Mata 7

Huni ɗiw a ghem həji aagi səku

(Luk 6.37-38, 41-42)

1«Huni ɗiw a zla guma ata həji aagi səku, ara ndə a ɗa ya, Bizlaf a kaazla guma ata huni, aka yəm səku.» 2Ara ndə a ɗa, Bizlaf a ghemahuni andza huni kaghem həji ndiɓi aagi yəm. Səkən ndə huni slaŋgalatana səkən a həji aagi abə sha, səkən watsa, a slaŋgal ataa kuni abə sha yəm. 3Hwa taŋɓa ŋkəsaf ma ndza a nja zlinahw, mbasl duŋgur mpi ma ndza a nja kwa ka, ara veme? 4Aka səku, hwa sən a zlapanə a zlinahw ya: «Kwagwa, sa daahu ŋkəsaf bəza a nja kwa,» hwi kəsha, ama mbasl duŋgur mpi a nja kwa avaŋga? 5Hwa ala ŋgwashŋgwash, daaha duŋgur mpi ma ndza a nja kwa bəza kwagwa. A tsutsa abə hwa gəra la ghwaɗeɗe kadək, aska hwa a daanə ŋkəsaf ma ndza a nja zlinahw a bəza.

6«Huni ɗiw a vəlatana səkən ma ŋtan a wəzhi həzhi səku, ara ndə aa kazlazəha ma ara huni, aagi aŋtsahuni ka. Zhana huni ɗiw a fak guvda kuni ka atama gəladam aagi, ara ndə aa kadak ŋgas aka heɗe səku.»

Ɗiw, gas, dza majak

(Luk 11.9-13)

7«Huni ɗiwi, aagi avəlahuni; huni gasə, huni alima, huni dza majak, aagi adəɗahuni majak. 8Ara ndə a ɗa, kwa vaye ma kaɗiw səkən, a alima, ala ma kagasə, a agəra, ala ma kadza majak, aagi adəɗanə majak. 9Ala ma kaaji a taba kuni, a vəlanə ŋkəɗaŋ a mbə tə, andza taɗiw wəda ara vaya? 10Aka səku, taɗiwanə ŋkilif ya, a vəlanə sheshuk vaya? 11Aɓa huni həji ma gamak aagi, huni kasən a vəlatana səkən ma ŋtan a wəzhi kuni aagi, azha Cihw kuni ma ndza a wəzəm a wəzlaf kula kavəlatana səkən ma ŋtan a həji ma kaɗiw, ara aagi dəy aha huni aka wəra?

12Səkən ndə huni kaɗiwi a həji aagi aa ɗalahuni tiwtiw, huni ɗalatana andza sha yəm: sha ana ma ndə a sərəkə ana ɗerewal ataa ma ma garagar Musa abə həji ma ɗaf ma ndə aa zlimazə ara Bizlaf aagi.»

Təf ma baŋw abə ma ŋteŋw

(Luk 13.23-24)

13«Huni nda gwara a majak ma ŋteŋw. Ara ndə a ɗa, majak ma baŋw abə təf ma bak a jaɓ, həji aagi ata la fəcak həji, dagala ana həji ma kapew gwara a tsutsa aagi. 14Ama, ŋteŋw ana majak, azha təf ma ɓərɓər ana ma kajaɓ həji aagi, ata la ndə miɗ aka. Kajik ikwa ana həji ma kapew gwara a tsutsa aagi.»

Mpi abə mbə tə aagi

(Mat 12.33; Luk 6.43-44)

15«Huni mbəla ŋkwaɓ aska həji ma ɗaf ma ma ŋkula ndaha ara Bizlaf aagi. Aagi andaha ara huni abə gwabəla ŋcimi, ama a wəzaha a mən ya, aa ɗa həzhi damə ma kaɓam həji aagi. 16Huni asənata ata zlən ta. Həji kula a mbalha mbə mindi ata jigiɗ vəw? Aka səku, mbə shikiɗ ata kushaŋ maslahay vəw? 17Andza ikwa, kala mpi ma ŋtan a mbəw mbə ma ŋtan, mpi ma gamak a mbəw mbə tə gamak. 18Mpi ma ŋtan kula mbəw mbə ma gamakəs, mpi ma gamak kula mbəw mbə ma ŋtanəs. 19Tiwtiw kala mpi ma ŋkula mbəw mbə ma ŋtan ya, aagi bəl aka, aagi fak aka a kwahu. 20Azha ikwa, ata zlən ta abə huni asəna həji ma ɗaf ma ma ŋkula ndaha ara Bizlaf.»

Magəli ma ŋter aagi

(Luk 6.46; 13.27)

21«A ɗa həji ma kazlap: “Bay Madagal! Bay Madagal!” aagiy, ana ma kaanda a la ndza bay ma ndza a wəzəm a wəzlaf səku, ama həji ma kaɗal zlən ataa Vana ma ndza a wəzəm a wəzlaf a kamayə. 22Azha, vah guma, dagala ana həji ma kaazlapaka aagi: “Bay Madagal! Bay Madagal! ata zləm kwa abə ni ɗa həji ma ɗaf ma ndə ni zlimazə ara Bizlaf, ata zləm kwa abə ni gam miɗ ma gamak aagi. Zhana ata zləm kwa abə ni gwar a ɗal tsaɓan ndiɓi aagi dagala. Hwa kasən səku, azha vəw?” 23A tsutsa azha, sa aghalatana: “Sa tava a sənzahuni tep akas, huni kərəɗzaka a bəza gədək a ɗi abəra sa, huni həji ma ɗal zlən ma gamak aagi.”»

Maŋgəla ma ndza ata jak ma gbak aagi

(Luk 6.47-49)

24«Azha, kwa vaye, ala ma zlima ma ndə sa zlap watsə, maɗal zlən abə sha, a andza andza ala ma wirwir ma ꞌun jak ata dehweɗ. 25Manavan taa tə, zlazlər aagi ghef abə yəm, valalay taa tə, ama jak watsa tazah akas, ara ndə ŋcah tə tatsaya katkadək a la dehweɗ. 26Ama, kwa vaye ma zlima ma ndə sa zlap watsə, azha taji a ɗal zlən abə sha akas, a ndza andza ala ma kawək, ma ꞌun jak tə ka ata vakw. 27Manavan taa tə, zlazlər ghef abə yəm, valalay taa tə, ghip jak watsa a zah tə, kwa taɓinha akas, denehneh.»

Dagal ɓərɓər Yesu

(Mrk 1.22; Luk 4.32)

28Ndə Yesu a kəɗaŋ zlap bəza, kwa vaye tiwtiw, aa taghərəŋ ta ata səkən ndə a sərəkə, 29ara ndə a ɗa, a zlap andza ala ma ndza ɓərɓər ma dagal, tasaɓ andza masərək ma ma garagar aagi səku.

Currently Selected:

Mata 7: GOU

Highlight

Copy