Lomɛ́ŋ 16

1Nugɔ́l gɛsɛgɛl na Febé endimen wasɔ wá guádáb uwagánd walaná buol agá giɔ́b gá beédeb gínyá Sankelé. 2Nugóli wɔ́ bese agá ɔfɛ́n wá Ɔgúnɔ́ gɔɔ́gɔ anyɛ́ band bá Gɔdányá biananá ká bála. Nudúgúne wɔ́ ká udisémén buanda, gágual ká, úgudúgúne giod gá band, dɔ́mbádɔ́mba yaŋuá muát ewe. 3Numbígélídinyi Pilísíka naga na Akilása, begúligul bám bá buol agá Yésu Kilíse. 4Bágual bégú ká bónsódi. Nguéŋeen bɔ́ giod gá nukany. Ta biɔ́b bá beédeb bádiábá Beyúdɛn, bɔ́bɔ́ sɔ́n, béguéŋen giod gá nukany. 5Numbígélídinyi sɔ́n beédeb bábɛ́gɔ́saná gá gubísógólonyi ɔgɔbɔ́. Numbígélídinyi sɔ́n Epénɛ́ta umáabá wobusió ká wádáb Kilíse agá giéns gá gus gá Así. 6Numbígélídinyi Maliá unyá gubífánan muyú giod gá buol gadágadá wanɔ. 7Numbígélídinyi sɔ́n besié bám, Andolonikuse naga na Yuniasa dɛmáabá nɔbɔ agá gians gá mbíne. Bányɛ́ bɛgaga bá bedúmab bámakɛ́n gám agá Kilíse. 8Numbígélídinyi ogúl wam Ampiliatuse, dinyɛ ɔlɔn naga aga Ɔgúnɔ́. 9Numbígélídinyi Ulibɛ́ŋa, nasɔ naga, dɛguála buol bá Kilíse. Mmébígélídí aguám Ɛsɛtakise. 10Numbígélídinyi Apelesa udíyenyé dambɔ́dambɔ ká úguádáb Kilíse. Numbígélídinyi sɔ́n band bá nuyá ná Alisitobule. 11Numbígélídinyi baba wam Elodiɔ́ŋɔ na ebe bá nuyá ná Nalisíse bémeébiéŋín aga Ɔgúnɔ́. 12Numbígélídinyi na Tilifɛ́n na Tilifoso bányá gubiéŋin nugényígeny gá buol bá Ɔgúnɔ́. Nubígélídi aguám uwagand Pelesíse, unyá gubiéŋin nugényígeny giod gá buol bá Ɔgúnɔ́. 13Numbígélídinyi Lufúse uwɔ́ Ɔgúnɔ́ méeyid. Nubígélídí sɔ́n inyódió unyá inaá wam. 14Numbígélídinyi Asɛŋɛkilíte, Felegɔ́ŋɔ, Ɛlɛmɛ́sa, Patolobasa na Ɛlɛmása, na beédeb gidigid bányá ɔlɔŋ nɔbɔ. 15Numbígélídinyi sɔ́n Filológe na Yulia, Nelé na endimen uwagand. Numbígélídinyi sɔ́n Ɔlɛ́mpasa na band bá Gɔdányá bóndodi ɔbɔ́ bányá ɔlɔŋ nɔbɔ. 16Ɔ́nugɔ́lɔ́nɛ́n nŋund gɛsɛgɛl nubígélínyigélínyé banuá na banuá nunyá beédeb. Biɔ́b bá beédeb bá Kilíse gidigid ménúbígélídi.

17Belimen, ngúnúbisógólonyi ká, nubɛ́nyáŋanyaŋ na ebe bólonó na dusalasala na gibueŋidie gá manda ɔmɔ́ núnyá gufɔ́nɔfɔɔn ká bénúnéni. Ánubɛ́sándɔ́n bɔ́. 18Gágual ká band abaány dɛguálan Ɔgúnɔ́ wasɔ Kilíse buol. Báguála buol gɔɔ́g gɔ́b gá duna. Bénéŋe ebe bányá na ɛdɛm lágɔlág na bɛnɔ́g bɔ́b bá gugál na bugél bɔ́b búliómbiliombio. 19Kányɛ búnyá ká, mɔnd gidigid gúlɛnsaan ká banuá nuguála Ɔgúnɔ́ nŋɔ́bɛnɔ. Ngúnuɔ́bɔnɛn bese gá bú, ta nɔ́, nguámba ká nubá na nsiŋi yá guala bese, nudɛlád bugúl na manda amabɛ. 20Gɔ́b uguány Gɔdányá wéŋeniné bumben áŋásɛd Sátan, wág wɔ́ gusígúsié wa mbanábaná sán. Nsɛ́ gɛfɔn gá Ɔgúnɔ́ wasɔ Yésu bá nanɔ. 21Ogúligul wam wa buol Timoté ménúbígélídí. Besié bám, na Lúsius, na Yason, na Sosipatolos bɔ́bɔ́ sɔ́n béménúbígélídí. 22Yaŋɔ́ Tɛlɛtuse mmɔ́nuɔ́ŋɔ́ ɔmbɔbɔnɔ ewe agá guɔyɛd gá Pólo, mménúbígélidi agá ɔfɛn wa Ɔgɔn 23Gayúse uwɔ́ yaŋɔ́ Pólo mbɛ́dɛ́maná agág gá gians ménúbígélídí. Agagá, beédeb gidigid álaná bɛgɔ́s bɔ́b, béménúbígélídí. Elasata ubɛ́dɛ́ganá muonyi má tíson ménúbígélídí, ta endimen wasɔ Kalátuse, uménúbígélídí sɔ́n. [24#16.24 Búnyɛ buɔ́ŋɔ́ŋ agá imbɔbɔnɔ síndodió ká: Nsɛ́ bese wa Ɔgúnɔ́ wasɔ Yésu Kilíse bá nanɔ banuá gidigid anányɛ.]

Mbísógólí ya gusúgúdenyi

25Nukany bá na Gɔdányá unyá na bugaga bá gual ká ɛdɛm sán gɔ́nɛ́n na Ndág ya Nsɔ́m, gɛsɛgɛl ndúmbenyé buóny bá Yésu Kilíse. Agá Ndág ya Nsɔ́m iyaány Gɔdányá línsenyé nuged nág númáabá nuɔsɛ́gɔ́n feké gá medug eméné, 26nɛ́nuán gɔg imbɔbɔnɔ ɛsɛ́ mubús mɔ́ɔŋɔ́ águdambɔn nuged unuány. Ány, ebe gidigid bádiábá Beyúdɛn ganyá bágɔ́lɛns wɔ́. Gɔdányá unyá na bánamana mɔyɛ́d anaány ká, mɔdɔŋ gidigid ádáb mónd mála wɔ́ nŋɔ́bɛnɔ. 27Nsɛ́ Gɔdányá unyá na nsiŋi uwɔ́ eŋényé bá na nugúm gá bɛsɛgɛl gidigid gá buanda ubú Yésu Kilíse máal! Anaány.

Currently Selected:

Lomɛ́ŋ 16: MMU2

Highlight

Copy