Roma Tónsó ŋweʼe pwó pɛ Roma
Tónsó ŋweʼe pwó pɛ Roma
Ŋkhoʼyɛ́ ŋɔŋ tě tsómvé yé, a tsyaŋ Kristo nɛ́, a yɔ́ɔ́ pɛ fɛ pe faʼ nuŋ pwó pecyó pɔŋ. A tséʼé ndáá kəŋe sísíŋ, mbó ŋgyɛ́ njʉ́ ndáá ŋɔŋ nɛ́, nsényi yé pe ŋgerɛ́ŋged ndzó ŋgɔŋ yé. Ŋweʼe pwó pɛ Roma, pwó ŋukristó mbɛɛ taʼ mɛndɔ́b sʉ́ʼʉ wɛ́ tɛɛmbɛ a zaʼa ndúŋú, ndiŋi mbziʼe yɛ́ a ntee mbəb yé pwó Mboʼmvé nɛ́, mbó sed pwó faʼ yé mbəb pɔ́ŋmɛ́ pé.
A kɛ ŋwéʼé wɔ́ ŋwéʼé ŋweʼe yɔŋ pwó pɛ Roma?
A kɛ ŋwéʼe Pɔ́lə ŋweʼe ŋwéʼé yɔŋ. A kɛ ŋwɛʼɛ ne ywɔ́ ŋgǒʼmvé ghúbmetáŋ ne yisabáá kɛ́ʼɛ́, ŋgɛ́mbɛ́ mbɛɛ ndzó mbɛ́lʉ́ŋ Korɛnto, ŋgɛ́mbɛ́ néré kɛ́ʼɛ́, ntsé ntsuŋɔ ne ŋgǔne Yerʉ́salɛm.
A kɛ ŋwɛʼɛ pwó wɔ́? A kɛ ŋwéʼé ŋkyé kɔ́?
Taʼ ndáméted Mboʼmvé ndzó mbɛ́lʉ́ŋ Roma yɛ́, pe tsʉyǐ ndzɛ́ njʉ́ a kɛ zhyɛ́ mbɔ́rɔ́ mbɛ́ nɛ́ pó. Ŋkhoʼyɛ́ pé fú ŋweʼe yɔŋ nɛ́, á tsǒ njʉ́, a kɛ́ pɛ́ ndzó ndábménted yéré, pɛ́ Yúda fere pwɛ pɔŋ pɛ́ pɔ́b pɛ́ Yúda nɛ́ pó. Á pɔ́b nɛ́ mbé pɔŋ pɛ́, a kɛ ŋwéʼé ŋwéʼe yɔŋ ne pɔ́b nɛ́. Pɔ́lə kɛ ŋwɛʼɛ ne pɔ́b kɛ́ʼɛ́, pe ne ŋgyɛne ŋgâ pɔ́ŋmɛ́ péré zɛ nó yɛ́ a kɛ́ tswʉrɛ́ ndzó pecyó ywoʼ nɛ́ ŋkɔ́ŋ, a pɔ́rɔ́ mbáŋa yoʼo pɔ́b.
Pe tsɔ̌ ŋgâ kɔ́ ndzó ŋweʼe yɔŋ?
A ndzó poʼŋweʼe yɔŋ Pɔ́lə nyoʼo mbó keʼe no psyɛ́ndzɔʼ kpaʼ yáŋme. A zyé ne ndzye nyoʼ pɛ meno pɛ́, a sáʼasyé Ŋkəŋ sʉ́ʼʉ nɛ́. Zhʉ́bí, á nyoʼo njʉ́ ŋkɔŋɔ pumésɔŋ náá kɛ pwó, a pó ndzɔŋɔ ŋgâ Mboʼmvé kpee wɔ́b nɛ́. Néré kɛ́ʼɛ́, a cʉri Ŋkəŋ sʉ́ʼʉ ne pɔ́b. No yɛ́ a cʉ́rɛ nɛ́ pɛ́ɛ́ ŋgâ: Mboʼmvé fɛ́ ndzǔne pwó ŋkɔŋɔ pɔŋ náá, kii tsé ndiŋɛ́ zhí ŋɔŋ wéré, kii pó náá ŋɔŋ wɛ́, á yé nɛ́, kii pó náá kəpɔŋ yé. Néré kɛ́ʼɛ́, foʼndzendzoʼ Mboʼmvé pe nɛ́ pe pwó ŋkɔŋɔ pɔŋ náá. Pe pó mbɔ́rɔ́ ntsɛʼɛ, ndzáʼa ndúŋú psyɛ́ndzɔʼ mbəb Yěsô Kristo. A zhyɛ́ yé ŋgâ Mboʼmvé zhʉ́ wíŋi njʉ́ puŋgerɛ́ŋged nɛ́. Ɔ́ŋɔ! Mboʼmvé pó nɛ́ mbé zhʉ́ pwófaʼa ntsɔ́ ŋgâ a ŋgerɛ́ŋged po, ntsʉʼmbé a náá psyɛ́ndzɔʼ yé. Néré kɛ́ʼɛ́, Mboʼmvé tse nɛ́ mbé tɔʼɔ ŋɔŋ ŋkʉ́rʉ́ pó.
Pe ké mbó fú pecyó pɛ meno ndzó ŋweʼe yɔŋ. Meno péré penɔŋ: mbziʼe njʉ́ ŋúkristo twɔ́ tsáŋ nɛ́, mbziʼe njʉ́ Mboʼmvé kʉyě pupe nɛ́, ywoʼɔ́ tsɛ pɛ Yúda ndzɔʼɔ kpaŋató Mboʼmvé ne kpěne ŋumesɔŋ.
Pe tsuŋu ŋweʼe yɔŋ pé niŋ?
Yɔŋ pe nɔŋ njʉ́ ŋweʼe yɔŋ tsuŋume nɛ́:
Pɔlə cʉrí Ŋkəŋ sʉ́ʼʉ Rom 1:1-17
A vɔ ŋkɔŋɔ pumésɔŋ náá vɔ no Rom 1:18–3:20
Mbziʼe yɛ́ Mboʼmvé kɛ zhʉ́ pumésɔŋ njʉ́ puŋgerɛ́ŋged nɛ́ Rom 3:21–4:25
Pɔ́ŋ Mboʼmvé ŋkʉyó ntsɛ́ʼɛ́ tsómvé ffé: 5:1–8:39
Mboʼmvé kɛ pé maʼa Issayɛ pe taʼ kɛɛ pó: 9:1–11:36
Taʼ tsómvé kəŋe ye ffé: 12:1–15:13
No yɛ́ Pɔ́lə kɛ tíí nɛ́ pú yaŋmvé: 15:14–16:27.
Currently Selected:
Roma Tónsó ŋweʼe pwó pɛ Roma: XMG
Highlight
Share
Copy
Want to have your highlights saved across all your devices? Sign up or sign in