Bielínyélínyé 11

Gugál gá Piéle Yelúsalɛm

1Bedúmeb na beédéb bámáabá Yudé mɔ́ɔb ká band bádiábá Beyúdɛn magɛ́ndɛ́gɛ́n sɔ́n gugál gá Gɔdányá. 2Anyɛ́ Piéle móosiónd Yelúsalɛm, beédéb bá Beyúdɛn ebédúm gunúgúne wɔ́. 3Bɔ́yɔ ká: «Esebíŋín aga band bádiábáná Beyúdɛn, omónd amányánán nɔbɔ gá giag e?» 4Ány Piéle uwɔyɔɔn bɔ́ génún génún buanda gidigid búmáabɛ́dɔ́mb. Uganyɛ gɔ́b ká: 5«Ngubá agá tísɔn wa Yopé mbísógolonyi, iyabia giényigie, iyaán buanda anyɛ gianta gá sanda giadɛ́gánán agá idú ság inkim íní, giádɔ́gánɛ́n ugumuana gínselenin. 6Iyobisónonyi bú bese na bese, iyaán manyam má bɛgɔnd bíní, manyam má ɛyɔ́m, manyam mébítútúlené, na munoni muólugonó. 7Iyɔɔ́b sɔ́n ekelu wɔ́yɔ gám ká: “Piéle, ɛmbɛ, ɔ́nɔ́ ónd ányá!” 8Yaŋuá guondinyi ká: “Ágó! Ɔgúnɔ́, meliŋítas agám gá gusɔ́d, ta gilegélég, ta buanda búnyá gisele búmabása búdíbíŋín agám gá niíd.” 9Gá gɛsɛgɛl gá gándɛ, iyand guɔ́b ekelu wúlenin ugumuana wɔ́yɔ ká: “Ɔdiɔyɛ́d ká ubú Ɔgúnɔ́ sóguondi filí, búnyɛ gisele.” 10Ubuány mabiál bɛsɛgɛl bídadɔ, ány buand guond ugumuana. 11Agá gɛsɛgɛl igiány, bámáandɔ́mɛ́n band bádadɔ bómóolónín Sesalé. Abásiám agá gians dɛmáabá kɔ́. 12Ɛsámb yá Mefúny ganyɛ gám ká yɛɛ́b nɔbɔ fiaŋ fiaŋ. Belimen bám bátíndád ebe mesíndílígín Sesalé, idiebíŋín basuá bem agá gians gá Kɔlɔnɛ́ya. 13Kɔlɔnɛ́ya gudiɔ́yɔɔn anyɛ́ umáan ɛngɛlɛs ya Gɔdányá ibíŋén agág gá gians. Iganyɛ gág ká: “Dɔ́m band Yopé gá guabɛ́lɛ́gɛ́n Símune bábɛ́laná ká Piéle. 14Ugɔɔ́guɔyɔɔn moóny mógogúnúnúsódi, nɔ́w na gians gɔ́w gá band.” 15Mbanyɛgaan gugála, Ɛsámb yá Mefúny iyéselin bɔ́ gɔɔ́gɔ anyɛ́ íméedísélín agá nidúmín. 16Iyabɛ́dágɛd gugál gá Ɔgúnɔ́ gɔ́g egue: “Sáŋa meduénín agá madɛ́ga, banuá nugabia nduén ya Ɛsámb yá Mefúny.” 17Gɔdányá méeŋín bɔ́ nubo nuád númoom unú umáadɛ́fá anyɛ́ dɛmáadáb Ɔgúnɔ́ Yésu Kilíse. Mmabá gɔ́g ányá ká ílég Gɔdányá ká udiala e?» 18Agá gugál uguány bem wɔbɔ ebélúŋ pɔ́ɔɔɔ, ebéŋeen Gɔdányá nukany bɔ́yɔ ká: «Búnyɛ gɔg meliŋítas anyɛ́ Gɔdányá méeŋín band bádiábáná Beyúdɛn nŋili ya gubɛ́gɔ́ŋɔ́n gá gubia mbanda gusɔ́d.»

Gudágɛ́n gá gimbi gá beédéb bá Antiyóso

19Agá gélem gá nigú ná Ítiene, abábanyɛg guóbígonyi beédéb. Abásálámand máy mem. Ebe abáb Finisí, bómodió abáb Sípɛl, gɛdám gímodió ɛgɛ́b Antiyóso. Bɔ́mɔyɔ́ Ndág ya Nsɔ́m gɔɔ́gɔ aga Beyúdɛn. 20Nányé gɛdám gá beédéb gɛ́máabá Sípɛl na Silɛ́n máab Antiyóso gá guúl guɔ́yɔ́ Ndág ya Nsɔ́m ya Ɔgúnɔ́ Yésu gá band bádiábaná Beyúdɛn. 21Bugaga bá Ɔgúnɔ́ mabá nɔbɔ nɛnama nɛ́nyá ká gianta gá gɛdám gá band abábɛ́gɔ́ŋɔ́n, obónd abádáb Ɔgúnɔ́. 22Manda amaány amánaám agá idú sá beédéb bá Yelúsalɛm, Abád gudɔ́m Balanábasa Antiyóso. 23Anyɛ́ umáab guege, uwaán anyɛ́ Gɔdányá moóbógósí beédéb, uwabia bɛdɔdɛn, uwágaan bɔ́bɔ́ gidigid makánya ká bɔ́lɔ́bɛn bábɛ́gɔ́dán aga Ɔgúnɔ́ na ɔdɛm wɔ́b gidigid. 24Balanábasa mabá mɔnd wa osi, ofuógón na Ɛsámb yá Mefúny, umáagaán ɔdɛm wág aga Ɔgúnɔ́. Giod gá band, méeŋeén ɛdɛm sɔ́b aga Ɔgúnɔ́. 25Balanábasa gɔg gɔb gá guambá Sɔ́lɔ agá tísɔn wa Tálas, 26uwaán wɔ́, uwosiónd nág Antiyóso. Ebédúmbi yɔŋ gidigid gá guala buol agá giɔ́b gá beédéb, béfúnyifunyi band giod moóny má nŋádáb. Antiyóso bámáabɛ́lɛ́gɛ́n bafɔ́nɔfɔ́n gá gɛsɛgɛl góbúsió ká «bekilísitɛn».

Giélínyélínyé gá gidúgune

27Agá medug amaány, Mubús manáadɔ́gɛ́n Yelúsalɛm, umuénege Antiyóso. 28Omoom wɔbɔ ɔfɛ́n ká Agabúse, Ɛsámb yá Mefúny méendényí. Umɔyɔɔ́n band ká, gá mɔɔn wá gɛsɛgɛl, gianta gá nsana gasiám agá gus gidigid. Nsana iyaány iyasiám gá gɛsɛgɛl gá ofuŋ Kolódo. 29Bafɔ́nɔfɔ́n abásián ká sig mɔnd a éŋín ubú unyá bágubia gá gúdɔ́mɛ́n beédéb bɔ́sɔ́dɔnɔ́ Yudé. 30Abaál nɔ́, abádɔ́m nubo nɔ́b gá Balanábasa, na Sɔ́lɔ, ká béŋín gá bagɔn bá Yudé.

Currently Selected:

Bielínyélínyé 11: MMU2

Highlight

Copy