Matáyoso 22

Nsab ya ɔnyɔ́ wá gigiŋ

(Lúk 14.15-24)

1Yésu uwɔb nobusió na gugálaan biŋi bá band agá nsab, uganyɛ ká: 2«Bufuŋ bá muana gubɛ́fuáganan gianta gá ɔnyɔ́ ofuŋ máadánaán anyɛ́ mɔɔn waga méegiŋé. 3Uwadɔ́m bél buol bág ká boól bábílaán band ɔbɔ́ umáabɛ́laán gá budɔmb. Band abaány dimamba guúl. 4Uwand gudɔ́m bél buol bóndodió ká báb guɔyɛ́dɛ́n band ɔbɔ́ umáabɛ́laán ká: “Buand gidigid ganyɛ budábɔ́nan, nsɔɔ́nɔ bɛnɔ́m bám bá mélúke na bidug bínyá na madag. Nsɛ́ boól gá ɔnyɔ́ wá gigiŋ.” 5Band ɔbɔ́ úmáabɛ́laán ta gubɛ́guasɛd, abádɔ́mbaan; ewe agág gá gisien, ewúné gág gá nionyi; 6bɔsɔ́gɔ́ bóndodió abádɛgaan bél buol ebégide bɔ́ bese na bese, ɔbɔɔ́n bɔ́. 7Ofuŋ uwɔ́b ilób; uwadɔ́m musia mág ká béfúfi bɛmbuánsɛl ibiány bond bɔ́dɔgɛn tísɔn wɔbɔ. 8Agá gélem ány, uganyɛ gá bél buol bág ká: “Manyán má gigiŋ ganyɛ madábɔ́nan gɔg, band ɔbɔ́ inyá gɔbɛ́laan dɛbá ebé básáagusigɛmanan na ɔnyɔ́ uwaány. 9Ánɔb agá mádɔgana má nŋili nɔbɛ́laan band gidigid ɔbɔ́ núgɔgúnufuɔg kɔ́, nuɔ́yɔɔn bɔ́ ká bóloon gá ɔnyɔ́ wá gigiŋ gám.” 10Bél buol abásans na duás, abábɛ́laan band gidigid ɔbɔ́ bɔ́mɔ́ɔfuɔ́gɔɔ́n, babɛ anɛ bá bese, gɛndaŋiá gá ɔnyɔ́ igiófuóg tás. 11Ofuŋ máal ubíŋín agá gɛndaŋiá ká ubisonyi band bómoólóno, uwaán mɔnd kɔ́ umáal udibiánan gɛla gá budɔ́mb. 12Uganyɛ gág ká: “Aguá, esebíŋín aya nanyá kand gɛnɔ́g gá gɛla gá budɔmb e?” Mɔnd uwaány ta guás. 13Ofuŋ ganyɛ ká bél buol bág gɔ́g ká: “Ánɔgɔ́d wɔ́ na bɛgɔnd na ɛmbɔ́g, nuéti wɔ́ agá ɔɔnd agá mbíne, kɔɔ́m báganúbáŋa bábíbanda bigeled.” 14Bunyɛ ká, giod gá band nyɛ na ɔmbɛ́lɛ́gɛnɛn, beyídén nyɛ́ siɔdɛd.»

Taás wa Sesála

(Mál 12.13-17; Lúk 20.20-26)

15Agá gigúl igiány, Bafalisiɛ́ŋ abaál gilumen gá gual ká, bámbɛd nŋili yɛ́ gudɔ́lɛ́g Yésu na nŋófuny 16Abádɔ́mɛ́n wɔ́ bafɔ́nɔfɔ́n bɔ́b na band bá ɛdɔgɛ ya Elod ká bál gág ká: «Ofúnyifúny, dɛgɔ́lɛnsaan ká anyɛ mɔnd wa meliŋítas, na ká egúfunyifunyi agá meliŋítas manda ɔmɔ́ Gɔdányá diófonó ká diála. Edigúdíne ta mɔnd gágual ká adɛgɔ́lɛ́ŋa bugianta bá band. 17Diɔ́yɛ́dɛn gɔg yɔw mbɛ́dágɛdɛn: Dɛgɔsɛgɛmanan gunaman taás wa ofuŋ uwɔgɔn bábɛ́laná ká Sesala e, dɛdɛnama e?» 18Anɛ́ Yésu máalɛnsaán mebénd mɔ́b uganyɛ ká: «Béndi muala, Ɛmɔnd esie! Nugúŋdambá góbusió bá giág e? 19Énuŋdíye mbámb yá muonyi ɛyɛ́ bánamaná tás na yɛ́.» Ebédiyé wɔ mbamb ya muonyi. 20Uwófún gɔ́b ká: «Ányá unyá na giíyé na inyɔ́ŋɛ esie?» 21Obondinyi ká: «Má nyɛ́ má ofuŋ uwɔgɔn bábɛ́laná ká Sesála.» Uganyɛ gɔ́b gɔ́g ká: «Ubú búnyá bá Sesal nuéŋen Sesala, bá Gɔdányá nuéŋen Gɔdányá.» 22Anɛ́ bɔ́mɔɔ́b anaány, abáb gá guméŋémeŋ, obósió wɔ ány abádɔ́mb.

Band ebeguen ganyɔgan e?

(Mál 12.18-27; Lúk 20.27-38)

23Buɔ́s ubuány, Basaduseyɛ́ŋ bányá band bádiádábáná ká guanyɔg gá ebeguén gabá, abábɛ́sɛdɛnɛn wɔ́ obófún wɔ́ ká: 24«Ofúnyifuny, Moyíso mɔyɛ́d Ká: Mɔnd mégú kand mɔɔn a, endimen waga sién úgɔ́l gisi gág ubiénin wɔ́ baan. 25Agasuá, belimen banɔ́mandɔ bátɛndat nomo mabá. Wó busió uwegiŋ agánd, mɔnd uwaány uwegú, anyɛ́ umáal udɛbiá mɔɔn na agany, endimen wa gándɛ uwɔlɔbɔn gisig. 26Ubuábiál nɔ́ na wa gandɛ, wa gádadɔ guám gá wa gadɛ́ndatɔ nomo. 27Egé gélém ány agánd uwegú sɔ́n. 28Buád buanda diófonó ká, gá guanyɔg gá ebeguén, agánd ánɔ́bá wa ány e? Anyɛ́ gúnyá ká belimen bem mabɛ́dɛ́gɛ́n wɔ́ e?» 29Yésu guondinyi ká: «Nunyɛ agá gɛnana gágual ká nudɛ́gɔ́lɛnsaan ta gugal gá Gɔdányá, ta bugaga bá Gɔdányá. 30Bunyɛ nɔ́ ká anɛ ebeguen ganuányɔgaan banɔ́mandɔ digegiŋe bagánd ta bagánd sɔ́n. Band gidigid gɔg gabá anɛ ɛngɛlɛs ugumuána. 31Gá ubúbúlɛ́ŋaná guanyɔg gá ebeguén, nudɛmaban gugál gá Gɔdányá mɔ́ɔnuɔ́yɛ́dɛ́n ká: 32Inyɛ Gɔdányá wa Ábalaháma, Gɔdányá wa Ísak, Gɔdányá wa Yákɔba e? Ndɛbá Gɔdányá wá ebeguén, gɔɔ́gɔ́ wa bɔgɔ́siɔ#22.32 Na Ábalaháma, na Íság, na Yákɔba dɛmand gubá bɔgɔ́s gigúli Gɔdányá mɔɔyɔ́ buóny ebue, bámabá bagány aga masia mág, banyɛ bɔgɔ́s. Búbú búdíyenyé ká beguén ganyɔgan..» 33Biŋi bá band bámáabá kɔ́ máal nɔ guɔ́b anaány, ebéméŋémeŋ gufúnyifunyi gág.

Gisele ɛgɛgɔn

(Mál 12.28-34; Lúk 10.25-28)

34Bafalisiɛ́ŋ máal ná guɔ́b ká Yésu sefuug basaduseyɛ́ŋ eŋidi, ebélumen. 35Olinsi bisele wɔbɔ ondodi guófún Yésu nŋófúnyi ká únéni wɔ́ uganyɛ ká: 36«Ofúnyifúny, gisele gɛ́gɔn agá mbɔbɔnɔ ya bisele nyɛ gínum e?» 37Yésu guondinyi wɔ́ ká: «Bíléne Ɔgúnɔ́ Gɔdányá wɔw na ɔdɛm wɔ́w gidigid, na ɛdany yɔ́w gidigid, na ɛmbɛ́dágɛ́dɛ́n yɔ́w gidigid. 38Gɛ́gɛ́ gínyá gɛgɔn, gɛ́gɛ́ gá busió. 39Gá gándɛ gínyá sɔ́n anyɛ gá busió nyɛ ká: Bíléné sɔ́gɔ mɔnd a anyɛ́ ébíbílénené aŋuá muát. 40Ubú bisele gidigid ɔ́yɔnɔ́ na ubú mubús mɔɔ́yɔ́ guámanɛn agá bisele ebie biándɛ.»

Na Kilíse na Défide

(Mál 12.35-37; Lúk 20.41-44)

41Anɛ́ Bafalisiɛ́ŋ mabá bábɛ́gɔ́sɛ́dáná, Yésu guófún bɔ́ ká: 42«Ɛmbɛ́dágɛ́dɛ́n yanɔ gá buóny bá Kilíse Odúgúny nyá giág e? Unyɛ wa nɔgɔgɔ nány e?» Obóndinyi wɔ́ ká: «Ná Défide.» 43Uganyɛ gɔ́b ká: «Góbusió bá giág gɔ́g Défide, anyɛ́ Ɛsámb yá Mefúny máabá naga, umáabɛ́lɛ́gɛn wɔ́ ká Ɔgúnɔ́ wɔyɔ ká:

44Ɔgúnɔ́ águal gá Ɔgúnɔ́ wám ká:

Lukúmín agá ɔmbɔ́g ɔnɛ́m wám

Gutɔ guám anyɛ́ nŋenúgusi bambɛ́lɛ́mbɛ́l bɔ́w, yaág bɔ́ gúsigusié wa ambana yɔ́w e? 45Défide mábɛ́laán wɔ́ gɔg ká Ɔgúnɔ́ wám, Kilíse bá mɔɔn wá Défide nanyá e?» 46Mɔnd wagual ká wóndinyi wɔ́ dɛmáanyɛ́g. Gubanyɛg buɔs ubuány, ta mɔnd wagumag guófún wɔ́ nŋófúny dɛmabá.

Currently Selected:

Matáyoso 22: MMU2

Highlight

Copy