Mata 9

Yesu tambəl ala ndə zlikusəm tə a bazl tə

(Mrk 2.1-12; Luk 5.17-25)

1Takaf Yesu a taf tə ata gəlmbə, zlaŋ a zlaŋ tə a bəza ama mtil, azha tsaa kanda tə a hayak ma dzamadzam tə. 2Həji ndiɓi aagi leŋ aa daanə ala ndə zlikusəm a bazl tə, tawanaya ata zal. Ndə Yesu a gəra ɗal awa ta ya, zlap a zlapanə ana ala ndə zlikusəm a bazl, iŋgaya: «Mbəla ꞌunəf kwa ka, mbə naka, mpət kwa tapəlaya!» iy. 3Azha, Masərək ma ma garagar aagi, dəba aagi azlap ata ha ta, aagi iŋgaya: «Ala watsə a ra Bizlaf,» aagiy. 4Yesu, a kasən deŋ ŋkwaɓ ta azha, zlap a zlapatana iŋgaya: «Huni abə deŋ ŋkwaɓ ma gamak watsə ara veme? 5Səkən ma ɗa kahkah a zlap ya: “Mpət kwa tapəlaya vəw?” Aka səku, “Gar kwa a wəzəm, azha nda kwa”, vəw? 6Ayəw, sa may ya, a huni asən ka: Mbə həji ma dəgnak abə ɓərɓər ta pəl mpət ata hayak.» Azha, zlap a zlapanə, ana ala ndə zlikusəm a bazl tə, iŋgaya: «Gar kwa a wəzəm, ji la wan kwa, nda kwa a wata kwa,» iy. 7Takaw a gar tə a wəzəm azha, tsaa kanda tə a wata tə ana ala watsa. 8Ndə ŋgaɓa həji aagi gəra ikwa, ŋzliŋ tadzata ka a guɗaŋ, azha dəba aagi ahəmən Bizlaf mavəy ndə a vəlatana shiŋ ɓərɓər ma həna watsa a həji aagi.

Yesu tayaha Mata

(Mrk 2.13-17; Luk 5.27-32)

9Yesu tsaa kanda tə a bəza gədək a tsutsa. Ndə a kapew ya, a gəra ala minja zləm tə Mata, a kandza a jak ta tsak jamargwal aagi. Zlap a zlapanə, iŋgaya: «Səbaraka,» iy. Mata takaw a gar tə a wəzəm azha, dəba a asəbarə. 10Ndə Yesu a kazəm səkən a wata Mata, vərəm ana həji ma tsak jamargwal aagi, abə həji ma ɗal mpət aagi, aa taha ara Yesu a zəm səkən abə magəli tə aagi. 11Ndə Farisa aagi gəra səkən watsa ya, zlap aa zlapatana a magəli tə aagi, iŋgaya: «Masərək kuni a zəm səkən abə matsak jamargwal aagi, abə həji mpət aagi, ara veme?» 12Yesu tazlimatana ma ta watsa bəza, i təmta iŋgaya: «Kwalay həji ma wirwir aagi abə dakwtər akas, ama həji dawər aagi ana ndə may ta abə dakwtər. 13Huni gas ma ma ɓah tə a zlap ndə Bizlaf a zlap iŋgaya: Zəghay ana ndə sa mayə səku ya, kwakus səkən ŋgas aagi səku. Ara ndə a ɗa, sa tandaha a ya həji ma dəlili aagi akas, ama həji ma kasən ha ta, aa ɗa həji mpət aagi.»

Ɗiw ma ma ndza ata ɗal dalyam

(Mrk 2.18-22; Luk 5.33-39)

14Azha, magəli ataa Yahwana ma ɗal batem aagi kərəɗ aa kərəɗha abəra Yesu, ɗiw aa ɗiwzə, aagi kəsha iŋgaya: «Ni abə Farisa aagi, ni kaɗal dalyam, ama magəli kwa aagi aa kaɗal dalyam aka səku, ara veme?» aagiy. 15Azha, Yesu zhin a zhinatana, iŋgaya: «Həji ma yahaya a gwaygwaya ta paɗ dəma ya, aa kula a ghuɗek, tiɗa ndə mawəl dəma ndza tə kwagwa a taba ta vəw? Həji kasən ya, aŋghə! Ama vah tə a kaaɗal tə, tiɗa ndə mawəl dəma a kanda tə a bəza a taba ta, azha a tsutsa abə aagi aɗal dalyam.

16Kwa ala ma kaji a tay patak wiyə ata msəra rəkuts akas. Ara ndə patak wiyə a vas a ŋhwak ka, wəli rəkuts watsa a bəw tə a ma dagal tə a guɗaŋ. 17Kwa ala ma kaji a ɗiɗi mavə wiyə tə ka, a duguzl msəra akas, aka səku ama andza taɗiɗi a dəguzl, mavə tə a ɗa wəray ndə duguzl a kaŋta tə. Aɓa azha, həji ɗiɗi wiyə mavə a duguzl wiyə, azha mavə a ndza kadək.»

Yesu tasəfənha həla ala ma ndza a taba həji bay ataa Yahuda aagi abə mbəl wala ma dish ra ata rəkuts tə

(Mrk 5.21-43; Luk 8.40-56)

18Tiɗa ndə Yesu a kazlapatana ikwa ya, ala minja həji bay ataa Yahuda aagi taa tə, gəliɓ a gəliɓakənə atama a Yesu, i kəsha, iŋgaya: «Həla naka a ꞌwala mca anawatsə, ama ndaha, hwa tsazə ra kwa aha, a asəfən tə,» iy. 19Takaw Yesu a gar tə a wəzəm, dəba aagi asəbarə abə magəli tə aagi.

20Azha, wala minja a tsutsa aka, a kazah ampəs a ɗal bəza va wam aha gbak, kərəɗ a kərəɗha a diwzha Yesu, dish a dish ra ata mazləm rəkuts tə. 21Ara ndə a kazlap, iŋgaya: «Andza sa tadishzə ra ata rəkuts tə ci, sa aɗa mbəl,» iy. 22Takwaɗ Yesu a zlazəha ma, ndə a gəra ya, zlap a zlapanə, iŋgaya: «Mbəla ꞌunəf kwa ka, həla naka! Ɗal awa kwa tarehahu bəza.» A tsutsa a tsutsa, wala watsa mbəl. 23Yesu peteŋ a wata ala watsa. Ndə a gəra həji aagi kambəz zarak, aa slaɓ a kah bəza, azha ŋgaɓa həji aagi kadza ha ata la han, 24zlap a zlap, iŋgaya: «Huni nda kuni a bəza a ɗi, ara ndə a ɗa, həla watsa tamca səku, a wan tə,» iy. Ama dəba aagi aɓas a heɗe. 25Ndə a gamha ŋgaɓa həji watsa aagi bəza aha bəza, peteŋ Yesu a jak ndə aa wan həla watsa a mən, kaw a mbəla həla watsa ata ra, azha takaw a gar tə wəzəm. 26Ma watsa taɓizh tə tiwtiw a ŋge a hayak.

Yesu tadəɗ nja həji wələf aagi gbak

27Tiɗa ndə Yesu a kandaa tə a bəza a tsutsa, dəba həji wələf ndiɓi aagi asəbarə, aa kadza wəla, aagi iŋgaya: «Za hahər kwa ata ni, Mbə ataa Dawda!» 28Ndə Yesu a ɗa gwar a wata, həji wələf aagi kərəɗ aa kərəɗakənə, Yesu ɗiw a ɗiwzata, iy təmta iŋgaya: «Huni kasən ŋter ci, sa kaɗa kula a dəɗ nja kuni tə azha vəw?» iy. Zhin aa zhinanə, aagi iŋgaya: «Ayəw, Bay Madagal,» aagiy. 29Azha, Yesu pa a tsa ra tə ata nja ta aagi, iŋgaya: «Bizlaf maɗalahuni andza ndə huni katehi abə ɗal awa kuni!» 30Azha, aa kagəra la abə nja ta aagi. Yesu ŋgəz a ŋgəzata bəza, iŋgaya: «Huni tehi katkadək,» iy. «Kwa ala a ɗiw a sən ka səku,» iy. 31Ama aa tsaa kanda ta, aa kazlap ata Yesu a hayak watsa tiwtiw.

Yesu tambəl ala ndə miɗ ma gamak a ŋtəɗ bəza

(Luk 11.14-15)

32Tiɗa ndə aa kandaɓa nda ta, leŋ həji ndiɓi aagi daanə ala minja taŋtəɗ tə ara ndə, miɗ ma gamak a kaɗalanə. 33A tsutsa, ndə Yesu a gam miɗ ma gamak watsa bəza, dəba madəŋə watsa a azlap. A taba ŋgaɓa həji aagi tiwtiw, hak aa ghərəŋ ta, azha dəba aagi azlap, aagi iŋgaya: «Həji tava a gərazə shiŋ səkən ma həna watsə a Isərayila səku,» aagiy. 34Ama, ataa, Farisa aagi ya, aagi iŋgaya: «A ɗa bay ataa miɗ ma gamak aagi, ma kavəlanə ɓərɓər ta gam miɗ ma gamak watsa aagi,» aagiy.

Yesu taza hahər ata ŋgaɓa həji aagi

(Mrk 6.6b, 34; Luk 10.2)

35Yesu tadzəsl hayak ma dzamadzam aagi bəza abə hayak ma fashiɗ aagi. A kasərəkatana səkən a həji aagi a jak ta tarha, a kaghalatana Ma wiyə ma təwah ataa la ndza bay Bizlaf, a kakwaleŋ dawər a həji dawər aagi tiwtiw abə həji ma gəy ta aagi. 36Hahər dəy a nja tə aska ŋgaɓa həji ndə, a kagəra ta, ara ndə həji watsa aagi, aa taŋtəɓəl ta, aa ndza andza biri ŋcimi ndə mbə njin a ŋkula ndza aska təmta aagi. 37Azha zlap a zlapatana a magəli tə aagi, iŋgaya: «Səkən dagala ata wəvə a dzamha, ama həji ta dzamazə aagi aa dagala səku. 38Huni dzanə ra a cina jak aska a zlənaha həji ma kadzamazə aagi dagala.»

Currently Selected:

Mata 9: GOU

Highlight

Copy