Roma 7
7
A sáʼá kaŋ sáʼá pǔkristo ŋkʉ́rʉ́ pó
1Pɔ́ŋmɛ́ páá, kii puŋ zhí zhí ŋgâ, kaŋ ke sáʼá ŋɔŋ pe ŋkhoʼyɛ́ a kɛ kɛrɛ mɔ́b nɛ́? Mə tsɔ kɛ́ʼɛ́ pe pwó pɔŋ pɛ, pɔ́b zɛ́ no ne no kaŋ nɛ́. 2Néré kɛ́ʼɛ́, kaŋ tsetsɛrɛ meŋgʉye pú ŋumbzí ne no ndáá, pe ŋkhoʼyɛ́ ndwɔ́ ye kɛ kɛ́rɛ́ mvé nɛ́. Ntsʉ́ʼmbé ŋkhoʼyɛ́ ndwɔ́ yé pfó nɛ́, yéré kaŋ tsébé. 3A pɛ́ɛ́ yɛ́ ndwɔ́ ye kɛ kɛ́rɛ́ mvé, a pó tséʼé cyó ŋumbzǐ nɛ́, mbǒ pe fú wé ne mbúbú ndáá. Ntsʉ́ʼ mbé a pɛ́ɛ́ yɛ́ ndwɔ́ yé pfó nɛ́, mbǒ méré kaŋ tsébé. Kaʼatɛ, tɛɛmbɛ́ a pó mbé pé mbúbú ndáá ŋkʉ́rʉ́ pó, mbé yɛ́ a zɔʼ cyó ŋumbzǐ nɛ́. 4Ntsʉ́ŋtsʉ́ŋ njʉ́ puŋ nɛ́, kɛ pɔ́ŋmɛ́ páá, kaŋ zé ŋgâ puŋɛ pɔ́b tséʼé cyó no ŋkʉ́rʉ́ pó, ŋkyé ŋgâ puŋɛ mbəb Kristo tə́b mbé taʼ yé. Kɛ́ʼɛ́ puŋ pó nɛ́ mbɛɛ pwó cyó ŋɔŋ, yé wɛ́ a kɛ zhʉyɛ́ ne vó nɛ́, yânéré kɛ́ʼɛ́ ŋgâ piŋi kaa náá faʼa faʼ yɛ́ a mbǔ Mboʼmvé nɛ́. 5Ŋkhoʼyɛ́ a kɛ sáʼá mbəb yiŋi sáʼá wíŋi nɛ́, kaŋ zhyɛ́ pɛ ndzye meno kəpɔŋ tsiŋɛ wíŋi, piŋɛ ywoʼɔ́mbəb piŋi zhyɛ́ meno kəpɔŋ pɛ, a kɛ ghɛ́ ke mee ne vó nɛ́. 6Tsʉ́ʼmbɛ́ ne ŋkhoʼyɔŋ, mbziʼe njʉ́ yɔ́b yɛ́ a kɛ gbǎ wíŋi nɛ́, kɛ zé ŋgâ piŋi pɔ́b tséʼé cyó no ŋkʉru nɛ́ pó, a pó nɛ́ mbé sáʼá kaŋ sáʼá wíŋi ŋkʉ́rʉ́ pó. Néré, piŋi faʼa nɛ́ ŋkhoʼyɔŋ pe ne mbziʼe ffé, a sáʼá Zhʉye Yáŋme sáʼá wíŋi. Piŋi pó nɛ́ mbé faʼa ne ndzúŋ mbziʼe ŋkʉ́rʉ́ pó, ndzúŋ mbziʼe yɛ́, a kɛ sáʼá kaŋ yɛ́, pe kɛ́ ŋwéʼe nɛ́, sáʼá wíŋi nɛ́.
Kaŋ ghɛbɛ kɔ́?
7Tɛɛmbɛ piŋi tsɔ̌ ŋgâ kɔ́? Kaŋ no kəpɔŋ? Ngáŋ! Tɛɛmbɛ a pé pé néré pó! Tsʉ́ʼmbé a kɛ zhyɛ́ kaŋ mə ndzɛ́ yɔ́b yɛ́, kəpɔŋ yéré nɛ́. Néré kɛ́ʼɛ́, mə kɛ pe zɛ́ yɔ́b yɛ́ pe fú ne keghoʼ nɛ́, mbé yɛ́ kaŋ kɛ pe nsó ŋgâ: «Wo ndɛ naʼ tséʼé keghoʼ» nɛ́ pó! 8Ŋkhoʼyɛ́ kəpɔŋ kɛ zé néré nɛ́, a yáá ndúŋú kaŋ, ŋgyɛ́ mə ntséʼé ŋkɔŋɔ mbziʼe keghoʼ náá. Ŋkyé ŋgâ a kǎ kaŋ, kəpɔŋ tsʉ́ʼɔ́ yɔ́b pfóme. 9A kɛ pɛ səssó, ŋkhoʼyɛ́ kaŋ kɛ pé pe nɛ́ pó, mə ké ntsǒtsó. Ntsʉ́ʼmbé, ŋkhoʼyɛ́ kaŋ kɛ pó ŋkʉyó nɛ́, kəpɔŋ yɔ̌ ywoʼ. 10Ŋgɛ ŋkhú ne mo, mə pfó ŋkyé ŋgâ, kaŋ yɛ́ a ŋgɛ́ fɛ̌ tsómvé ne mo nɛ́, pó tiŋɛ̂ ya pé tswee vó. 11Ŋkhoʼyɛ́ kəpɔŋ kɛ zé néré nɛ́, a yáá ndúŋú kaŋ, shʉrʉ ya, fɛ́ vó ne mo. 12Néré kɛ́ʼɛ́, kaŋ yɔ́b yáŋme, ywoʼɔ́ kaŋ ké mbó mbé yáŋme, mbé ŋgerɛ́ŋged, ké mbó mbé sʉ́ʼʉ.
Ŋɔŋ wɛ́ a sáʼá kəpɔŋ sáʼá wé nɛ́
13Néré kɛ́ʼɛ́, yɔ́b yɛ́ a kɛ pe sʉ́ʼʉ nɛ́, pó ŋkhú yé vó ne mo? Ngáŋ, tɛɛmbɛ́ a pe pé néré pó! Ntsʉʼ mbé a zhyɛ́ kəpɔŋ. Á yɔɔ yɔ́b yɛ́ a yé sʉ́ʼʉ nɛ́, fɛ́ vó nuŋ ne mo, yânéré kɛ́ʼɛ́ ŋgâ a tsʉyǐ nyóʼ mbəb yé ŋgâ, a kəpɔŋ, tubu ŋkɔŋɔ tʉ̌ŋ mé, mé kəpɔŋ náá. Ŋgɛ́mbɛ́ néré ndzáʼa ndúŋú kaŋ. 14Ɔ́ŋɔ́, piŋi zé sísíŋ ŋgâ, kaŋ twɔ̌ pwó Zhʉye Mboʼmvé. Ntsʉ́ʼmbɛ ne mo, mə mbó mbɛ ya pé ndaʼ ŋumesɔŋ, pe pó fí ya njʉ́ poʼ nɛ́ pwó kəpɔŋ. 15Kpaʼ sísíŋ, mə ntsé mbé zoʼo kpaʼ no yɛ́ nɛ́, mə ŋgyɛ́ nɛ́ pó. No yɛ́ mə ŋkʉye nɛ́, a yɛ́ mə ŋgyɛ́ nɛ́ pó. Ntsʉʼ mbé yɛ́ mə mbáŋá nɛ́, a pó mbé yéré mbé yɛ́, mə ŋgyɛ́ nɛ́. 16A pó mbɛɛ yɛ́ nɛ́ mə ŋkʉye nɛ́ pó, a pó mbé yéré mbé yɛ́ mə ŋgyɛ nɛ́, mbǒ psi kaŋ taʼ ntswee, mə mbó mbzyɛ́ ndzó ndzɔʼ ya ŋgâ kaŋ sʉ́ʼʉ. 17A pó mbé zhyɛ́ mo nɛ́ néré pó, tsʉʼ mbé a kəpɔŋ yɛ́ mbəb mo nɛ́, ŋgyɛ́ néré. 18Mə ndzé ŋgâ a mbəb mo, mə tsɔ̂ kpaʼ ndzɔʼɔ tsə máá, no sʉ́ʼʉ yoʼo pó. Mə kʉ́yé nɛ́ ne ŋgyɛne no sʉ́ʼʉ, ntsʉʼmbé tséʼé tʉ̌ŋ ne ŋgyɛne néré pó. 19Ŋkyé ŋgâ no sʉ́ʼʉ yɛ́ mə kʉ́yé nɛ́, mə tse mbé zhyɛ́ pó. Tsʉ́ʼmbé, no kəpɔŋ yɛ́ mə ŋkʉye nɛ́ pó, a pó mbé yéré yɛ́ mə ŋgyɛ nɛ́. 20Kɛ́ʼɛ́, a pɛ́ɛ́ yɛ́ no yɛ́ mə ŋkʉye nɛ́ pó, mə mbó ŋgyɛ́ yéré nɛ́, mbǒ a zhyɛ́ mo pó, tsʉ́ʼmbé, a kəpɔŋ yɛ́ á mbəb mo nɛ́ ŋgyɛ́. 21Yɔŋɔ no yɛ́ nɔŋ mə njʉ́ mbəb mo nɛ́. Ŋkhoʼyɛ́ mə ndzɔŋɔ ŋgyɛ no sʉ́ʼʉ nɛ́, mə mbó tséʼé tʉ̌ŋ, pe ne ŋgyɛne yé kəpɔŋ. 22Ŋkyé ŋgâ a ndzó zyé ndzɔʼ ya, yɔ́b yɛ́ a fɛ́ ndebéne ne mo nɛ́, a kaŋ Mboʼmvé. 23Tsʉ́ʼmbɛ, ne pecyó ywoʼɔ́mbəb páá, mə njʉ́ cyó kaŋ ndzóó, a tsé maʼa ntsɔ pwɛ yɛ́ ndzɔʼ ya psyɛ nɛ́. A zhyɛ́ mə tsʉʼ ŋgaŋatsáŋ pwó kaŋ yéré yɛ́, a ndzó ywoʼɔ́mbəb páá, ŋgyɛ mə ŋgyɛ́ no kəpɔŋ nɛ́. 24Kaʼatɛ mə mbó nɔŋ cʉ́ʼɔ́ ŋgaŋa ŋgəʼo! Tɛ a mkpee wɔ mkpee mbəb ya yɔŋ yɛ́, a pó ntyaŋa pé mɛndɔ́b vó kaʼa nɛ́? 25Á ŋgúʼune pɛ pwó Mboʼmvé, ndǎ mbəb Yěsô Kristo Ntsɛɛpɔŋ wíŋi!
Mə mbé nɛ́ ŋkhoʼyɔŋ tsetsɛrɛ kaŋ Mboʼmvé yɛ́, ndzɔʼ ya psyɛ nɛ́, pú kaŋ yɛ́ a ndzó ywoʼɔ́mbəb páá, ŋgyɛ mə ŋgyɛ́ no kəpɔŋ nɛ́.
Currently Selected:
Roma 7: XMG
Highlight
Share
Copy
Want to have your highlights saved across all your devices? Sign up or sign in
