Yakuba 2
2
Huni ɗiw a tsa ghala ka a taba həji səku
1Zlina mana aagi, huni həji ma ɗal awa a Yesu Kərist, ma ɗa Bay Madagal takwa ma mkpef abə sləf, azha ci, huni ɗiw a tsa ghala a taba həji aagis. 2Huni ji saɓ ma minja: Andza ala ma ŋtsəɓaŋtsəɓ minja taha ata ladzam kuni. Tatsa fewfew wəshi bəza ata ra, abə rəkuts ma ŋtan a heɗe, ala titikw minja taa tə yəm ata ladzam watsa, rəkuts ma gwadzagwaɗay ana ma ndza a heɗe, 3andza huni, huni mayɓa ala ma tsa rəkuts ma ŋtan, azha huni kazlapanə, huni iŋgaya: «Hwa, ataa aŋkwa ndza kwa ka a ɗi ata la ma ŋtan watsə», ama ana ala titikw ya, huni kazlapanə huni iŋgaya: «Hwa, ataa aŋkwa, gar kwa ka a ɗi,» aka səku ci, «Ndza kwa ka a ɗi ata hayak aska ŋgas naka!» 4Andza huni kaɗalə ikwa ya, huni tsa ghala a taba kuni aka səku azha vəw? A ɗa huni zla guma ata həji ndiɓi aagi abə ꞌunəf ma gamak aka səku azha vəw? 5Huni tehzə, zlina mana ma mayamay aagi: Bizlaf tadəm həji ma ɗa titikw ata nja manahayak aagi, aska aagi abəw ta a həji maŋtsəɓaŋtsəɓ aagi a wəzaha a ɗal awa, azha aagi alima Bay ndə a ghal ka a vəlatana a həji ma kamay aagi. 6Ama huni, huni kasatana yaka a həji titikw aagi. Aɓa azha ci, həji ma ŋtsəɓaŋtsəɓ aagi ana ma kandəraɗahuni, zhana təmta ana ma kajaɓahuni ata guma aɓa wəra? Təmta ma katsahuni ata la zla guma wəra? 7Həji ma ŋtsəɓaŋtsəɓ aagi ana ma kara zləm ma təwah ndə Bizlaf a vəlahuni. 8Ɗerewal ma ghwaɗeɗe a kazlap iŋgaya: May masliji kwa andza ha kwa. A ɗa ma ma garagar ataa Bay, andza huni tanjin ma garagar watsa bəza a heɗe heɗe ci, zlən ma təwah ana ndə huni ɗalə. 9Ama, andza huni tatsa ghala ka a taba həji aagi meni, huni ɗal mpət, azha ma ma garagar ataa Musa tatsəzahuni ka a guma, ara ndə huni ŋkula njin a heɗe a heɗe. 10Ara ndə a ɗa meni, andza ala taɗal mpət aka ata ma ma dzawadzaw ataa ma garagar ŋtaguleŋ ci, ama tanjin ndiɓi aagi bəza a heɗe heɗe, a ɗa tanjin ma ma garagar aagi tiwtiw kwa akas, 11ara ndə a ɗa Bizlaf tazlap, iŋgaya: Hwa ɗiw a ɗal mazheref səku tazlap zhana, iŋgaya: Hwa ɗiw a dza ala səku andza hwa taɗal mazheref aka səku, ama hwa tadza ala, watsa ci, hwa tanjin ma ma garagar a heɗe heɗe akas. 12Huni zlap, zhana huni ɗal səkən andza həji ndə Bizlaf a kazla guma ata təmta gwara ara ma ma garagar ma kavəlahəji zəghay. 13Ara ndə a ɗa, ma vah guma ci, hahər a kaadza Bizlaf aska həji ma ŋkula a zaha hahər ata həji ndiɓi aka səku. Ama kwa ndə Bizlaf a kazla guma, hahər a dzə wəruk.
Ɗal awa abə zlən aagi
14Zlina mana aagi, kat tə veme ndə ala a kazlap, iŋgaya: Sa abə ɗal awa, andza taghal abə zlən tə aka səku? Kadək vəw, ɗal awa kula a reh bəza vəw? 15Andza zlina matsuh minja aka səku həla matsuh, aa ndza a matirshishim, zhana səkən zəm ara təmta kala pish akas, 16ala minja a taba kuni zlap a zlapatana iŋgaya: «Huni nda abə təwah, huni nda tsa rəkuts, azha huni zəm səkən ga,» iy, ama andza huni tavəlatana səkən ma kalamzata aka səku ya, kat zlap kuni watsa veme? 17A ndza andza sha ana ɗal awa, andza hwa taɗalanə awa a Bizlaf, ama zlən abəra aka səku ci, ɗal awa kwa tamca tə.
18Ama ala a zlap, iŋgaya: «Hwa abə awa, sa yəm sa abə zlən, ghalaka ɗal awa kwa ndə zlən a ŋkula ndza abəra, azha sa, sa aghalahu abə zlən naka aagi, ɗal awa naka aka. 19Hwa taɗal awa ci, Bizlaf a ɗa ŋtaɗ vəw? Ma kwa a heɗe a heɗe, kwa miɗ ma gamak aagi kaɗalanə awa yəm, zhana aa kanaana ara ŋzliŋ.» 20Mabamabam, azha hwa kasən ci, hwa abə ɗal awa, zlən abəra aka səku ci, ɗal awa watsa ɓəlaakaka aka wəra? 21Jiji takwa Ibərahima a ɗalzə abə Bizlaf a sən bəza andza ala ma dəlili avaŋga? A sən bəza ci, dawna zlən tə, ndə a vəla mbə tə Isiyaku ka ata pasla wəra? 22Hwa tagəra awa tə abə zlən tə, awa tə zlec abə zlən tə, sha ana ma bəw ka a ɗa ala ma dəlili, 23azha ma ndə ɗerewal ma ghwaɗeɗe zlap takəliy tə, ndə iŋgaya: Ibərahima taɗalanə awa a Bizlaf. Dawna sha abə a sənə andza ala ma dəlili atama tə, azha Bizlaf a kayə ci, ŋgwanambə. 24Huni kagəra, Bizlaf a kasən ala a ndza ala ma dəlili ci, dawna zlən tə yəm, gagagha ata ɗal awa tə səku. 25A ndza andza Rahab, wala ma kawan tayah. Bizlaf a sənə andza ala ma dəlili dawna zlən tə ndə a ɗalə, ara ndə a lamzə həji Isərayila ndə aa zlənata aagi, azha ndə a lamzata a pewata bəza abə təf maparam, aska aagi arehata. 26Ara ndə a ɗa, andza ikwa yəm, zlikusəm ndə miɗ a ŋkula andza a mən, tamca tə, andza ikwa yəm, ɗal awa ndə zlən a ŋkula ndza abəra, tamca tə.
