Bielínyélínyé 7

Bugél bá Ítien

1Ɔgɔ́n wa bɔgɔ́gɔ uwófún wɔ́ ká: «Ebue ubú bɔ́yɔnɔ́ gɔ́w nyɛ meliŋítas e?» 2Ítiene guondinyi uganyɛ ká: «Belimen na besié bám, ɔ́numbɛ́dɔ́lɛ́gɛ́n. Gɔdányá unyá na nugúm máamɛ́n Sié ɔgúnɔ́ wasɔ Ábalaháma gigúl ɛgɛ́ umáabá Mesopotamí umányɛ udɛɛ́b guelukúmín agá gus gá Álaan, 3uganyɛ gág ká: Adɔ́g ɔgɔ́w gá gɛdɔŋ na ɔgɔ́w gá nigúl, áb aga gɛdɔŋ ɛgɛ nŋenúgúdíye. 4Ábalaháma gɔg guadɔgaan agá gɛdɔŋ gá Bakaladeyɛ́ŋ guelukúmín Álaan. Sié máal úmégú, Gɔdányá guéli wɔ́ kɔ́ gudúmbi wɔ́ agá gɛdɔŋ ɛgɛ́ nunyá gá gɛ́ nɛ́nuán. 5Ány, udiméeŋin wɔ́ gus agá gɛdɔŋ igiány, ta yénséns yá gus yá gual ká údág gɛgɔnd kɔ́. Ta nɔ́, uwadánɛ́n wɔ́ ká ugeéŋin wɔ́ gɛdɔŋ igiány. Gínúsién gíbá gá baan bág ta udiánd gúbá, ta anyɛ́ Ábalaháma máal udibiánán mɔɔn gá gɛ́sɛgɛl igiány. 6Ana Gɔdányá máagálá gág: Baan bá baan bɔ́w gɔsɔ́dɔɔn maán, kɔ́ bégeéyi bɔ́ biɔ́l, bésésenyi bɔ́ duɔŋ dɔgɔ́n dúní. 7Yaŋuá Gɔdányá gɔg nŋegélenyi gɛdɔŋ ɛgɛ́ báganúbá kɔ́ gá buɔ́l. Agá gélem ány, bágadɔ́gaan kɔ́, bósiondoón agá kɔɔ́m ege bésimbúlígényí kɔ́#7.7 Moóny Ítiene máagálá, umɔgɔ́lɔɔ́n mɔ́ agá mbɔbɔnɔ ya Nidúmin 15.13-14, na ya Ekɛsódo 3.12. . 8Gɔdányá gual nɛlad nɔbɔ ná Ábalaháma. Bulinsi bá nɛ́ búnyá buensi. Anaány umáans mɔɔn waga Ísaka, umámán gúbíbién búgányɛ medúg mányɛ́manyɛ. Ísaka sɔ́n uwans Yákɔba, Yákɔba sɔ́n guans baan bág bát na bándɛ, bɔ́bɔ́ bányá besié ɔgúnɔ́ bás.

9«Anɛ́ baan bá Yákɔba máabá na yaág, ebédú endimen wɔbɔ Yɔ́sɛba ká úbá giɔ́l agá gus gá Esípit. Ta anaány, Gɔdányá uwabá naga, 10uwaal ká Yɔ́sɛba ámɛ́nɛ́n agá meyú gidigid mámáabá agág góbúsió, uwéŋin wɔ́ nsiŋi, uwond uwaal ká waán bese agá eŋís yá Falawɔ́ŋ, ofuŋ wa Esípit. Ofuŋ uwaány uwadág Yɔ́sɛba ngɔ́mɔnɔ wa Esípit, uganyɛ gá ká wéndenyi manda má nuyá nág. 11Kányɛ ɔndɔmɔ máasiám agá gus gá Esíbit na Kanaháŋ. Muyú mabá giod. Besié ɔgúnɔ́ dɛmabia nŋili ya gubia buand bá gunyá. 12Anɛ́ bɔ́mɔɔ́b ká manyán nyɛ Esíbit, Yákɔba gudɔ́m Besié ɔgúnɔ́ bás kɔ́ gá gɛsɛgɛl góbusió. 13Anɛ́ bámáab gá gɛsɛgɛl gá gándɛ, Yɔ́sɛba uwaal ká belimen lɛ́ns wɔ́. Ubuál ká Falawɔ́ŋ lɛns niílín nág. 14Yɔ́sɛba gudɔ́m gɔg band ká bɔɔ́gɔ́l sié waga Yákɔba na nigúl nág gidigid. Nímabiánán band etín ádadɔ na bunyo. 15Yákɔba gudúnúg Esípit, uwenegú kɔ́ na besié ɔgúnɔ́ bás sɔ́n. 16Abábɛ́dɔ́gaan bɛlɔ́ŋ bɔ́b gá guonyónón bɔ́ Sísɛ́m agá gɛbɛl ɛgɛ́ Ábalaháma mɔɔ́nd gá baan bá Amɔ́la sié wa Sísɛ́ma.

17«Anɛ́ gigúl gá ndán ɛyɛ́ Gɔdányá máadánɛ́n Ábalaháma máal gígányɛ egúy, band bá nigúl nás ebédeg uguány Esípit ta bɔ́guɔyɔ, 18Kánɛ ofuŋ uwɔgɔ́s máal udɛlɛnsaán Yɔ́sɛba mɔ́ɔgɔ́l niluku agá gus gá Esípit. 19Ofuŋ uwaány uwenéŋ band bá gɛdɔŋ gás, uwabanyɛg gusésenyi bá sié ɔgúnɔ́ bás, ugɔ́da bɔ́ ká bábɛ́yɛ́bɛd biendiny bɔ́b, ká bísién bíguénén. 20Gigúl igiány gɔg Moyíso méebíbién. Umabá bunɔ́g agá eŋís yá Gɔdányá. Ebélebe wɔ́ agá gians gá sié iyól ɛ́dadɔ. 21Anɛ́ bámáal na gubɛ́yɛ́bɛd wɔ́, gɛgɔna gá Falawɔ́ŋ gubád wɔ́, guelebe wɔ́ anɛ mɔɔn waga wá muát#7.21 Alɛ́ŋɛ́d Ɛkɛsódo 2.3-10.. 22Anaány band bá Esípit méefúnyifúnyí wɔ́ gɔlɛns gɔ́b gidigid. Uwasɛɛ́y gianta gá mɔnd gudúmín agág gá gugál, na bielínyélínyé bág.

23«Umalá ugany na duɔŋ etín ándɛ, mbɛ́dágɛ́dɛn ya gual ká woónd aga belimen bág baan Bísalayɛ́l iyiílín wɔ́. 24Anɛ́ umáan mɔɔn wa Esípit gide endimen waga wa Ísálayɛl ondodió, uwebísúm góbúsió bá endimen uwaány, uwɔɔ́n mɔnd wa Esípit uwaány. 25Umabɛ́dágá ká belimen bág gagúsɔ́ŋɔ́n ká, Gɔdányá gadɔ́mbɛ́n agagá ká wáŋɔ́n bɔ́. Bɔ́bɔ́ ta guɔ́b nɔ́. 26Gúbálánana, Moyíso uwɔ́fuɔg baan Bísalayɛ́l bándɛ bábágalabagal. Uwɔ́ ká wádɔɔ́n bɔ́, uganyɛ gɔ́b ká: “Begúl bám, nunyɛ belimen, góbusió bá giág núbagalabagala e?” 27Sɔ́gɔ́ umáabá umányɛ́ganɛn uwedidig Moyíso uganyɛ gág ká: “Ányá unyá gugudág osúmb moóny agás gá gadágadá e? 28Aguámba guŋɔ́n anyɛ́ ányá guɔ́n mɔɔn wa Esípit búyo e?” 29Moyíso máal úmɔ́ɔb anaány, uwɔbínɔ, uwabanyɛg, guɔsɔ́dɔ́n agá gɛdɔŋ gá Madiáŋ. Uguány, uwebién baan banɔ́mandɔ bándɛ.

30«Duɔŋ etín ándɛ máal dúmadɔ́mb, agá giɔ́ndɔ́ gínyá egúy na nɔgɔnd ná Sinayí, ɛngɛlɛs ya Gɔdányá iyámɛ́n Moyíso agá bɛlámb bá yoóg bimáabá bíbégesenyi gidudu. 31Moyíso uwɔb gá guméŋémeŋ anyɛ́ umáan anaány agá giényigie. Umáal úbɛ́sɛdɛn ká úbísónyi bese, uwɔɔ́b ekelu wá Ɔgúnɔ́ wɔ́yɔ gág ká: 32“Inyɛ Gɔdányá wa besié ɔgúnɔ́ bɔ́w, Gɔdányá wa Ábalaháma, wa Ísaka na wa Yákɔba.” Na buwa gidigid, udɛmand gumag gulɛ́ŋɛ́d. 33Ɔgúnɔ́ gányɛ gág gɔ́g ká: “Élí imfaŋáŋá sɔ́w, gágual ká, kɔɔ́m ɔgɔ́ ányá kɔ́ ndényé nyɛ gɔdɔ́búnɔɔn. 34Nŋuán yaŋuá muát anyɛ́ bésésenyé nigúl nám agá gus gá Esípit. Nguɔ́b gubídáda gág, gɔɔ́gɔ́ mmenuúl ká yáŋɔ́n nɛ́. Mmágɔdɔ́m, ɛmbɛ nɛ́nuan Esípit.”

35«Moyíso waád uwaány baan Bísalayɛ́l méen guɔ́bɛ́n wɔ́, bágányɛ ká: “Ányá unyá gugudág ofuŋ na osúmb moóny agás gá gadágadá e?” Uwɔ́ waád Gɔdányá máadɔ́m wɔ́ anɛ ofuŋ na osód. Ugadɔ́mbɛ́n aga ɛngɛlɛs umáamɛ́n wɔ́ agá gidudu. 36Wád Moyíso uméemí baan Bísalayɛ́l Esípit, uwala bigégén bá manda, na bisey agá gus gá Esípit, na agá manáŋ abɔ́sa uwobólodod, na agá giɔ́ndɔ́ duɔŋ etín ándɛ. 37Uwɔ́ waád umɔ́ɔyɛ́dɛ́n baan Bísalayɛl ká: Gɔdányá ganɔ́dɔ́mɛ́n ibús anɛ yaŋuá. Ígabá endimen wanɔ. 38Uwɔ́ waád agá gilumen gímáabiálá agá giɔ́ndɔ́, umabá gadágadá wa besié ɔgúnɔ́ bás na ɛngɛlɛs imáagálá gág agá nɔgɔnd ná Sinayí; uwɔ́ umáagɛ́ndɛ́gɛ́n gugál gá gisódio, uwedídúmbínyi gú. 39Ta anaány, besié ɔgúnɔ́ bás méen guɔ́bɛ́n wɔ́, ebébise wɔ́, abaál bónd Esípit. 40Bágányɛ gá Álɔŋɔ ká: “Diáyɛ́ŋánɛ́n bagɔdányá bányá ká bánda nasɔ, gágual ká didigúlɛnsaan buand búnyá gual Moyíso uméediémí agá gɛdɔŋ gá Esípit.” 41Abálɔŋ mɔɔn wa búlúke, ɔbɔ́nɔɔn bú manyam, abála budɔ́mb, bábálaga gá buanda ubú bɔ́bɔ́ muát bámáalɔŋɔ. 42Gɔdányá uwedúm bɔ́ gélem, uwond uwatɛɛ́n bɔ́ ká bégúmenyi muódód má muana gɔɔ́gɔ́ anyɛ́ búnyá buɔyɛ́dɔ́n agá imbɔbɔnɔ mubús mɔ́ɔŋ. Gɔdányá mɔyɔ́ ká:

Baan Bísalayɛ́l, numɔŋɔ́nɔɔ́n manyam, unuamfánan bibiág

duɔŋ etín ándɛ agá giɔ́ndɔ́ e?

43Ágó, núgubɛ́dɔ́gaan isúŋ yá Gɔdányá wanɔ bábɛ́laná ká Mɔ́lɔk

na giíyé gá Gɔdányá yoódód wanɔ bábɛ́laná Lɛfán,

biíyé ibiány ibí nunyá guala ká núgúmenyi bɛ́.

Ngenuéli ány, nnɔ́ban pát ayáyá Bábilɔn.

44«Agá giɔ́ndɔ́, besié ɔgúnɔ́ bás mabiánán isúŋ yá gulumenen na Gɔdányá. Uwɔ́ umáagálá gá Moyíso, umɔyɛ́dɛ́n wɔ́ ká wáyɛŋan gɛ́ nɛnama nímoom umáanaán. 45Besié ɔgúnɔ́ bás máal ná gubia yɛ́, ebédúmbínyi nɔgɔgɔ unú Yosué méendényí, unuébíŋín na yɛ́ agá gus ɔgɔ́ Gɔdányá máakɔ́ŋɛ́d bɛdɔŋ bɛ́máabá ɔgɔ́b góbusió. Isúŋ iyaány iyabábá kɔ́ gusiám agá gigúl gá Défide. 46Défide waád uwaán bese agá énís ya Gɔdányá. Uwɔ́ guófún wɔ́ bugaga bágúfuág gians gobusió bá Gɔdányá wa Yákɔba. 47Salómɔŋɔ gɔg umáasífuágɛ́n wɔ́ gians. 48Gɔdányá gɔg unyá ayáyá ugumuana dɛgɔ́gɛ́ga agá bians ɛbɛ́ band fuáganá gɔɔ́gɔ anɛ ibús yá Gɔdányá ɔ́yɔnɔ́ ká: 49Ɔgúnɔ́ guɔ́yɔ ká:

muana nyɛ buufe bám,

gus kɔɔ́m ndáganá bɛgɔnd bám.

Kasɛ́ bugiansa nunyá bágumfuágɛn e?

Nŋedúke agá kɔɔ́m génúm e?

50Saá yaŋuá mmáalɔ́ŋa manda amaány gidigid e?

51«Nunyɛ band bá ɛduá gulal, nugúfugeen ɛdɛm sán na idú sán ká nudiɔ́b ɔ́mbɛ́lɛ́gɛ́n wa Ɛsámb yá Mefúny. Nunyɛ anɛ besié ɔgúnɔ́ bán 52Ibús ínúm besié ɔgúnɔ́ bán máal bódióbígí e? Bɔ́mɔ́ɔn ebe gidigid bɔ́mɔ́ɔyɔ́ guúl gá ewe unyá osi. Uwɔ́ waád nɛnuán numánuandɛ́n wɔ́ ɛdɔg, numɔ́ɔn wɔ́. 53Banuá numáagɛ́ndɛ́gɛ́n bisele bá Gɔdányá ɛbɛ́ ɛngɛlɛs bág móosísio, banuá ta gufuógi bí.»

Nigú ná Ítiene

54Gugál uguány uguásɛŋɛn ɛdɛm sá band bá nɛgál ɛnɛgɔn, ebédúm gubandaan Ítiene bikeled na ilób. 55Anɛ́ umáabá gɔ́g ofuógón na Ɛsámb yá Mefúny, uwabɛ́bɔ́lɛ́man muana, uwaán nugúm ná Gɔdányá. Yésu mabá ndényé agá ɔmbɔ́g ɔnɛ́m wá Gɔdányá. 56Uganyɛ ká: «Ɔ́nuɔ́bɔ́! Nguánan muana mufuúnén, Mɔɔn wá mɔnd ndényé agá ɔmbɔ́g ɔnɛ́m wá Gɔdányá.» 57Abaág dugogó, bébígíde idú, bɔ́bɔ́ bem ebebílúgin wɔ́. 58Ebémi wɔ́ agá tísɔn, abáb gá gunɔnɔn wɔ́ adány ká bɔɔ́n wɔ́. Bél bɛ́laluá abátɛ́naan bɛla bɔ́b bá gúmuana agá bɛgɔnd bá giɔmfɔ gá mɔnd ɔfɛ́n ká Sɔ́lɔ. 59Bámabá, bɔ́nɔnɔn wɔ́ adány, uwɔ́ ubísógólonyi wɔyɔ ká: «Ɔgúnɔ́ Yésu, gɛ́ndɛ́gɛ́n gíliíndié gám.» 60Uwabád guguns enú egegus, uwansɛ́d magɔ́gɔ́n, uganyɛ ká: «Ɔgúnɔ́, tɛ́nɛ́n bɔ́ gɛfal egie.» Agá gélem ány, uwegú.

Currently Selected:

Bielínyélínyé 7: MMU2

Highlight

Copy