Ruma 13
13
Hawatana a həji ma mar hayak aagi
1Kwa vaye mahawanə a həji ma gulakwakw ma ndza aha həji aagi, ara ndə a ɗa, dagal tiwtiw a ndaha ara Bizlaf, Bizlaf ma kavəlatana la ndza ta aska aagi ndza. 2A ndza ikwa ana ala ma ŋkula hawanə a mamar hayak aagi, a ŋkula hawanə a ma ndə Bizlaf a gar ka, həji ma ŋkula hawatana aagi ci, guma a aɓin a mbəlata bəza. 3Ndə həji kaɗal səkən ma təwah ci, həji kaaɗal ŋzliŋ ara mamar hayak aagi akas, ama həji a ɗal ŋzliŋ ara ndə həji kaɗal səkən ma gamak. Hwa kaji a ɗal ŋzliŋ ara magulakwakw aagi wəra? Huni ɗal səkən ma ŋtan aska aagi ahəmənahuni a heɗe. 4Ara ndə a ɗa, aa ɗalanə zlən a Bizlaf ana həji ma mar hayak aagi aska a jaɓahu a ɗa təwah. Ama andza hwa ɗal səkən ma gamak ya, səy ŋzliŋ madzahu. Ara ndə a ɗa, ɓəlaakaka abə aa kaŋgəzahəji səku: a ɗalanə zlən a Bizlaf aska a ghalatana ghuɗek Bizlaf a həji ma kaɗal səkən ma gamak aagi. 5Sha ana ndə a ɗa ci, kadək a hawatana a həji ma mar hayak aagi, aska a tak ghuɗek Bizlaf aka gagagha səku, ama ara ndə a ɗa təwah a həji a mayə a ꞌunəf takwa. 6Dawna ma watsa, abə huni kaŋtəra jamargwal: həji ma katsak jamargwal watsa aagi, Bizlaf ma tsata ka a ɗal zlən watsə. 7Huni vəlatana səkən ma kazhiva a vələ a kwa vaye: huni ŋtəra jamargwal a həji ma tsakə aagi, huni vəlatana səkən ndə aa zlahuni ka a vələ, huni hawanə ana ala ndə həji kazhiva a hawanə, huni vəlanə sləf ana ala ndə həji kazhiva a vəlanə sləf.
Mayha ataa həji ma ghwaɗeɗe aagi
8Andza dəwa ala aska huni, huni ŋtəranə ka, mayha ana ma ndza andza dəwa. Kala ala ma kamay masliji tə, a hawanə a ma ma garagar ŋter. 9Ara ndə a ɗa, ma ma dzawadzaw taghal ka: Ara hwa a ɗal mazheref, ara hwa a dza ala, ara hwa a ŋhil, ara hwa a ɗa nja aska səkən ala. Ndiɓi aagi tiwtiw aa ndza a wəzaha a ma ma kazlap, iŋgaya: Hwa may masliji kwa andza ha kwa. 10Mayha a kagəyanə ma a masliji akas, mayha ana ma kakəliy ma ma garagar.
11Huni kasən wan ndə həji ndza a mən anawatsə: Teete a huni a fəɗahha kuni ata lawan kuni. Ara ndə a ɗa, akacihwa ci, reh takwa mber aha ma vah ndə həji va a ɗal awa. 12Dəylakwaf, bishkit slaɓ. Azha, kiyzaŋkwa a mbasl zlən ma gamak ndə həji kaɗalə a ləvaŋ aka, huni kwaraŋkwa huzla səkən ndə həji kaɗalə a bishkit aagi. 13Huni ɗalaŋkwa səkən ma təwah andza səkən ma ndza a bishkit, ara həji azəm səkən aka dəy, zhana ara həji asa səkən aka dəy, ara huni awan tayah, huni mbaslaŋkwa badaway aka, huni mbasl dza kusəm aka, kwa sərah. 14Ama huni ndza a ɗa həji ma kasaɓ andza Bay Madagal Yesu Kərist aagi, ara huni apəl ha kuni ka a səkən ma gamak ndə zlikusəm kuni a kamayə.
Currently Selected:
Ruma 13: GOU
Highlight
Copy
Compare
Share
Want to have your highlights saved across all your devices? Sign up or sign in