2 Korɛŋto 13
13
Pɔ́lə fɛ́ njʉyǐndzʉ ntʉ́ʉ́
1Yɔ̂ŋ zhʉbɛ́ yíkyéd nɛ́ njʉ́ mə ŋkʉ́yó pfúŋɔ puŋ nɛ́. Njʉ́ a ŋweʼéme ŋgâ: «Pé ghɛ́ njʉ̌yí sáʼá, ndzóʼ nsó pɔŋ pépáá kii pékyéd» nɛ́. 2Mə kɛ́rɛ pě ntsɔ́ ne puŋ, ŋkhoʼyɛ́ mə kɛ kʉ́yó pfúŋɔ́ puŋ ne zhʉ́bɛ́ yípáá nɛ́. Mə kiʼi kémbó ntsɔ̂ nɛ́ ŋkʉ́rʉ́, ndzebé wɔŋ wɛ́, mə yóʼó nɛ́ pó, á pwó pɔŋ pɛ́ pɔ́b kɛ pě mvô no nɛ́, mbɛ pwó ŋkɔŋɔ pɔŋ náá: a pɛ́ɛ́ yɛ́ mə mbó ŋkʉ́yó nɛ́, mbǒ mə ntséʼé tsaaghəghəŋ ŋkyé tsyé ŋɔŋ pó. 3Ŋkyé ŋgâ, puŋ zɔŋɔ njʉ́ kiŋi yɛ́, a nyóʼó ŋgâ, Kristo tsé ndzáʼá mbəb mo, ntsɔ no nɛ́. Ŋgɛ́ ŋkhú mbəb puŋ, a tsé mbé pɔ́rɔ́ pó. Ntsʉʼmbé, a tsé nyóʼó tʉ̌ŋ mé tsetsɛrɛ puŋ. 4Ɔ́ŋɔ́, a sísíŋ ŋgâ ŋkhoʼyɛ́ pé kɛ kpíí wé ndúŋú ŋgʉŋʉ nɛ́ a kɛ pé pɔ́dme. Ntsʉ́ʼmbɛ́ ne ŋkhoʼyɔŋ, a mɔ́b pé ne tʉ̌ŋ Mboʼmvé. Ŋgɛmbɛ ne piŋi, njʉ́ piŋi pɔ́b tə́b mbé taʼye nɛ́, piŋi ke mbɛ yiŋi pɔ́dme. Ntsʉʼmbé, piŋi náʼá mbɛ mɔ́b piŋɛ pɔ́b, pé ne tʉ̌ŋ Mboʼmvé, yɛ́ a nyóʼó ne puŋ nɛ́. 5Puŋ kpéʼé mbəb yúŋ tsetsɛrɛ puŋ ne tómbəb yuŋ, njʉ́ mbéyɛ́ puŋ kɛ tsɛʼɛ psyɛ́ndzɔʼ nɛ́. Puŋ tiŋí njʉ́! Kii ŋgâ, puŋ zé ŋgâ Kristo pɛ́ɛ́ tsetsɛrɛ puŋ pɔɔ? Kii puŋ kpeʼe néré, njʉ́ ŋgâ a pó mvô puŋ? 6Mə kpâŋ ŋgâ, puŋ kʉ́yó kpɛ́ʼɛ́ taʼ zhyémve ndzɛ́ ŋgâ, psi kɛ vo no pó. 7Zhí tsɛ́ʼɛ́ Mboʼmvé pɛ́ɛ́ ŋgâ, puŋ ndɛ ŋgyɛ́ cyó no kəpɔŋ, mbé tsé ndzɔŋɔ nyóʼó ŋgâ, faʼ zhí sʉ́ʼʉ kaʼatɛ pó. Tsʉ́ʼ ndzɔŋɔ́ njʉ́ puŋ ŋgyɛ̌ meno sʉ́ʼʉ, mbɛ mbé yɛ́ a zɔŋɔ nyóʼó ŋgâ psi vɔ̂ no nɛ́. 8Ŋkyé ŋgâ tɛɛmbɛ psi pe zhyɛ́ cyó yɔ́b ne nǎŋne ŋgerɛ́ŋged Mboʼmvé pó. No yɛ́ tɛɛmbɛ psi zhyɛ́ nɛ́, pɛɛ ne tuʼúne ŋgerɛ́ŋged wéré. 9Psi tséʼé ndebéne ŋkɔŋɔ ŋkhoʼyɛ́ psi ghɛ́ mbɔrɔ, puŋ tséʼé tʉ̌ŋ nɛ́. Néré kɛ́ʼɛ́ yɔ̂ŋ yɔ́b yɛ́ nɛ́ a zhyɛ́ psi tsɛʼɛ Mboʼmvé ŋkyé wuŋ ŋkɔŋɔ ŋkhoʼ náá nɛ́: ŋgâ puŋ pe ndáá pɔŋ kii yɔ́ʼɔ́. 10A zhyɛ́ yéré nɛ́, njʉ́ mə kɛ kɛrɛ taŋasesɛ nɛ́, mə ŋwɛ́ʼɛ kaʼa ne puŋ, pe njʉ́ mə mî wúŋ mǐ nɛ́, mə ŋweʼɛ né puŋ ŋgâ a ndɛ mbó mbɛ́ɛ́ ŋkhoʼyɛ́ mə mbɛ tsetsɛrɛ puŋ nɛ́, mə mbɔ́rɔ́ tsé ntsɔ̂ wɔŋ nsó ntʉ̌ŋme, ne tʉ̌ŋ sáʼne mɛ́ Ntsɛɛpɔŋ fɛ́ ne mo nɛ́. Ŋkyé ŋgâ yéré tʉ̌ŋ pɛ́ɛ́ ne ŋgyɛ̌ne ŋgâ puŋ ghóʼ, ŋgú ssó ne psyɛ́ndzɔʼ yúŋ, a pɛ́ɛ́ ne mbône wúŋ pó.
Njʉyǐndzʉ tséʼé
11Pɔ́ŋmɛ́ páá, mə ŋgɛ́ mě, ntsɔ́ nɛ́ ne puŋ ŋgâ. Puŋ kɛ mbɛ́ɛ́ ndzɔ́ʼɔ́ ndebéne, ntaʼa ne mbéne pɔŋ kii yɔ́ʼɔ́, ntúʼɔ mbəb yuŋ tsetsɛrɛ puŋ, ntséʼé nsóndzoʼ tsetsɛrɛ puŋ, mbó tsó ne mbúru. A pɛ́ɛ́ pé néré, mbǒ Mboʼmvé, yé wɛ́ a kʉyě pɔŋ mbó fɛ́ mbúru nɛ́, mbɛ́ né puŋ. 12Ŋɔŋ tsɛ́ʼɛ́ mɔ́ŋmɛ́ yé kaʼatɛ ŋkoo wé. Ŋkɔŋɔ pǔkristo náá tsɛ́ʼɛ́ wúŋ. 13A foʼndzəndzoʼ Ntsɛɛpɔŋ Yěsô Kristo, kəŋe yɛ́ a twɔ́ pwó Mboʼmvé nɛ́, nzwə́rene mɛ́ Zhʉye Yáŋme fɛ́ nɛ́, pɛ́ pwó ŋkɔŋɔ wúŋ náá!
Currently Selected:
2 Korɛŋto 13: XMG
Highlight
Share
Copy
Want to have your highlights saved across all your devices? Sign up or sign in
