ́nd u ɛtɛnɔ́,
Utútule pɔ́ kɔ́ ɔlɔŋ úmaápíányɛ́n é nukúm nú kolóse nú muɔ́nɔ́ wɛɛyɛ́ Yésus Kilíis.
16Akáánɛ́ mɔɔnd tinúpɛnɛ́ ó pusíó pu ikámbí tɛ púkupúwa, tɛ ó pusíó pú mɔtɔ́mbí pɔsɔ́k pómotí tɔyɔnɛ́ é metúk mómotí pɔsɔ́k áákanɛ́ ɔ́ niɔlɔ́, tɛ ó pusíó pú oólí kupal, no ó pusíó pú sápat. 17Mɔ́ɔ́ meem mányɛ kiliínditíe kí maandá móónyóólée, kémuémue nyɛɛ́ Kilíise wɔ́ muɛ́t wɔ. 18Nutipíyapá ɛ́ɛ́ pɛɛnd peépiselesie yá ákɛ ɔ́ piɔ́lɔ́li pí niít póond pékúmesi Peéŋele, núpɛn. Pilɔŋ pí pɛɛnd pikáánɛ́ áákaákan itɛ́m síɔ́p kɔ́ɔ́p kí iŋanúnɛ́n nɛ kuɛ́n kúɔ́p kú maandá, kumenyi kúɔ́p kú pɛɛnd ɛ́ɛ́kɛlɛɛ́ pɛ́pímɛlɛ ɛ́ sɛ́kísɛ́kíɛ. 19Pátipá pɛ́píɛtikɛnɛn é Kilíis unyɛɛ́ ɛtɔ, ewu nuɔ́l táŋapanɛ́ɛ epú púɛ́sikɛɛnɛnɛ́ɛ. Kɛ́ɛ́yɛ́ imekú na piluŋɛ́n nyɛɛ́ palatá, Támbák ɛ́ɛ́lɛɛ́ núkuman.
Nikú nɔ kusɔ́t ne Kilíis
20Aná númenyikú ne Kilíis, pilɔk pí piliínditíe tipá píand apian niap naanɔ́, kiákí kɔk nuandɛɛ́ kuátapan pikotí epie, ɛlɛɛ́ numanyi pɛɛnd pé kúúsí: 21Ɔtikɔ́l, ɔtiɔ́pítɛn, etipítís. 22Meem makáánɛ́ ó pusíó pú maándá mɔ́pílɔkɔnɛ́ɛ yá aká ɛ́mɛ́nyɛɛlɛ́ mɔ. Iŋónyítónyí no pikotí pí pɛɛnd pé kúúsí sikáánɛ́. 23Pányɛ kutíínyenyi kumenyi kúɔ́p, pétíínyenyi kuátap pɔ́pílɔ́ŋɔnɛ́ɛ, kupíseli ne kuséésenyi tuɔ́l. Naánɛ́ kɔk ɛ́ɛ́ mányíɛ kɔ́ɔ́m ó kuwóónyosi kilɔ́ɔ́ŋɛ́t kí nuɔ́l.
Currently Selected:
Kolosiɛ́ŋ 2: yav
Highlight
Copy
Compare
Share
Want to have your highlights saved across all your devices? Sign up or sign in
© 2026, CABTAL