Bielínyélínyé 21

Gɔ́b Pólo Yelósalɛm

1Dimáal dímáadɔ́gan na bagɔn, idiedúmbi gá gugɔ́l gidoŋ ɛgɛgɔn ká dɛɛ́b kɔɔ́m bábɛ́laná ká Kós. Gúbélénenyi, idiadɔg ány, idianaám Lódɛs. Diadɔgaan ány, idianaám agá tísɔn bábɛ́laná ká Patalá. 2Ány dɛmɔ́ɔfuɔ́g gidoŋ ɛgɛgɔn gímodi gímáabá gɛ́baan agá giéns gá gus gá Finisí, idiabɔ́lɛ́g gá gɛ́, idiadɔ́mb. 3Anyɛ́ dɛmáab guám egúy na kɔɔ́m bábɛ́laná ká Sipɛ́lɛ, idiatɛɛ́n Elua buáy bá ɔmbɔ́g adád wá tísɔn wa Tíl, ɛdɛɛb giáy gá Silí, idiedúnúg Tíl. Kɔ́ búmófoón ká báŋɔna bɛnɔ bɛ́máabá agá gidoŋ ɛgɛgɔn. 4Anyɛ́ dɛmɔ́ɔfuɔ́gɛ́n beédéb agá tísɔn wa Tíl, idiedúmbi kɔ́ nɔbɔ mɔɔ́s mátíndád nomo. Anɛ́ Ɛsámb yá Mefúny méebiés bɔ́, bágányɛ gá Pólo ká udɛɛ́b Yelúsalɛm. 5Dimáal dímédúmbi gɔg mɔɔ́s nɔbɔ, idiand gugɔ́l nŋili. Beédéb gidigid ebénedídílígín na bagány bɔ́b, na baan gutɔ guám agá niámɛ́n ná tísɔn uwaány. Idienegúns enú agá masiá má manáŋ abɔ́sa gá gúbísógólonyi. 6Dimáal díméebígélídenyi, idiabɔ́lɛ́g agá gidoŋ ɛgɛgɔn, beédéb bɔ́bɔ́ obónd ɔgɔbɔ́. 7Basuá dɛmamán ɔŋɛ́nd wás agá manáŋ abɔ́sa, gutɔ guedúm Tíl, idienedélímín Potolemayís. Dimáal díméebígélídi beédéb bá tísɔn uwaány, ediedúmbí kɔ́ buɔ́s búmoom nɔbɔ.

8Gubélénenyi, idiadɔg, idiɔgɔ́l nŋili gá gɔb Sesalé. Ɛdɛɛb agá nuyá ná Fílibe oŋoyi Ndág ya Nsɔ́m. Omoom wá bátíndád nomo béméeyíd Yelúsalɛm, idiagɛ́ga agagá. 9Fílibe mabiánán bindɔ́mbuɔ́ bá babúla bíní bɛ́máabá bɛ́mányɛ bɛ́dɛ́lɛ́ns banɔ́mandɔ. Bɛ́mabá biɔ́yɔ moóny agá ɔfɛ́n wá Gɔdányá. 10Dimabá dimámán gúdúmbi giod gá medug kɔ́, ibús yá Gɔdányá iyásiám, ímóolónín Yudé. Ɔfɛ́n yɛ́ mabá ká Agabúse. 11Ísidɛ́fuɔ́gɔɔ́n, iyɔ́gɔ́l kandá wa Pólo, iyábɛ́gɔ́d bɛgɔnd na ɛmbɔ́g, ɛ́ɛŋ iganyɛ ká: «Ɛsámb yá Mefúny guɔ́yɔ ká, mɔnd unyá na kandá ewe, ana Beyúdɛn ganúgúdá wɔ́ Yelúsalɛm, béŋin wɔ́ agá ɛmbɔ́g sá maán.» 12Dɛmáal dɛ́mɔ́ɔbɔɔn moóny amaány, basuá na beédéb bá Sesalé idiobísógólonyi Pólo ká udɛɛ́b Yelúsalɛm. 13Uwondinyi bɔ́ gɔg ká: «Gá giág nubaŋaná, nuamba sɔ́n gumfá masɔlɔ́gɔgɔ e? Ta bángɔ́d ɛmbɔ́g na bɛgɔnd, yaŋuá nnyɛ abɛ́dábɔ́nán ká yégú Yelúsalɛm góbúsió bá Ɔgúnɔ́ Yésu.» 14Anyɛ́ uméen gúdiɔ́bɛ́n, idielúŋ, diganyɛ ká: «Nsɛ́ nuged ná Ɔgúnɔ́ biál.»

15Agá gélem gá gɛdam gá medug diméedúmbí kɔ́, idiabɛ́dábɔ́na, gá gɔb Yelúsalɛm. 16Bafɔ́nɔfɔ́n bá Sesalé ebénedídílígín, abáb nasɔ aga mɔnd wa gidɔŋ gá Sípɛl umáabiánán ká udɛ́gɛ́ndɛ́gɛn agagá, umabá eŋédéb nsuá na nsuá.

Na Pólo na Sáka mélumén Yelósalɛm

17Anyɛ́ dimáab guám Yelúsalɛm, beédéb abádɛ́gɛ́ndɛ́gɛn na bɛdɔdɛn. 18Mémbelibéli, Pólo uwɔb nasɔ aga Sáka kɔɔ́m bagɔn bá ɔnyɛb máabɛ́gɔ́sá. 19Umáal úméebígélídi bɔ́, uwɔyɔɔn bɔ́ génún génún buand ubú Gɔdányá moófuógí agág gá buol aga ebe bádiábá Beyúdɛn. 20Agá gélem gá gubɛ́dɔ́lɛ́gɔn Pólo, ebédúm gukanya Gɔdányá, bɔ́yɔ gág ká: «Endimen, Águánaan ká aya Yelúsalɛm anyɛ́ dɔns anyɛ dɔns dá Beyúdɛn nyá guádáb Yésu. Bem wɔbɔ nyɛ babɛ́gɔ́dán giod agá bisele. 21Ɛ́nɛ́ ubú bɔ́yɔnɔ́ gɔ́w góbusió, bɔ́guɔ́yɔɔn bɔ́ ká: Egúfúnyifunyi Beyúdɛn bɔ́sɔ́dɔnɔ́ gadágadá wa ebe bádiábá Beyúdɛn ká bábɛ́yɛ́bɛd bisele bá Moyíso. Ɔyɔɔn bɔ́ sɔ́n ká bátɛɛ́n guansa baan bɔ́b, bádíládaán gubá gá Beyúdɛn. 22Diál nanyá e? Bedigesúg guɔ́b ká anyɛ aya. 23Alá ubú digɔgúnúguɔyɛdɛn. Digúbianan aya band béní bányá guéŋin ndán aga Gɔdányá. 24Gɔ́l bɔ́ nuál gisiég gá gɛsɔgɔna, ónd ánám bɛnama gidigid ká bámua bɔ́ ɛduá, anaány ká band gidigid galɛns ká moóny gidigid bɔ́mɔ́ɔyɔ́ gɔ́w góbúsió nyɛ gɛsɔbɔ. Band gaán gɔg ká aŋuá sɔ́n aguánda agá bisele bá Moyíso. 25Díguɔ́ŋɛ́n bɔsɔ́gɔ́ bádiábá Beyúdɛn bányá guádáb Yésu Kilíse manda gidigid dinyá guadɛgɛn. Idiɔyɛd ká: Nudigúsɛgɛmanan gunyánan bulɔ́k bá bisiég. Nudinyánán sɔ́n manɔŋ na bulɔ́g búnyá gubíguún, nudiandá musɔm.» 26Buɔ́s búmáaládaán, Pólo gɔg uwúlén band béní, uwabanyɛg gisiég gá gɛsɔgɔna. Agá gélem gá gisiég, uwɔb agá ɔnyɛb wa Gɔdányá ká wɔ́yɛ́d buɔ́s ubú gisiég gá gɛsɔgɔna ganúmán, wónd udán budug béguéŋeen bɛbiág bá sig mɔnd a.

Giadɛgɛna gá Pólo agá ɔnyɛb

27Mɔɔ́s mátíndád nomo máal mágányɛ ká mámán, Beyúdɛn bá giéns gá gus gá Así abaán Pólo agá ɔnyɛb wá Gɔdányá. Ebéligenyi giŋi ká bádɛgɛn wɔ́. 28Bámáansá bɔ́yɔ ká: «Band bá Ísalayɛ́l, anusídiágɛ́n ɔmbɔ́g oo. Mɔnd ewe ufúnyifunyé band gidigid, kɔɔ́m gidigid ká bénusenyi nigúl nás, na bisele bás na ɔnyɛb ewe. Úgubia muát nigég ná gúbíŋenyi muát band bádiábá Beyúdɛn aya agá ɛsámb ya kɔɔ́m ege, úguágaan gɔ́ biíle.» 29Ga guán, agá tísɔn Beyúdɛn mán Tilofím wa tísɔn bábɛlaná ká Efɛ́s umáabá udílígen Pólo. Abábɛ́dágɛd ká Pólo mebíŋínyí wɔ́ agá ɔnyɛb wá Gɔdányá. 30Tísɔn gidigid mebiéyídín, band móolónín kɔɔ́m gidigid, abádɛgɛn Pólo, ebémi wɔ́ agá ɔnyɛb wá Gɔdányá. Kɔ́ nɔ kɔ́, ebéfuug eŋíd yá bians. 31Anyɛ́ bámáabá bámáanyá guamba guɔ́n Pólo, ubuɔ́nɔɔ́bɛ́gɛ́n ɔgɔn wa bagɔn bá musia wa Balomɛ́ŋ ká, «Yelúsalɛm gidigid nyɛ agá gíbueŋidie!» 32Ɔgúnɔ́ uwaány uwedúmbi gugɔ́l musia na bagɔn bá mú gá gɔbɛn giŋi. Band máal bánaán ɔgɔn uwaány, ɔbɔ́dɔmb gugide Pólo. 33Uwabɛ́sɛdɛn uganyɛ ká bádɛgɛn Pólo, bágɔ́d wɔ́ masɛŋɛ mándɛ. Agá gélem ány, uwófún ká mɔnd ewe nyɛ ányá e, giág uságual e? 34Agá giŋi gá band, ebe máansá ana, ebéné ánsá enéné. Ɔgúnɔ́ uwaány dɛmabá wɔ́bɔn ta onkól anyɛ́ gians máabá. Uwéŋin bugaga bágɔban Pólo agá gianta gá nuyá ná musia. 35Anyɛ́ Pólo máasiám egúy na nsɛ́gɛd, musia mabiánán ká múbɛ́dɔ́gɛn wɔ́, gágual ká band mabá bábɛ́yɔ́gan. 36Giod gá band mabá gɛ́ládaan wɔ́, baánsa ká: «Nsɛ́ úgú!»

Nɛgál ná Pólo ogóbusió bá Beyúdɛn

37Gɛsɛgɛl béméebíŋényí Pólo agá gianta gá nuyá ná musia, Pólo ganyɛ gá ɔgɔn wa bagɔn bá musia ká: «Anyɛ bágúmfá bugaga ká nguɔyɛdɛn buanda e ɔgɔn?» Uwondinyi wɔ́ ká: «Agúlɛnsan nugɛlɛ́k e? 38Adɛbá gɔ́g mɔnd wa Egípit unyá guligidenyi gibueŋidie medúdug eme e, eyílén agá giɔ́ndɔ́ bɛmbuánsɛl dɔns dúní e?» 39Pólo guondinyi ká: «Yaŋuá, inyɛ Yúdɛn, bémembién agá tísɔn wa Tálas, unyɛ gianta gá tisɔn agá giéns gá gus gá Silisí. Inyɛ wa gigúmín gá tísɔn. Imógubísógólídí, nŋádábɛ́n ká ngálɛ́d gá nigúl.» 40Ɔgúnɔ́ wá musia uwádábɛn wɔ́. Pólo ndényé agá nsɛ́gɛd, uwelúŋi band na ɔmbɔ́g, ebélúŋ pɔ́ɔɔ. Pólo gɔg uwagálɛ́d gɔ́b na gugál gá Beyúdɛn ká:

Currently Selected:

Bielínyélínyé 21: MMU2

Highlight

Copy