Mata 13

Maŋgəla ma ndza ata ala ma kazləga

(Mrk 4.1; Luk 8.4)

1Ma vah watsa ya, Yesu a nda a bəza a gi, ka a ndza tə ka a ma mtil, aska a sərəkatana ma a həji aagi. 2Ŋgaɓa həji aagi tadzamakənə, aagi abəra, azha takaf a taf tə ata gəlmbə, ka a ndza tə ka a mən. Ŋgaɓa həji watsa aagi kandza a mazləm yəm. 3Tasərəkatana səkən aagi dagala abə maŋgəla, iŋgaya:

«Ma vah minja aka, ala minja tsaw a nda a damə a zləgaha, zləga tə watsa, a kwiy a kwiy ndiri. 4Ndə a kakwiy ndiri a la tə, zah ndiɓi aagi zah ta a ma təf, vigin aagi, ndaha dəm aa dəmə bəza. 5Ndiɓi aagi zah aa zah ta ata kefe, ata la ndə hayak ɓəraŋ. Kahkah aa dəf ta ara ndə hayak a ŋkula a ɗa gulili. 6Ndə pish a kaɓal, hwap aa ŋhwal ta ara ndə, dzara ta aa ŋkula a gwar a jiɓ. 7Ndiri ndiɓi aagi zah ta aska jigiɗ. Dəf aa dəfha ya, jigiɗ dəba a huraɓata, aa gəl takum. 8Ama, ndiɓi aagi zah ta a hayak ma ŋtan: dəf aa dəfha, gəl aa gəl ta, ba aa ba mbə dagala. Nduŋ ŋtaguleŋ ana minja, mbə teemeri a heɗe, minja raŋkwah ata nduŋ ŋtaguleŋ, zhana minja ramahkaɗ a heɗe.» 9Yesu zlap a zlap zhana, iŋgaya: «Huni teh katkadək, andza huni abə zləm a zlima,» iy.

Yesu a zlap abə maŋgəla ara veme?

(Mrk 4.10-12; Luk 8.9-10)

10Azha, magəli tə aagi kərəɗ aa kərəɗha abəra, ɗiw aa ɗiwzə, aagi iŋgaya: «Hwa zlapatana abə maŋgəla ara veme?» aagiy. 11Zhin a zhinatana ana Yesu, iŋgaya: «Huni, Bizlaf tavəlahuni təf ta sən səkən ma ɓah ka a la ndza bay Bizlaf ma ndza a wəzəm a wəzlaf, ama aŋta, aa talimas.» 12Ara ndə a ɗa, ala ma ndza abə səkən, a alima ma dəy aha, a aɗa dagal ara, ama ala ndə ŋkula ndza ara aka, kwa ma kajik ndə a kadeŋi a lima, həji aji bəza ara zhana. 13Sha ana ndə, sa kazlapatana abə maŋgəla, ara ndə a ɗa, aa kasar la, ama aa kagəra la akas, aa kateh ma, ama, aa kazlima akas. 14Ikwa abə a ɗal ana ma ndə ala ma ɗaf ma ndə a zlimazə ara Bizlaf Isaya a zlap abə ma tə, iŋgaya:

Huni ateh ma katkadək, ama huni kaazlima akas,

huni asar la, ama huni kaagəra la akas.

15 Ara ndə a ɗa, ꞌunəf ta ɓərɓər ikwa,

aa tanak zləm ta ka,

aa tampak nja ta ka,

aska aagi ŋkula a gəra la abə nja ta,

aagi ŋkula zlima a zlima abə zləm ta,

aagi ŋkula teh ma a ꞌunəf ta,

zhana ikwa, aa kaazhinha ara sa,

aska a sa mbəlata bəza akas, ana Bizlaf iy!

16«Ama, huni, ana ataa aŋkuni, ɓas ara huni, ara ndə nja kuni a kagəra la, zləm kuni a kazlima a zlima. 17Sa zlapahuni a ɗa ŋter, vərəm ana həji ma ɗaf ma ndə aa zlimazə ara Bizlaf aagi abə həji ma dəlili atama Bizlaf aagi, aa tamay a gəra səkən ndə huni kagəra, ama aa talima a gəras, zhana aa tamay a zlima ma ndə huni kazlima, ama, aa talima a zlima akas.»

Yesu a kaghal ma ma ndza ata maŋgəla ala ma kazləga

(Mrk 4.13-20; Luk 8.11-15)

18«Huni azha, huni teh ma ma ndza a maŋgəla ataa ala ma kazləga. 19Həji ma kazlima zlap ma ndza ataa la ndza bay Bizlaf ma ndza a wəzəm a wəzlaf ci, aa tazlima səku, aa saɓ andza ndiri ma zah tə a mazləm təf. Gətili taa tə, la a lazə a bəza a ꞌunəf ta. 20Həji ndiɓi aagi ya, aa saɓ abə kefe ndə ndiri a zah tə a heɗe. Ndə aa zlima ma Bizlaf, ɗal aa ɗal awa kahkah aska abə ɓas. 21Ama, aa taji a ma watsa a za dzara a ꞌunəf tas, wan kajik ikwa mbasl aa mbasl ka. Azha, yaka taa tə dawna zlap Bizlaf, a tsutsa a tsutsa mbasl aa mbasl ɗal awa ka. 22Həji ndiɓi aagi zhana, aa saɓ andza ndiri ma zah ta aska jigiɗ aagi. Aa tazlima zlap Bizlaf, yaka abə ɗa nja ma ndza aska ŋtsəɓ ma ndza a manahayak, tsa kaɓəw zlap watsa, a kafəl ara təmta akas. 23Ama, ndiɓi aagi saɓ andza ndiri ma zah a hayak ma ŋtan, azha aa tazlima zlap Bizlaf, aa tambəl ka, dəba a aba mbə, nduŋ ŋtaɗ, ana minja ya mbə teemeri a heɗe, minja raŋkwah, zhana minja ramahkaɗ.»

Maŋgəla ma ndza ata jiŋjiŋ

24Yesu tazhin a ghalatana maŋgəla minja, iŋgaya: «Tsakwa ana saɓ la ndza bay ma ndza a wəzəm a wəzlaf: Ala minja tazləga shiŋ ndiri ma ŋtan aka a la tə. 25Tiɗa abə zaɗə, həji aagi kawan, ala jaga tə taa tə, zləga a zləganə jiŋjiŋ aka a la ndiri tə watsa, azha tsaa kanda tə. 26Tiɗa ndə ndiri a dəfha, a kadaa ha, a gəra jiŋjiŋ a kadaa ha yəm. 27Həji ma ɗal zlən ataa cina jak watsa aagi, nda aa ndaha a zlapanə: “Madagal, shiŋ ndiri ma ŋtan ana ndə hwa zləgə a la kwa ya, mbara a ndaha ana jiŋjiŋ ma ndza a la watsa zhana a vata?” aagiy. 28Azha, zhin a zhinatana iŋgaya: “Ala jaga naka ma ɗalə,” iy. Azha həji ma ɗal zlən aagi, iŋgaya: “May kwa ci, ni nda a dəɗ jiŋjiŋ watsa ka vəw?” aagiy. 29“Aŋghə, ara ndə a ɗa, tiɗa ndə, huni kagasə a dəɗ jiŋjiŋ watsa aagi, huni adəɗ aara abə ndiri ma ŋtan yəm. 30Huni mbaslata ka tiwtiw, aa madəf, aa magəl a gwar ata vah ndə həji kadzamha səkən bəza ata wəvə azha, vah watsa sa azlapanə ana ala maɗal zlən: Madzə ka parpar kwagwa, azha madzam aka tsəɓakw, aska a zlar ka a kwahu, tsa kazlaɗha ndiri ma ŋtan a za a cebem naka,”» iy.

Maŋgəla ma ndza ata mbə magəy guma

(Mrk 4.30-32; Luk 13.18-19)

31Yesu ghal a ghalatana maŋgəla minja zhana, iŋgaya: «La ndza bay ma ndza a wəzəm a wəzlaf a saɓ andza mbə magəy guma ndə ala a ji, zləga a zləgə ka a la tə. 32Sha ana mbə səkən ma feŋ a taba shiŋ səkən aagi tiwtiw. Ama, ndə həji zləgə ka, dəf a dəf tə, dəba a agəl andza nduŋ mpi a taba səkən ma zləga ka a la ndiri aagi: A kaza ra, vigin aagi aa tsa kalam jak ata maram tə aagi.»

Maŋgəla ma ndza ata faŋtər

(Luk 13.20-21)

33Yesu zlap a zlapatana maŋgəla minja wəruk zhana, iŋgaya: «La ndza bay ma ndza a wəzəm a wəzlaf a saɓ abə faŋtər ndə wala a ɗal ŋfa tə kajik ikwa, dəba a akəvəɗ ka a ŋfa ma dagal ci, ŋfa watsa tsa kahaf.»

Yesu a kasərək ma ata maŋgəla

(Mrk 4.33-34)

34Yesu a ghalatana ikwa ana səkən watsa aagi tiwtiw abə maŋgəla a ŋgaɓa həji aagi. Tazlapazə ma tə, maŋgəla a mən aka səku akas. 35A ɗal andza ndə ala ma ɗaf ma ndə a zlimazə ara Bizlaf Isaya a zlap, iŋgaya:

Sa azlap ma naka abə maŋgəla aagi,

Sa aghalha səkən ma va a ɓah ta ꞌwa aka ata baha manahayak.

Yesu a kaghal ma ma ndza a maŋgəla ma ndza ata jiŋjiŋ

36Azha, mbasl a mbasl ŋgaɓa həji aagi ka, tsaa kanda tə a wata. Magəli tə aagi kərəɗ aa kərəɗakənə, aagi kəsha iŋgaya: «Ghalani zlap ma ndza a maŋgəla ma ndza ata jiŋjiŋ,» aagiy. 37Yesu zhin a zhinatana abə ha tə, iŋgaya: «Ala ma zləga ndiri ma ŋtan, Mbə həji ma dəgnak. 38La ndiri ya, manahayak. Ndiri ma ŋtan ya, sha ana wəzhi la ndza bay Bizlaf aagi. Jiŋjiŋ ya, həji ma ɗal awa aska səkən ma gamak aagi. 39Ala jaga ma zləga jiŋjiŋ, sha ana Wəliɓi. Dzamha səkən ma ndza ata wəvə, a ɗa kəɗaŋ manahayak, həji ma kadzamazə aagi ɗa matəf Bizlaf aagi. 40Andza ndə, həji kabəl jiŋjiŋ a feŋ ka a kwahu, ikwa yəm ana kəɗaŋ manahayak abə a aɗal. 41Mbə həji ma dəgnak a azlənha matəf tə aagi agamha həji ma gəy ma aagi a bəza a la ndza bay tə abə həji ma ndəv həji aagi ka ɗal mpət. 42Azha, aagi akwiyata ka a kwahu ma ghəlɓəkɓək ma dagal. A tsutsa dagala ana ma kaahan aagi, zhana aagi aɓam zliɗeŋ. 43Ama, həji ma dəlili aagi aɓal andza pish a la ndza bay Vava ma dagal, huni teh katkadək andza huni abə zləm a zlima.»

Maŋgəla ma ndza ata ŋtsəɓ ma ɓahaɓah

44«La ndza bay ma ndza a wəzəm a wəzlaf, a saɓ andza səkən ma ɓahaɓah a la, ala ma gəra a ɓah bəza, zhana a ɓas ara, a ber səkən ma ndza a ra tə bəza tiwtiw, azha a zhinha a səkəm la watsa bəza.» 45Tsakwa zhana ana la ndza bay ma ndza a wəzəm a wəzlaf, a saɓ andza ala ma ber səkən ma gas fewfew ma ŋtan. 46Ndə a gəra fewfew ndə sulay a heɗe dagala ya, tsaa kanda a ber səkən tə aagi bəza tiwtiw, aska a səkəm fewfew watsa.

Maŋgəla ma ndza ata kadara

47«Tsakwa zhana ana saɓ la ndza bay Bizlaf ma ndza a wəzəm a wəzlaf: A saɓ andza kadara ndə həji kafakə ata mtil, azha a mbəlaha kala shiŋ ŋkilif kwa ma vatəy. 48Ndə a kaɗa mkpef ya, həji ma mbəla ŋkilif aagi anjiwazə a mazləm yəm, azha dəba aagi adəm ŋkilif ma ŋtan aagi, aa tsa kazata ka a wədzəm, ama aa tsa kakwiy ma ŋkula kadək aagi bəza. 49A aɗal ikwa ana kəɗaŋ manahayak. Matəf Bizlaf aagi anda a pəreh həji ma gamak aagi a bəza a taba həji ma dəlili aagi. 50Azha aagi akwiyata ka a kwahu ma ghəlɓəkɓək, a tsutsa abə həji aagi ahan, aagi aɓam zliɗeŋ.»

Səkən msəra abə səkən wiyə

51Yesu ɗiw a ɗiwzata, iŋgaya: «Huni tazlima ma watsa tiwtiw vəw?» - «Ayəw», aagi kəsha. 52I təmta iŋgaya: «Kala masərək ma ma garagar ma bəw tə andza magəla ataa la ndza bay ma ndza a wəzəm a wəzlaf, a saɓ andza cina jak ma lima ŋtsəɓ a səkən msəra aagi abə səkən wiyə.»

Həji ma ndza a Nasaratu aagi, aa kaji ma Yesu səku

(Mrk 6.1-6; Luk 4.16-30)

53Ndə Yesu a kəɗaŋ zlap maŋgəla bəza, tsaa kanda tə a bəza a tsutsa. 54Peteŋ a hayak tə ndə a mbəwha a mən, dəba a asərəkatana səkən a həji a jak ta tarha ta aagi. Kwa vaye ma ndza a tsutsa tiwtiw, hak aa ghərəŋ ta. Aa kazlap: «Sən səkən ma ndza andza watsə a ndaha a vata? A ɗalzə abə a ɗal tsaɓan ma həna watsə aagi avaŋga?» aagiy. 55«Həna mbə ataa ala ma dza jak ka vəw həji wəra? Mamən ci, zləm tə Mariyama aɓa wəra? Zhana tiw Yakuba, Yusufu, Simun abə Yahuda aa ɗa zliŋgin səku azha vəw? 56Azha, hildimi mamən aagi a ɗi a taba takwa aɓa wəra? A daaha ɓərɓər tə ta ɗal səkən watsa aagi mbara ana aŋtə a vata?» 57Tabəw tə ana aŋta, ma ta a ndəvata. Ama, Yesu, zlap a zlapatana, iŋgaya: «sləf ata ala ma ɗaf ma ndə a zlimazə ara Bizlaf kwa a vatəy ci, gagagha a hayak tə, ata la ndə a mbəw a tsutsa abə a wata tə abə həji aagi kaŋkalzə nja tə.» 58Yesu taji a ɗal səkən tsaɓan kajik a hayak aka zhana ara ndə aa ŋkula ji nja tə səku.

Currently Selected:

Mata 13: GOU

Highlight

Copy