Galát 3

Pólo guófoon iŋófúny

1Eéh! Banuá Bagalát nunyɛ banyán e, ányá muát unyá gunúnéŋ? Bémenúdémbúgényí nanyá Yésu Kilíse méegú agá bɔdɛ́d bágɛ́sanda! 2Ónuondínyí nŋófúny yám eye táŋ imoom: Numadáŋáb Ɛsámb yá Mefúny gigúl numáadáb Ndág ya Nsɔ́m. Nudɛmadáŋáb yɛ́ gágual ká numalá anyɛ́ bisele ɔ́yɔnɔ́, ɔ́gɔ́ ɔ? 3Kás buege ubuány e? Numabanyɛ́g na Ɛsámb yá Mefúny, nɛ́nuán nuguámba ká nuéyibi na bugaga bán bá muát é? 4Manda gidigid mányá gunúbiálaan águbá gilé e? Ngúbɛ́dága ká mádɛ́gubá gilé. 5Gɔdányá gúnuéŋeen Ɛsámb yá Mefúny, wala mesey gadágadá wanɔ gágual ká numáadáb Ndág ya Nsɔ́m, saá gágual ká nugúala anyɛ́ bisele ɔ́yɔnɔ́.

Ndán ya Ábalaháma

6Saá nugúlɛnsaan ká Ábalaháma mondí ɔdɛm wág aga Gɔdányá, buád buanda Gɔdányá máan wɔ́ osi wa mɔnd agág gá eŋís e? 7Ánɔlɛns gɔ́g ány ká; band bádábaná Gɔdányá meliŋítas nyɛ nugɔgɔ ná Ábalaháma. 8Gɔdányá mɔyɛ́d feké agá Musamb má Imbɔbɔnɔ ká ugaal ká band bádiábáná Beyúdɛn bá besi agág gá eŋís, bámáadáb#3.8 Nid 12.3. Buád buanda múmɔ́ɔyɛ́d gisiósio ká: Gɔdányá gafɔn mɔdɔŋ gidigid agá gélem gá Ábalaháma. 9Ábalaháma máadáb, uwabia gɛfɔn, anaány sɔ́n band bádábaná ganúbá bafɔnán gɔɔ́gɔ anyɛ uwɔ́. 10Búnyɛ ká band gidigid báganá ɛdɛm sɔ́b ká báládaan bisele nyɛ bɔlɔmɔn, gágual ká búnyɛ buɔ́ŋɔ́n agá mbɔbɔnɔ ká: Mɔnd gidigid udiófuógónyó buanda gidigid búnyá buɔ́ŋɔ́n agá mbɔbɔnɔ ya bisele nyɛ ɔlɔmɔn. 11Gufuógonyi bisele diguóndonyi mɔnd osi ogóbusió bá Gɔdányá, gágual ká búnyɛ́ buɔ́ŋɔ́n ká: Mɔnd nyɛ osi ogóbusió bá Gɔdányá gágual ká ugúondonyi ɔdɛm agagá, ugɔsɔ́dɔɔn mbanda gusɔ́d. 12Búnyɛ buɔ́ŋɔ́ŋ sɔ́n ká: Mɔnd ufuógonyó bisele gidigid ɔwɔ́ ugɔnúsɔ́d. Anaány gúdíyenyi ká gufuógonyi bisele dɛbá buanda búmoom na guondonyi ɔdɛm aga Gɔdányá. 13Kilíse méeŋín bɛnama ká údiáŋɔ́n gá gɛlɔm gá bisele, gɛlɔm igiádɛgɛn wɔ́ gás góbusió. Anyɛ́ búnyá buɔ́ŋɔ́n ká: Gɛlɔm nyɛ na mɔnd gidigid bámánɔdɔ́ŋ wɔ́ agá bɔdɛ́d bá gɛsanda. 14Kilíse máal anaány ká bɛnɔg bá manda ɛbɛ́ Gɔdányá mɔ́ɔyɛ́d ká ugéŋin Abalaháma, band bádiábáná Beyúdɛn dáŋáb mɔ́ sɔ́n góbúsió bá Kilíse. Búnyɛ́ sɔ́n ká dɛ́dáŋámb Ɛsámb yá Mefúny ɛyɛ́ umáadɛ́dánɛ́n gágual ká diguéŋeen wɔ́ ɛdɛm saás.

Na ndán na bisele

15Buám, ínúfá bulinsi agá manda diánaná mɔɔ́s mem: Mɔnd mósió mbɛ́dɛ́na yaga anyɛ́ guófonó, mɔnd omodió dɛbá béguéli ɔ́gɔ guɔ́yɛ́kɛnɛn buanda agá mbɛ́dɛ́na iyaány. 16Ánuán ká Gɔdányá méeŋín Ábalahám na nɔgɔgɔ nág ndán búgányɛ gianta gá gɛsɛgɛl. Búdɛ́bá ká: «Na dɔgɔgɔ dág» anyɛ búnyɛ́ bá band giod. Búnyɛ́ gá mɔnd táŋ omoom, ɔwɔ́ unyá Kilíse ugenúbíbién agá nugɔgɔ nág, gɔɔ́gɔ anyɛ́ búnyá buɔ́ŋɔ́n agá imbɔbɔnɔ. 17Nguámba guɔyɛd ká Gɔdányá medúm guala mbɛ́dɛ́na yaga anyɛ́ guófonó. Bisele bá Moyíso mesién biíl agá gélem gá mbɛ́dɛ́na iyaány búgányɛ duɔŋ dɔgɔ́n dúní na duɔŋ nitín na duát, bisele ibiány dɛ́bá béguéli mbɛ́dɛ́na iyaány. 18Búmábá ká buanda búleniné agá ndán ya Gɔdányá gúlenin agá bisele, búdɛ́bá sɔ́n gugál umɔ́ɔyɛ́d. Gágual ká, agá ndán Gɔdányá méedíyé Ábalaháma bese waga. 19Anyɛ́ búnyá anaány gɔg, buol bá bisele búmáabá búnúm e? Bímɔbiɔ́yɛ́kɛ́nɛ́n ká bídíye band ká bámayál bisele, gɔb águám anyɛ́ nɔgɔgɔ ná Ábalahám ɔnɔ́ ndán eye nyá gág góbúsió ganúsiam. Gɔdányá méeŋín ɛngɛlɛs ság bisele ká béŋin mɔnd, waád mɔnd uwaány sidúmbínyí band bɛ́. 20Digúlɛnsaan ká edúmb#3.20 Búdɛ́bá mɔnd udúmbenyé gugál, mɔnd bámáadɔ́mbɛ́n gág ká béŋin band buanda. gúdélímen gadágadá wa band. Agá giáy gá ndan, búdimóofónin Gɔdányá edúmb, Gɔdányá nyɛ omoom. 21Anaány gúnyá ká bisele gúnúgúne indán sá Gɔdányá e? Buákó, saá anaány! Búmábá ká bisele Gúsódonyi band, gesí bíguóndonyi bɔ́ sɔ́n besi ogóbusió bá Gɔdányá. 22Musamb má Imbɔbɔnɔ guɔ́yɔ gɔg ká band gidigid nyɛ biɔ́l bá gɛfal, búnyɛ́ anaány ká ndán ya Gɔdányá bífuógidonyi gɔɔ́gɔ gá giondiɔdɛ́mɔ́ gá band bádábaná Yésu Kilíse.

23Gisiósio ká guádáb siám, dígubá agá buɔ́l bá bisele guám anyɛ́ Gɔdányá nyá gudídíye nŋili ya gual ká diéŋin ɛdɛm sás gá Yésu Kilíse. 24Búnyɛ ká bisele águbá anyɛ ogiíg wasɔ ká bídiéndenyi gá guám aga Kilíse, anaány ká, Kilíse na gusiám, Gɔdányá dióndi besi gágual ká díguéŋin wɔ́ ɛdɛm saás. 25Nɛ́nuán guádáb nyá gusiáma, bisele dɛgábá sɔ́n anyɛ ogiíg wasɔ. 26Nunyɛ banúa bem baan bá Gɔdányá góbúsió ká nuguéŋeen Yésu Kilíse ɛdɛm sán. 27Bémenúduú agá ɔfɛ́n wá Kilíse, nɛ́nuán nuganyɛ na malɔŋ mág. 28Dɛganyɛ buanda táŋ búmoom ogóbusió bá Gɔdányá; gidánduna dɛgábá na Beyúdɛn, na bádiábáná Beyúdɛn, na biɔ́l na bádiábáná biɔ́l, na banɔ́mandɔ na bagánd. Banuá bem nunyɛ buanda táŋ búmoom agá Yésu Kilíse. 29Númábá band bá Kilíse, anaány gúnyá ká nunyɛ banuá sɔ́n nɔgɔgɔ ná Ábalahám. Manda mem Gɔdányá máadánɛ́n wɔ́ nugadáŋámb mɔ́.

Currently Selected:

Galát 3: MMU2

Highlight

Copy