Bielínyélínyé 15
15
Gusuŋunenyi gá buóny bá guansab
1Gɛdam gá band manaádɔ́g Yudé, abásiám Antiyóso, ebéfúnyifunyi beédéb bányá kɔ́, ká: «Númaál nudiansáb anyɛ́ bisele bá Moyíso ɔ́yɔnɔ́, nudigabia gusɔ́d.» 2Gianta gá gɛsan igiágua gá buóny ubuány, ebésuŋunenyi giod na Pólo na Balanábasa na band abaány ta guɔ́bɔ́n. Ɔbɔ́yɛd ká Pólo na Balanábasa na gɛdam gá band gíndodi búlígi Yelúsalɛm, bɔ́fuɔ́g bedúmeb na bagɔn gá gúdábɔ́n buóny ubuány. 3Giɔ́b gá beédéb bá Antiyóso abádábɔ́nɛn bɔ́ ɔŋɛnd uwaány. Abáyɔɔg Fenisí na Samalí, boól bɔ́yɔ́ anyɛ́ band bádiábá Beyúdɛn nyá gubínúgún. Beédéb abábia bɛdɔdɛn giod anyɛ́ bɔ́mɔ́ɔb nsɔ́m iyaány. 4Bámáal bágányɛ Yelúsalɛm, giɔ́b gá beédéb, na bedúmeb, na bagɔn abágɛ́ndɛ́gɛn bɔ́. Pólo, na Balábasa, na band bóndodi ɔbɔ́yɔɔn bɔ́ manda ɔmɔ́ Gɔdányá máadɔ́mbɛ́n gɔ́b ká mábiál.
Gudábɔ́n gá gɛsan
5Gɛdam gá Bafalisiɛ́ŋ gɛ́mɛɛ́y beédéb ganyɛ gɔg ká: Búguófoon guansa beédéb bádiábáná Beyúdɛn, nuónd núgɔ́d bɔ́ ká baádáb bisele bá Moyíso. 6Bedúmeb na bagɔn abábɛ́gɔ́sɛ́d gá guanuna buóny ubuány.
7Anyɛ́ nsuŋié máasɛ́lɔ́ndɔ́, Piéle gugɔ́l gugál uganyɛ ká: «Belimen, nugúlɛnsaan ká Gɔdányá mɔndɔ́bɔ́n gadágadá wanɔ nsua na nsua gá guɔyɔ Ndág ya Nsɔ́m gá ebe bádiábá Beyúdɛn ká bɔ́mɔ́mbɛ́dɔ́lɛ́gɛn, baádáb. 8Gɔdányá ulɛnsaná ɛdɛm sá band, úgudíye ká úgugɛ́ndɛgɛn bɔ́ anyɛ́ unyá guéŋin bɔ́ Ɛsámb yá Mefúny anyɛ basuá. 9Gá ugág, didibá sáŋal nɔbɔ ta ɔgɔbɔ́, ta agasuá. Umasɔgɔ́n ɛdɛm sɔ́b gágual ká bámáadáb. 10Gubanyɛg gɔg nɛ́nuán, giág nubɛ́ŋaná Gɔdányá na gudɔ́gaan beédéb bɛnɔ bá gɔnɔ́ ɛbɛ́ ta besié bás, ta basuá muát bɛ́máadɛ́yág gɔ́bɛ́dɔ́gaan e? 11Dɛguádábaan ká dɛmabiá gusɔ́d agá bese wa Ɔgúnɔ́ Yésu buanda búmoom anyɛ bɔ́bɔ́!» 12Band bámáabá kɔ́, ebélúŋeen yédududu anyɛ́ Balanábasa na Pólo mɔ́ɔyɔɔ́n bɔ́ mesey na bigégén bá manda Gɔdányá máadɔ́mbɛ́n ɔgɔbɔ́ gá guala manda aga band bámáal bádɛ́bá Beyúdɛn.
13Bámáal bɔ́dɔ́mbɔn gugál, Sáka uwɔgɔ́l gugál uganyɛ ká: «Belimen, ɔ́numbɛ́dɔ́lɛ́gɛ́n. 14Símune médíbídégésí anyɛ́ Gɔdányá mɔ́ɔgɔ́l gɛsɛgɛl gá gueyid gisiósio gadágadá wa band bádiábá Beyúdɛn band bɔ́bɔnɛnɔ́ wɔ́. 15Buanda ubuány gúlumenen na gugál gá mubús ma Gɔdányá gúnyá guɔ́ŋɔ́n guɔ́yɔnɔ́ ká:
16 Mɔɔ́s mólonó, ngosiondo gá guand gufuág isúŋ yá Défide imáagadɛ́g.
Biés bíméesiénén, ngadábɔ́n bɛ́, ngondi yɛ́ ndényé.
17 Gubanyɛg ány, band bóndodi bá gus gamba Ɔgúnɔ́,
na bidɔŋ gidigid ibí iméeyíd ká bíbá bám.
Gugál gá Ɔgúnɔ́ egue guɔ́yɔnɔ́ ká,
18 ugúfuógonyi nŋɔyɔ ság ɛsɛ́ uméelinsí gumányɛ gá nsua.
19«Búdiguófon gufánan band bádiábá Beyúdɛn meyú, básaman gubɛ́gɔ́ŋɔ́n buáy bá Gɔdányá. 20Nsɛ́ diɔ́ŋɛ́n bɔ́ gɔɔ́gɔ ká nudɛ́nyánán mɔlɔ́k má bisiég ɔmɔ́ bésígené gá guéŋeen bá Gɔdányá bóndodi, nudɛnyánán mɔlɔ́k má manyam mébíguéniné, nudɛ́búwá manɔŋ, nudiandá musɔm. 21Band nyɛ kɔ́ bɔ́yɔnɔ́ bisele bá Moyíso ibiány agá sig tísɔn, bágúbanan bɛ́ sɔ́n agá bians bá mbísógól sig buɔ́s bá sábát guedúmín agá dɔgɔndɔ.»
Mbɔbɔnɔ bámáadɔ́mɛ́n beédéb bádiábá Beyúdɛn
22Kányɛ́ beédéb, na bedúmeb, na bagɔn mɔ́ɔbɔɔ́n. Abádɛgɛn ká bɔ́dɔ́bɔ́n band gadágadá wɔbɔ, bádɔ́m bɔ́ Antiyóso nɔ́b na Pólo, na Balanábasa. Ɔbɔ́dɔ́bɔ́n Yúde bámáabɛ́laán sɔ́n ká Balanábasa, na Silása, band bámáabá na ɔfɛ́n gadágadá wa beédéb. 23Abáfá bɔ́ mbɔbɔnɔ ká báb na yɛ́. Bɔ́mɔ́ɔŋ ká: «Bedúméb na bagɔn, na beédéb mébígélídí beédéb gidigid bádiábá Beyúdɛn bɔ́sɔ́dɔnɔ́ Antiyóso, Silí, na Silisí. 24Dɛmɔ́ɔb ká bɔsɔ́gɔ́ bás bóndodi mesínúbuéŋídí meéne, unuasɔ́mbɔsɔmb manɔŋ na gugál gɔ́b, saá basuá dɛmáadɔ́m bɔ́. 25Buád buanda dɛnyá guɔ́bɔ́n beme wasɔ. Idiɔdɔ́bɔ́n band idiadɔ́m bɔ́ ɔlɔŋ na belimén bás bá ɔdɛm, Balanábasa na Pólo. 26Bányɛ band béméeŋín gusɔ́d gɔ́b góbusió bá ɔfɛ́n wá Ɔgúnɔ́ wasɔ Yésu Kilíse. 27Dɛmánɔ́dɔ́mɛ́n gɔ́g Yúde na Silása ká bɔ́sinuɔ́yɛ́dɛ́n ubú dɛmɔ́nunuɔ́ŋɛ́n agá mbɔbɔnɔ iyaány. 28Gá guán, Ɛsámb yá Mefúny na basuá muát dɛnyá guán ká dɛdiánd gɔ́nɔ́fá gɛnɔ́ gíndodió, gúmén gúdíbá manda mányá bisele anyɛ: 29Nudɛnyá mɔlɔ́k ma bisiég ɔmɔ́ bésígené gá guéŋeen bá Gɔdányá bóndodi, nudɛnyá manɔŋ, ta manyam mébígueniné sɔ́n, nudiánda musɔm. Númábɛ́sándúna manda amaány, nugabá bese. Mbígélid.»
30Bámáal ná guádúgana, band bámáadɔ́m gá guosió mbɔbɔnɔ ebédúnúg Antiyóso, abábɛ́lɛ́gɛn gɛgɔ́s gá beédéb gidigid, ebéŋin bɔ́ mbɔbɔnɔ iyaány. 31Beédéb abaány máal ná guban mbɔbɔnɔ iyaány, abábia bɛdɔdɛn agá ɔdɛm gágual ká imafá bɔ́ makánya. 32Mubús má Gɔdányá Yúde na Silása magála gianta gá gɛsɛgɛl na beédéb, bágaan bɔ́ makánya, bónd bágaan bɔ́ nuɔ́l bugaga agá giádábɛn. 33Ɔbɔ́lɔb nɔbɔ mɔɔn wá gɛsɛgɛl. Agá gélem ány, bágányɛ ká bádúgaan na bɔsɔ́gɔ́ abaány, bágányɛ gɔ́b ká: Nuanda bese gá guond giáy gá ebe báságunɔ́dɔ́m. [34#15.34 Búnyɛ buɔyɛ́dɔ́n agá imbɔbɔnɔ síndodió ká: Silás uwaán gɔg ká úlɔ́b kɔ́.] 35Pólo na Balanábasa, bɔ́bɔ́ ɔbɔ́lɔb Antiyóso. Ɔlɔŋ na giod gá band bóndodi bómóol béfúnyifúnyí band boól bɔ́yɔ́ Ndág ya Nsɔ́m ya Ɔgúnɔ́.
Pólo na Balanábasa mádúgán
36Gɛsɛgɛl máal gɛ́mádɔ́mbɔ, Pólo ganyɛ gá Balanábasa ká: «Nsɛ́ diíl dɛ́yɔ́lɔ́ agá tísɔn beédéb ɔbɔ́ dimóol diɔ́yɔɔ́n bɔ́ Ndág ya Nsɔ́m ya Ɔgúnɔ́, ká dián anyɛ́ bányá.» 37Balanábasa mambá sɔ́n ká Sáŋa bámáabɛ́laán sɔ́n ká Málákuse áb nɔbɔ. 38Pólo gɔg dɛmamba ká báb naga, gágual ká umɔsɔmɔ́g ɔgɔ́b gá ɔlɔŋ anyɛ́ bámáabá Pamfilí, udɛmand gubá nɔbɔ gá buol bɔ́b. 39Ebésúŋén mosió, abádɔ́gan. Balanábasa uwɔgɔ́l Málákuse, abábɔ́lɛ́g gilu ɛgɛgɔn, abáb Sípɛl. 40Pólo, uwɔ́ uwɔgɔ́l Silása, beédéb obóbísógólidi ká Ɔgúnɔ́ éndenyi bɔ́, abádɔ́mb.
Timoté mɔ́ŋɔ ɔlɔŋ na Pólo, na Silása
41Uwegéŋélidi biéns bá gus bá Silí na Silisí, wuúl wágaán beédéb makánya.
Currently Selected:
Bielínyélínyé 15: MMU2
Highlight
Share
Copy
Want to have your highlights saved across all your devices? Sign up or sign in
CABTAL
