YouVersion Logo
Search Icon

Zlən ataa həji ta zlən aagi 8

8
1Sul, ma tə ŋtaguleŋ abə həji ma dza Etiyen aagi.
Diw yaka ataa ladzam həji Kərist aagi
Ma vah watsa, bay yaka minja a ndaa tə ata ladzam həji Kərist ma ndza a Wərusalima aagi. Həji ma ɗalanə awa a Yesu aagi tiwtiw, aa tawiɗ ta a ŋge a hayak Yahudiya aagi tiwtiw abə hayak Samariya, həji ta zlən aagi ana ma ɗa mba ka.
2Həji aagi ndə deŋ ŋkwaɓ ta atama Bizlaf aagi, kah aagi Etiyen bəza, dəba aagi ahan dagala a heɗe. 3Ataa Sul ya, a may a deneh ladzam həji Kərist tə aagi bəza. Tsaw a nda a wata həji Kərist aagi tiwtiw, tsa kambəla mawəl aagi abə wali, a kwiyata a jak yaka. 4Həji ma ji ma Yesu nana aagi, aa tsaa katəwər, tsaa a ɗi, tsaa a ɗi, aa kaghal Ma wiyə ma təwah.
Ma Bizlaf a hayak Samariya
5Ikwa abə Filip a taduk a hayak ma dzamadzam Samariya, a tsutsa dəba a aghal ma ata Kərist. 6Həji aagi tiwtiw, ma ta ma ŋtaguleŋ tadzəvaya, tsaw aa ndaha vərəm, dəba aagi ateh ma tə abə ŋkwaɓ katkadək, ara ndə a ɗa, aa tazlima, a kazlap ata tsaɓan ndə a ɗal aagi, aa tagərata. 7Vərəm ana miɗ ma gamak, ma ndaa ta a bəza a zlikusəm həji dawər aagi, aa kadza wəla abə guɗaŋ tə, vərəm ana həji ndə zlikusəm ta bazl ta aagi, abə həji ma gəy ta aagi, aa mbəl. 8Azha, ɓas ma dagal a hayak ma dzamadzam watsa.
9A tsutsa, a hayak ma dzamadzam watsa, ala minja aka, zləm tə Simun, a kambaɗ abə menjivek, həji ma ndza a hayak Samariya aagi kaghərəŋ a heɗe a guɗaŋ. A kazlap, iŋgaya: A ɗa ala ma ŋtan. 10Azha, həji aagi tiwtiw, magulakwakw aagi abə wəzhi, aa teh ma tə abə ŋkwaɓ katkadək, aagi iŋgaya: «Ala watsa, a ɗa ɓərɓər Bizlaf, ndə həji kayə Ɓərɓər ma dagal.» 11Wan aka, aa kateh ma tə abə ŋkwaɓ, ara ndə a ɗa, a kaghərəŋ həji aagi abə mbaɗ menjivek tə watsa. 12Ama, anawatsə, ndə aa zlima ma ataa Filip, ndə a kaghalatana Ma wiyə ma təwah ataa Yesu Kərist abə ma la ndza bay Bizlaf, həji ma ɗal awa watsa aagi, dəba aagi aɗal batem, mawəl aagi abə wali. 13Simun abə ha tə, tabəw tə ana ala ma ji ma Yesu abə ha tə, ɗal a ɗal batem bəza, a kazhin a ji a mbasl Filip səku. Ndə a gəra shiŋ tsaɓan abə mbaɗ ndə a va ŋkula gərazata aagi, sha ana ma diw a ghərəŋ tə mpər.
14A Wərusalima, ndə, həji ta zlən Yesu aagi zlima həji ma ndza a hayak Samariya aagi talamzə zlap Bizlaf, dəba aagi azlənha Piyer abə Yahwana. 15Ndə, aa ɗa gwar a tsutsa, dəba aagi atar Bizlaf, aska həji ma ndza a hayak Samariya aagi a lima Miɗ ma ghwaɗeɗe. 16Ara ndə a ɗa, kwa Miɗ ma ghwaɗeɗe tanaka a gwarha ata ala kwa ŋtaguleŋ a taba ta akas. Batem gagagha, ana ndə aa ɗal bəza ata zləm ataa Bay Madagal Yesu. 17Azha, tiw Piyer abə Yahwana, dəba aagi atsa ra aha təmta, azha həji Samariya aagi talima Miɗ ma ghwaɗeɗe. 18Ama ndə Simun a gəra həji ma ji ma Kərist aagi lima Miɗ ma ghwaɗeɗe bəza, tiɗa ndə həji ta zlən Yesu aagi aa katsa ra aha ta, azha pa a vəlatana dala a tiw Piyer abə Yahwana. 19Dəba a azlapatana, iŋgaya: «Huni vəlaka ɓərɓər watsa, aska həji ndə sa kaatsa ra aha təmta aagi, aagi alima Miɗ ma ghwaɗeɗe yəm,» iy. 20Ama Piyer zhin a zhinanə, iŋgaya: «Dala kwa, marəɗa, hwa, huni abə sha. A ha kwa ya, hwa səkəm səkən ndə Bizlaf a kavələ ɓəlaakaka bəza abə dala kwa. 21Hwa kasən səkən ma kapew a ɗi meni, ataa aŋkwa akas, kwa ma ɗa mavəy kwa a mən akas, ara ndə a ɗa, ꞌunəf kwa dəlili atama Bizlaf akas. 22Səkən ndə hwa ɗal gamak, sən ka, azha tar Bay Madagal. Kata a kaji a pəlahu mpət kwa ka, ata deŋ ŋkwaɓ ma gamak ma ndaahu ka watsə. 23Ayəw, sa tagəra, ꞌunəf kwa a ndza a ɗa nja abə mava ataa mpət.» 24Azha, Simun zhin a zhinazə, iŋgaya: «Huni abə ha kuni, huni taraka Bizlaf, ara ndə səkən ndə huni ŋgəɗata watsə aagi a ndaaksa.» 25Tiw Piyer abə Yahwana, a diwzha ndə aa ghal səkən ndə aa gəra abə ndə aa zlima aagi bəza, abə ghal ma Bay Madagal bəza, tsaw aa zhina ta azha a Wərusalima, dəba aagi aghal Ma wiyə ma təwah a hayak Samariya ma dzuk dzuk aagi tiwtiw.
Filip abə ala ma ndza a zlən ma dagal a hayak Etiyupiya
26Matəf ataa Bay Madagal, zlap a zlapanə a Filip, iŋgaya: «Nda gwara a nduŋ ata təf ma katadukha a wəzəm a Wərusalima a pew gwara a hayak Gaza, ma ɗa a damə,» iy. 27Azha, Filip tsaa kanda tə, kwa tahəzək akas. Tiɗa ata təf, a gəra feŋtew minja, a ɗa ala ndə Etiyupiya, ala ma ndza a zlən ma dagal. Ŋtsəɓ ataa Kandas a ndza a ra tə tiwtiw, ma ɗa wala, bay aha hayak Etiyupiya. Ala watsa tsaw a ndaa a Wərusalima a tarha Bizlaf. 28Ndə a zhina tə a wata tə, a kandza a muta dakw tə, a kayə abə guɗaŋ tə a ɗerewal, ana ma ndə ala ma ɗaf ma ndə a zlimazə ara Bizlaf Isaya a ŋtir ka. 29Miɗ ma ghwaɗeɗe tazlapanə a Filip, iŋgaya: «Nda akale abəra muta dakw watsə,» iy. 30Filip a tsaa shi, a zlima ala ndə Etiyupiya ma ndza a zlən ma dagal watsa, a kaya ɗerewal ataa ala ma ɗaf ma ndə a zlimazə ara Bizlaf Isaya, azha dəba a azlapanə, iŋgaya: «Hwa kazlima ma ndə hwa kayə watsə ŋter azha vəw?» iy. 31Ala watsa zhin a zhinanə, iŋgaya: «Mbara azha, sa aɗalzə abə sa azlima avaŋga? Kwa ala a ghalzaka akas,» iy. Azha, ya a yaha Filip a taf a muta, a ndza abəra. 32Tsakwa ana ma ndə a kayə a ma watsa:
A ndza andza ŋcemek ndə ala a kajaɓi a fatə,
andza mbə ŋcemek ndə həji kazla dzuguɗ tə ma ŋkula kahan,
ikwa abə a ndza tə ka ɗekɗek.
33 Haw ana ndə a tiwi, talima zlən ma dəlili akas.
Ma kaazhina a zlap ata shiŋ tə vaya? Kwa ala akas,
ara ndə a ɗa, tasafayaya ana miɗ tə ata manahayak.
34Ndə Etiyupiya ɗiw a ɗiwzə Filip, iŋgaya: «Sa kadzahu ra, ata vaya abə ala ma ɗaf ma ndə a zlimazə ara Bizlaf a zlap shiŋ ma ma həna watsə? Ata ha tə vəw, ata ala minja vəw?» 35Azha, Filip dəɗ a dəɗ ma tə, ata Ɗerewal ma ghwaɗeɗe, dəba a aghalanə, Ma wiyə ma təwah ataa Yesu. 36Aa kandaɓa nda ta wəruk, peteŋ aagi ata la ndə yəm a tsutsa. Ala ndə Etiyupiya dəba a azlapanə a Filip, iŋgaya: «Tsakwa ana yəm, mbara ma katakaka a sa ɗal batem azha veme?» iy.[ 37Filip a zlapanə iŋgaya: «Andza hwa taɗal awa abə ꞌunəf ŋtaɗ, hwa kula a ɗal batem.» Ndə Etiyupiya iŋgaya: «Ayəw sa taji, Yesu a ɗa Kərist mbə Bizlaf.»] 38A tsutsa a tsutsa, gar aagi muta dakw ta ka, Filip abə ala ndə Etiyupiya watsa, tsaw aa nda gbak gbak a yəm, azha, Filip dəba a aɗalanə batem. 39Ndə, aa ndaa ta a bəza a yəm ya, leŋ Miɗ ataa Bay Madagal a ji Filip bəza. Ala ndə Etiyupiya watsa, a kazhin a gəra akas, ama dəba a andaɓa nda tə ŋtaguleŋ tə abə ɓas. 40Ataa Filip ya, a hayak Asdud, a kaghal Ma wiyə ma təwah a hayak ma dzamadzam watsa tiwtiw, ata la ndə a pew a gwar a hayak Kaysariya.

Highlight

Share

Copy

None

Want to have your highlights saved across all your devices? Sign up or sign in