Filipiɛ́ŋ 1

Mbígélid

1Yaŋuá Pólo yɔ́ŋɔnɔ́ ebe bálaná Yésu Kilíse nŋɔ́bɛnɔ, na bagɔn bɔ́b, na bá diákɔn bɔ́sɔ́dɔnɔ́ agá giɔ́b gá beédéb gínyá Filíp, inyɛ ɔlɔŋ na Timoté. Dinyɛ basuá bem naga bél buol bá Yésu Kilíse. 2Nsɛ́ bese na bumben bá Gɔdányá Sié wasɔ, na Ɔgúnɔ́ wasɔ Yésu Kilíse bá nanɔ.

Buol bá Pólo na gugumaan gá Ndág ya Nsɔ́m

3Nguéŋen Gɔdányá wam giod gá bese gɛsɛgɛl gidigid inúbɛ́dáganá; 4gɛsɛgɛl mbísógólonyó gán góbúsió banuá gidigid, ngúbísógólonyi na ɛyayɔ, 5gágual ká numadiágɛ́n ɔmbɔ́g gá gudúmbenyi Ndág ya Nsɔ́m, guabanyɛ́g buɔ́s bóbusió, gusiám ínen. 6Ngúlɛnsaan bese na bese ká Gɔdányá umáabányɛ́g ginɔg gá buol ubuány aganuá, ugabaan nobusió na guládaan bú guám anyɛ́ Yésu Kilíse énúlené. 7Búnyɛ nɔ́ agá ndényé ká ngúnúbɛ́dága bem wanɔ, nunyɛ agám gá ɔdɛm. Gágual ká nugúbianan andáŋáb gá bese uwɔ́ Gɔdányá mámfá, ta anyɛ́ inyá agá gians gá mbíne nɛ́nuán, ta gɛsɛgɛl imáabá inuanan gá Ndág ya Nsɔ́m ya Gɔdányá. 8Gɔdányá gúlɛnsaan ká ngúnúlɛ́ga banuá bem anyɛ́ Yésu Kilíse núlɛ́ganá. 9Nguɔ́yɔɔn Gɔdányá agám gá mbísógól ká ɛlɛ́ga yán biɔ́yɛ́kɛnɛn gudúmbídenyi, nɔ́lɛ́ns meliŋítas, nuónd núsɔ́ŋɔ́na manda bese na bese, 10ká núbá agá edény wá gúlɛnsaan manda má bese, ány nugabá begubeg, kandɛ gɛbɔ́liɔ́ buɔ́s Kilíse genuúl. 11Gɔdányá gaal ká bielínyélínyé bán gidigid bá ndényé agá bugaga bá Yésu Kilíse ká núgúmenyi nuónd núbúlígenyi Gɔdányá.

12Belimen nguámba ká núlɛ́ns ká ubú búnyá gunŋámɛ́n águal ká Ndág ya Nsɔ́m ábaan nobusió, 13anaány musia gidigid múbídenyé gians gá ngɔ́mɔnɔ wa ɔgɔn na bɔsɔ́gɔ́ bóndodió nyá gɔlɛns ká inyɛ agá gians gá mbíne gágual ká nguálaan Kilíse buol. 14Anyɛ́ beédéb giod mɔ́ɔb ká inyɛ agá gians gá mbíne, obóndonyi ɔdɛm agá Ɔgúnɔ́ gudúmbídenyi nɛnama nɛ́nyá abábɛ́gɛ́ndɛ́naan giod gá gúdúmbenyinyi band Ndág ya nsɔ́m ya Gɔdányá kandɛ buwa. 15Búnyɛ meliŋítas nɔ́ ká gɛdám gúdúmbenyi Ndág ya Nsɔ́m ilɛ́ŋaná Kilíse, gágual ká bágúŋalan yaág, bónd básáŋa. Bɔsɔ́gɔ́ bómodió gúdúmbenyi yɛ́ gɔg na bɛnɔ́g bá ɛmbɛ́dágɛ́dɛn. 16Abaány guála anaány gágual ká bágɔ́lɛ́ga Kilíse, bálɛ́nsaan ká inyɛ aya gá guɔgɔnɔgɔn Ndág ya Nsɔ́m. 17Bóndodi gúdúmbenyi Ndág ya Nsɔ́m ya Kilíse agá giseŋenye na yág, na ɔmbiɔ́yɔ. Bágúbɛ́dága ká bɔ́gúŋɔ́yɛ́kɔnɛn guɔ́bɛ́g agá gians gá mbíne. 18Búdigúnsésenyi, ta búbá na bɛnɔ́g bá duged, ta na biád bá duged, Ndág ya Nsɔ́m ya Kilíse gúbiɔ́yɔ. Nguɔ́bɔɔn bese, ngabaan nobusió na guɔ́bɔɔn bese. 19Ngúlɛnsaan ká ngadáŋáb gidúgune agá mbísógól yanɔ, na bugaga bá Ɛsámb yá Mefúny yá Yésu Kilíse. 20Búbú mbídényé fiaŋ fiaŋ, yond yágaan ɔdɛm gá bú, ká ndɛbiá ɔduɔ́ gɔnɔ́. Gá guán gɔg, gubanyɛg nɛ́nuán, na agá bɛsɛgɛl gidigid. Ngúlɛnsaan agám gá ɔdɛm cácácá ká budúumé bá Kilíse gebídíye agám gá nuɔ́l, ta nsɔ́dɔɔn, ta ngú. 21Búnyɛ ká yaŋuá, Kilíse nyɛ gusɔ́d gám, ta gúbá ká ngú góbusió bá Kilíse, imádáŋáb bɛnɔ́g bá bɛnama. 22Ímábaan nobusió na gusɔ́dɔɔn, inyɛ bágual ginɔg gá buol, kányɛ ndiálɛnsáná ubú búnyá ká yéyid. 23Inyɛ gadágadá na ɛmbɛ́dágɛ́dɛ́n ɛ́yandɛ, ngúbíléne ká yɛɛ́b, mbá ɔlɔŋ na Kilíse, búbú búnyá bese. 24Gulɔbɛn aya egegus nyɛ bese gán góbusió. 25Buád buanda nlɛnsáná ká ngɔlɔbɛn, ngabá agán gá buáy banuá gidigid ká ínuáganɛn ɔmbɔ́g ká núgúmaan na bɛdɔdɛn agá nŋádáb. 26Ány, anyɛ́ ngonúsiondo aganuá, nugand gubá sɔ́n agá bɛdɔdɛn gám góbusió agán gá nɛlad na Yésu Kilíse.

Gɔbaan nobusió na gidul

27Ngunuɔ́yɔɔn buanda táŋ búmoóm, ɔ́nusɔ́dɔɔ́n anyɛ́ Ndág ya Nsɔ́m ya Kilíse ɔ́yɔnɔ́, nɛnama nɛ́nyá ká ímoól gá gúsinuán, ta ndɛbá nanɔ, yɔ́bɔɔn bágála bese gán góbúsió, yɔ́bɔɔn bɔ́yɔ ká nunyɛ baladán tídíŋ agá ɛdány ímoóm, nunuanan na ɔdɛm ómoóm, nuala buol gá guádáb ugú Ndág ya Nsɔ́m nyá gunuéŋín. 28Nudibiánán buwa na bambɛ́lɛmbɛ́l bán, búgabá bulinsi gɔ́b góbúsió ká bányɛ agá nŋili ya bunyím, banuá nunyɛ bulinsi agá nŋili yá gisódio gíleniné aga Gɔdányá. 29Bese waga uwɔ́ umáal ká nuádáb Kilíse, nuónd nuɔ́bɛ́gɔɔn gág góbúsió. 30Gá guán, digúnuanan ɔlɔŋ nanɔ, imanuánán nsua, unuánaan, imányá gubaan nobusió na gunuanan, nugúlɛnsaan nɔ́.

Currently Selected:

Filipiɛ́ŋ 1: MMU2

Highlight

Copy