Ruma 7
7
Ala Kərist ma pəlaya a ma ma garagar
1Zlina mana aagi, huni kasən ma watsə katkadək, sa zlapatana a həji ma kasən ma ma garagar aagi, ma ma garagar abə ŋgalaŋ ata həji gagagha tiɗa həji ndza ta abə nja. 2Ikwa azha, wala ma ndza aska mawəl tadzawaya gwara ara ma ma garagar tiɗa ndza tə abə nja, ama ndə mawəl a kaamca tə ya, wərət tapəlaya ara ma ma garagar ma dzaw ka aska mawəl tə watsa. 3Andza tiɗa ndə mawəl tə ndza tə abə nja, abə a jiɓa mawəl minja meni, həji yə ci, a ɗa wala mazheref, ama andza mawəl tə tamca tə ya, a ɗa wərət tapəlaya ara ma ma garagar, kwa a ndaa tə a bəza a jiɓa mawəl minja ya, tazhin a gwar a ɗa wala mazheref akas. 4Huni yəm zlina aagi, a ndza ikwa yəm, huni tadzəv kuni abə Kərist ma mca tə aska ŋkwa ata mpi ma gəzlaŋgarak, azha huni taɓizh kuni abə ma ma garagar. Anawatsə huni ɗa həji ataa ala minja, ala watsa, sha ana ala ma gara tə a wəzəm a jiɓ a taba həji ma bazl ta aagi. Ikwa azha, həji aɗal zlən ma kazhiva ata nja Bizlaf. 5Ara ndə a ɗa, ndə həji va a ɗal səkən ma gamak ndə həji kamayə aagi ya, səkən ndə zlikusəm takwa a kamayə watsa ci, a ɗal zlən abə ma ma garagar a zlikusəm takwa, azha səkən ndə həji kalima ci, mci. 6Ama anawatsə, həji tapəlaya a ma ma garagar, ara ndə həji ɓizh takwa abə səkən ma kasahəji yaka. Azha kadək a həji a ɗalanə zlən a Bizlaf abə təf wiyə, abə hawanə a Miɗ ma ghwaɗeɗe. Azha həji kaazhin a ɗalanə zlən a Bizlaf andza ma ndza ambəɗa ndə həji kahawanə a ma ma garagar Musa aka səku.
Zlən ataa ma ma garagar
7Azha, a may a ghalə anawatsə avaŋga? Ma ma garagar ci, a ɗa mpət vəw? Aŋghə andza ikwas! Ama sa sən mpət ci, dawna ma ma garagar. Həna sa kaagwar a sən zlən ma gamak aagi andza a ma ma garagar tazlap aka səku, iŋgaya: Hwa ɗiw a ɗal zlən ma gamak səku. 8Mpət talima təf bəza, gwara ara ma ma dzawadzaw aska a ghutaka a ɗal səkən ma gamak aagi tiwtiw. Mpət ci, a ɗa səkən ma mcamca, andza ma ma garagar tandza aka səku. 9Ambəɗa tə, tiɗa ndə ma ma garagar a ŋkula ndza aka, sa ɗa ala ma ndza abə nja, ama ndə ma ma dzawadzaw a ndaha ya, mpət ana ma bəw tə a ɗa səkən ma ndza abə nja. 10Azha sa, sa tamca naka, sha ana ndə a ɗa, ma ma dzawadzaw ma kazhiva a jaɓaka a ndza abə nja, tabəw tə, a jaɓaka a mci. 11Ara ndə a ɗa, mpət talima təf bəza, a ghutaka gwara ara ma ma dzawadzaw, azha gwara ara ma ma dzawadzaw watsa abə a daaksa mci. 12Ama ma ma garagar ci, ghwaɗeɗe, ma ma dzawadzaw ghwaɗeɗe, dəlili, zhana təwah.
Ala a ndza ata ra mpət
13Azha ya, səkən ma təwah ana ma bəw tə a səkən ndə sa kaamca gwara ara vəw? Aŋghə, tep ikwas! Ama mpət, a ɗal zlən abə səkən ma təwah aska a jaɓaka a mci. Ikwa andza watsə, abə ma ma dzawadzaw a ghal ci, avaŋgəy ana dadawər mpət, abə ghalha zlən tə ma gamak aagi tiwtiw. 14Həji kasənə, ŋter ma ma garagar a ndaha ara Bizlaf, ama sa, sa ɗa ala ŋkulaf, ma beraya a mpət andza mava. 15Ŋter sa kasən səkən ndə sa kaɗalə səku: səkən ndə sa kamay a ɗalə ya, sa kaɗalə akas. Azha səkən ndə sa ŋkula ji a ɗalə ya, sha ana ndə sa kaɗalə. 16Andza sa ɗal səkən ndə sa ŋkula ji ya, sa kasən ci, ma ma garagar təwah. 17Anawatsə sa ma deŋ a ɗal ikwa səku, ama mpət ma ndza a zlikusəm naka ma kaɗalə. 18Ayəw, sa kasənə, səkən ma təwah a zlikusəm naka aka səku, sa may a zlap ci, sa ɗa ala ŋkulaf. Ama ataa anaka ya, sa kamay a ɗal səkən ma təwah, azha ɗal takum ara sa. 19Ara ndə a ɗa, səkən ma təwah ndə sa kamayə ya, sa kaɗal akas, səkən ma gamak ndə sa ŋkula ji ya, sha ana ndə sa kaɗalə. 20Andza sa ɗal səkən ndə sa ŋkula ji ci, sa ma kaɗal səku, ama mpət ma ndza a zlikusəm naka ana ma kaŋtsukwaka a ɗalə. 21Ikwa abə sa sən ma ma garagar watsə bəza: ndə sa may a ɗal zlən ma təwah, zlən ma gamak ana ndə sa kagəra atama naka. 22A wəzaha a ꞌunəf naka ci, ma ma garagar ataa Bizlaf təwahaka, 23ama sa gəra a wəzaha a zlikusəm naka ci, ma ma garagar minja, a kadza kusəm abə ma ma garagar ndə deŋ naka a kaɗiwi, ma ma garagar watsa pa a tsaka ka a jak ta sa yaka ataa ma ma garagar ataa mpət, ma ndza a kusəm naka. 24Anawatsə dadawər ata sa ŋter! Ala ma kaapəlaka a bəza ara zlikusəm naka ma kajaɓaka a mci watsə ya? 25Huni ɗalaŋkwa wasiy a Bizlaf gwara ara Yesu Kərist, Bay Madagal takwa.
Ikwa a deŋ ŋkwaɓ naka ci, sa talamzə ma ma garagar ataa Bizlaf, ama dawna ŋkulaf naka ya, sa tabəw naka a hawanə a ma ma garagar ataa mpət.
Currently Selected:
Ruma 7: GOU
Highlight
Copy
Compare
Share
Want to have your highlights saved across all your devices? Sign up or sign in