Matʉyo 1

Ndǎndáb Yěsô Kristo

(Lúk 3:23-38)

1Yɔ̌ŋ póʼŋweʼe ntwɔ́ ndáb Yěsô Kristo, Mɔ́ŋ fɔŋ Ndavíd, Mɔ́ŋ Ábraham.

2Ábraham kɛ pfé Izaʼ,

Izaʼ pfɛ́ Yakɔ́b,

Yakɔ́b pfɛ́ Yúda pwɛ pɔ́ŋmɛ́ pé.

3Yúda pfɛ́ Farɛsə pú Zara, mɛ́ wɔ́b pé Tamâ.

Farɛsə pfɛ́ Ɛsərɔŋ,

Ɛsərɔŋ pfɛ́ Araŋ.

4Araŋ pfɛ́ Áminadab,

Áminadab pfɛ́ Nǎsɔŋ,

Nǎsɔŋ pfɛ́ Salmɔŋ,

5Salmɔŋ pfɛ́ Boozə, mɛ́ ye pe Rahab.

Boozə pfɛ́ Zhobɛ́d, mɛ́ ye pe rʉtə,

Zhobɛ́d pfɛ́ Zhese.

6Zhese pfɛ́ fɔŋ Ndavíd.

Fɔŋ Ndavíd pfɛ́ Salomɔŋ ndúŋú ŋgʉyé Ʉri.

7Salomɔŋ pfɛ́ Roboham,

Roboham pfɛ́ Ábya,

Ábya pfɛ́ Asa.

8Asa pfɛ́ Zhozafad,

Zhozafad pfɛ́ Zhoraŋ,

Zhoraŋ pfɛ́ Ozyasə.

9Ozyasə pfɛ́ Zhuyataŋ,

Zhuyataŋ pfɛ́ Akâzə,

Akâzə pfɛ́ Ezekyasə.

10Ezekyasə pfɛ́ Manasé,

Manasé pfɛ́ Amɔŋ,

Amɔŋ pfɛ́ Zhozyasə.

11Zhozyasə pfɛ́ Zhekonyasə pwɛ pɔ́ŋmɛ́ pé.

A pé ŋkhoʼyɛ́ nɛ́, pé kɛ gbáá pɔ́ŋ Issayɛ ne pɛ poʼ, ŋgú ne wɔ́b Babilɔnə nɛ́.

12Ŋkhoʼyɛ́ pe kɛ gbâ wɔ́b néré nɛ́,

Zhekonyasə pfɛ́ Salasyɛ,

Salasyɛ pfɛ́ Zorobabɛlə.

13Zorobabɛlə pfɛ́ Abyúd,

Abyúd pfɛ́ Elyakim,

Elyakim pfɛ́ Azɔɔ.

14Azɔɔ pfɛ́ Sadɔʼ,

Sadɔʼ pfɛ́ Akiŋ,

Akiŋ pfɛ́ Elyud.

15Elyud pfɛ́ Elyazaa,

Elyazaa pfɛ́ Mátáŋ,

Mátáŋ pfɛ́ Yakɔ́b.

16Yakɔ́b pfɛ́ Yesə́b,

Ndwɔ́ Malya,

Wɛ́ a kɛ pfɛ́ Yěsô wɛ́ pe fú ne Kristo nɛ́.

17Ŋkɔŋɔ ŋgɔ́bɔ́ ŋumesɔŋ Issayɛ náá, ndzyě mbəb Ábraham kaʼatɛ mbáŋá mbəb fɔŋ Ndavíd, a ntsɔb yíkwa. Ke mbó mbé ntsɔb yíkwa, ndzyěne mbəb fɔŋ Ndavíd kaʼatɛ mbáŋá njʉ́ pé kɛ gbáá pɔŋ Issayɛ ŋgú ne wɔ́b ne poʼ Babilɔnə nɛ́. Ke mbó mbé ntsɔb yíkwa, ndzyěne Babilɔnə, kaʼatɛ mbáŋá mbəb Kristo.

Aŋgere cʉrí mvěne Yěsô pwó Yesə́b

18Yɔ̌ŋ njʉ́ ntwɔ́ ndáb Yěsô Kristo ghu nɛ́. A kɛ ghɛmbɛ Malya, mɛ́ ye, pé ŋgʉyé Yesə́b wé tsuwɛ tsuwɛ. Zhʉye Yáŋme zhyɛ́ Malya pe sǔme kii pú Yesə́b zyé ntə́b ywoʼ. 19Yesə́b, ndwɔ́ ye wɛ́ a kɛ pé taʼ ŋɔŋ ŋgerɛ́ŋged nɛ́, tsé mbé zɔŋɔ ŋkéé tsi ye tétáá pó, a tíí ŋgâ a nyiʼa ntee wé. 20Ŋkhoʼyɛ́ a kɛ tséʼé yéré kpaŋ nɛ́, taʼ aŋgere Ntsɛɛpɔŋ kʉ́yó ndzɔ́ʼɔ́ ndzəb, ntsɔ́ pwó ye ŋgâ: «Yesə́b Mɔ́ŋ fɔŋ Ndavíd, ndɛ mbɔ́ɔ́ ne ndɔ̌ne Malya ŋgʉyé wo, fɛ́ ywoʼ wo. A ghɛmbɛ tsébéne kɛ́ʼɛ́, a ntwɔ́ pwó Zhʉye Yáŋme. 21A náʼá mvɛ́ taʼ Mɔ́ŋ ŋumbzí. Wo tswə́ tíí ye ne Yěsô, ŋkyé ŋgâ, a ŋkʉ́yó kpéé ye kpéé pɔŋ pé ndzɔ́ʼɔ́ kəpɔŋ wɔ́b.» 22Ŋkɔŋɔ meno péré kɛ páŋ náá kɛ́ʼɛ́, ŋgâ tó ŋkɔŋɔ meno pɛ́ Ntsɛɛpɔŋ kɛ ntsó ne ntswee ghaŋátsɔ́kpaŋató ye nɛ́, pwɔ́. 23A kɛ tsɔ́ɔ́ ŋgâ: «Puŋ zóʼó! Mɔ́ŋndɛ́mɛ́ ŋkʉ́yó mbɛ́ sǔme, mvɛ́ taʼ Mɔ́ŋ ŋumbzí, pe tswə́ tíí ye ŋgâ Emanwé, keʼe tsi yé pɛɛ ŋgâ: “Á piŋɛ Mboʼmvé”.» 24Ŋkhoʼyɛ́ Yesə́b kɛ zebe nɛ́, a ke ŋgyɛ́ no yɛ́ aŋgere Ntsɛɛpɔŋ kɛ tsɔ́ pwó ye nɛ́, ndɔ́ɔ́ ŋgʉyé ye fɛ́ ndáb. 25Ntsʉʼmbé, pú ye pe nú pó, kaʼatɛ mbáŋ ŋkhoʼyɛ́ a kɛ pfé Mɔ́ŋ ŋumbzí nɛ́. Néré, Yesə́b tswə́ tíí ye ne Yěsô.

Currently Selected:

Matʉyo 1: XMG

Highlight

Copy