Zlən ataa həji ta zlən aagi 19

Gwar Pul a Efesus

1Tiɗa ndə Apulus a hayak ma dzamadzam Kuriŋtu, peteŋ Pul taa tə a hayak ma dzamadzam Efesus, a pewha gwara aha wəzəm ndiɓi aagi. Gəra a gəra magəli ndiɓi aagi, 2ɗiw a ɗiwzata iŋgaya: «Ndə huni bəw kuni a həji Kərist aagi ya, huni talima Miɗ ma ghwaɗeɗe azha vəw?» iy. Ama, zhin aa zhinanə, aagi iŋgaya: «Ni tava a zlimazə kwa zlap ma ndza ata Miɗ ma ghwaɗeɗe aka səku!» aagiy. 3Pul ɗiw a ɗiwzata, iŋgaya: «Mbara shiŋ batem ndə huni ban ma ndza a vata?» Zhin aa zhinanə, aagi iŋgaya: «Batem ataa Yahwana,» aagiy. 4Pul i təmta iŋgaya: «Yahwana taɗalatana batem, a həji ma kamay a mbaɗ landza ta aagi bəza. Azha, zlap a zlapatana a ŋgaɓa həji aagi, iŋgaya: “Huni ɗalanə awa ana ala ma kaaɓin a ndaha a diwzha naka i təmta, a may a ghal ci, a Yesu.”» 5Aa katehi, azha, aa talamzə batem ata zləm Bay Madagal Yesu. 6Pul pa a tsa ra ata ha ta aagi, azha Miɗ ma ghwaɗeɗe tsaw a ndaha aha təmta: Aa kazlap abə ma ataa hayak ndə həji ŋkula sən zlap ta, aa kazlap ata zləm Bizlaf. 7Həji watsa aagi ɗal bəza wam aha gbak.

Ɗaf ma Bizlaf Pul a hayak Efesus

8Pul tsaw a nda a jak ta tarha Yahuda aagi, azha a tsutsa, ŋtəra mahkaɗ, ŋzliŋ a kadzə ata laghal ma ataa la ndza bay Bizlaf akas, a kaŋcah aska həji aagi ateh ma tə. 9Ama, ndiɓi aagi taŋkalzə ma watsa, aa kaji zlima ma tə səku, aa tsa kaɓas ata ma ndə a kasərək watsa ata nja manahayak tiwtiw. Azha, Pul tsaa kanda tə bəza abəra təmta, leŋ a ji magəli aagi aara, dəba a azlapatana kala pish a jak lakwal Tiranus. 10Səkən watsa, va gbak a kaɗal. Ikwa, tiwtiw həji ma ndza a hayak Asiya, Yahuda aagi abə həji ma ŋkula ɗa Yahuda aagi kula a zlima zlap Bay Madagal.

Wəzhi Sikivas aagi

11Bizlaf a kaɗal səkən tsaɓan aagi gwara ata ra Pul. 12Azha, leŋ həji daatana a həji dawər aagi, patak rəkuts abə patak ta saɗ wəreɓ ma dishazə gwabəla Pul aagi. Həji watsa aagi, dawər ta aagi kwaleŋ azha, miɗ ma gamak aagi tsaa kanda ta. 13Yahuda ndiɓi aagi aka, aa katəwər, tsaa a ɗi, tsaa a ɗi. Aa gas a təlzə gam miɗ ma gamak aagi ata zləm ataa Bay Madagal Yesu, aa kazlap, aagi iŋgaya: «Ata zləm Yesu watsə, ndə Pul a ghalə, huni ndaa kuni bəza! A ɗa deŋ kuni səku!» 14Wəzhi mawəl aagi ŋshiliɗ, ataa madagal maɗal kwakus Yahuda aagi, ndə zləm tə a ɗa Sikivas, aa katəlzə zlən watsa. 15Azha, miɗ ma gamak zhin a zhinatana, iŋgaya: «Yesu ya, sa kasənə, zhana sa kasən ala ma ɗa Pul. Ama, huni, huni ɗa azha vaya?» 16Azha, ala ndə miɗ ma gamak a kaɗalanə watsa, kap ata wəzhi ataa Sikivas aagi. Ɓərɓər tə dəy aha təmta tiwtiw, tasatana yaka dagala. Azha, aa ndaa a bəza a wata watsa abə shi, a matirshishim, aa tagəruz ha bəza, zlikusəm ta tiwtiw mbəlah. 17Həji ma ndza a hayak Efesus aagi tiwtiw, Yahuda aagi abə Gərek aagi tazlima ma watsa, ŋzliŋ tadzata bəza tiwtiw, kwa vaye a kahəmən dagal ataa zləm Bay Madagal Yesu.

18Vərəm, a taba həji Kərist aagi taha, aa ghalha səkən ma gamak ndə aa ɗalata atama həji ka tiwtiw. 19Vərəm a taba həji ma kambaɗ aagi, dzam aa dzam ɗerewal mbaɗ ta watsa ka abə tsəɓakw ata la ma ŋtaguleŋ, feŋ aa feŋ ka ata nja manahayak tiwtiw. Dəba həji aŋgəɗ dala ma gəy a səkəmha ɗerewal watsa aagi ya, a ɗal dala burəw radzaɓən. 20Azha, abə ɓərɓər ataa Bay Madagal, zlap a kavas a fəl, zhana a kalima dzara ma mgbaŋmgbaŋ.

Həɗəw ha a hayak Efesus abə nda Pul

21A diwzha ma watsə aagi, Pul leŋ a ji deŋ minja aka, a ŋkwaɓ tə aska a pew gwara a hayak Makeduniya abə hayak Akaya aska a nda a Wərusalima, iŋgaya: «Ndə sa kaaɗa gwar a tsutsa, a kaɗiw ci, gwar sa gwar ka a hayak ma dzamadzam Ruma,» iy. 22Zlən a zlən tiw Timuti abə Erastus a hayak Makeduniya, tiɗa ndə sha tə ana aŋtə, a kakərəɗ wan tə atama kajik a hayak Asiya. 23Ata va watsa abə həɗəwha ma gamak a guɗaŋ aagi ɗal, dawna zlap ma ndza ata njin təf Bay Madagal. 24A ɗa ala ma ɓəsl desh aagi, zləm tə Demitiriyus, a kaꞌun jak takun Artemis abə dala. Dawna zlən watsa, dala bay tə ana ndə a ŋtəratana a həji zlən tə aagi. 25Azha, Demitiriyus dzam a dzam həji ma ndza a zlən tə aagi abə həji ma ndza abəra aagi, iŋgaya: «Ŋgwanambə naka aagi, huni kasənə, dawna zlən watsə abə həji kandza a təwah. 26Ama Pul watsə iŋgaya, takun ma ꞌun abə ra həji aagi ɗa səkən aagi səku. Azha, talima həji ma zlimanə zlima aagi vərəm, ama a ɗi gagaghas, ama a hayak ma dagal ataa Asiya tiwtiw. Huni tazlima aa kazlap a heɗe tiwtiw, azha, huni kasənə. 27Səkən watsə a daaha səkən ma gamak a zlən takwa. Zhana, jak kwakus Artemis ataa madagal takwa, ndə həji ma ndza a Asiya ma kahawanə tiwtiw a fəcak tə, kiyzaŋkwa a ŋcah ara ndə zləm tə a kaagəy tə.» 28Ndə həji aagi aa zlima ya, aa taghuɗek ta a guɗaŋ, dəba aagi adza wəla, aagi iŋgaya: «Artemis ana madagal ma ndza aha həji ataa hayak Efesus aagi,» aagiy. 29Azha, həji aagi tahəɗəw ta a hayak tiwtiw, kwa vaye tiwtiw a kavas nda ata la dzam həji aagi ata la lawaɗ. Kaw aa mbəla Gayus aara abə Aristarkus tiɗa ndə a kanda a təf hayak Makeduniya, aa ɗa həji ma kalah Pul aagi ata laciwir tə. 30Pul dəba a aji deŋ, a nda atama həji ma dzam ta ka watsa, ama magəli Yesu aagi tatak ka. 31Həji ma ndza a zlən madagal dagal ma ndza a hayak Asiya ndiɓi aagi, ŋgwanambə ataa Pul aagi. Zlən aa zlənanə həji aagi aska aagi a ndaha a zlapanə ma ma ŋtaɗ wəruk: «Hwa ɗiw a ghal ha kwa ata la lawaɗ manahayak səku,» aagiy.

32Kwa vaye a kadzaɓa wəla tə parpar aha wəla ndə masliji tə a kadzə, ɓam ma dəy abə həɗəwha madagal a taba ŋgaɓa həji aagi. Dəy həji aagi kasən ma ma dzəvata səku. 33Yahuda aagi ana ma diw a ŋtsuk Aleksandire atama, azha həji ndiɓi aagi kaghal səkən ma pew. Azha, kaf a kaf ra ana Aleksandire, a may a ghalatana a ŋgaɓa həji watsa aagi ana səkən ma pew. 34Ama ndə aa zlima a ɗa ndə Yahuda ya, a ɗal bəza ler gbak, həji aagi kadza wəla, ma ta ma ŋtaguleŋ, aagi iŋgaya: «Artemis ana madagal ma ndza a hayak Efesus!» 35Ala ma ŋtir səkən ndə a gar ka aska a hawanə ata hayak, ləm a ləm a diɓ həji aagi ka, aagi iŋgaya: «Həji ma ndza a hayak Efesus aagi, ala ma ŋkula sənə ya, hayak ma dzamadzam Efesus ana garak ataa jak kwakus Artemis ma dagal, abə səkən ma lamalam tə ma təwah watsə a ndəvha a wəzəm a wəzlaf wəra? 36Kwa ala ma zlap ma maparam akas. Huni mbasl ma ka, azha huni deŋzə ŋkwaɓ kuni bəza abə huni anda a ɗal səkən minja. 37Ara ndə a ɗa, həji ndə huni daata watsə aagi, həji ma ŋkula ɗalzə səkən ma gamak ata jak kwakus aagi, zhana, aa tara səkən takwa ndə həji kanjini akas. 38Andza Demitiriyus abə həji ma pal a tsutsa aagi may a tək ma ata ala aka, həji ma zla guma aagi aka, aa majaɓ ma ta ata guma. Huni ndaa atama həji ma zla guma aagi. 39Andza ma kuni ndiɓi aagi aka zhana, ma watsa a riy tə gwara ara həji ma dzam ta ka aagi. 40Həji talam kusəm səku ya, ma a tək tə ata həji dawna ɓam ma takwa ma ndza akacihwa watsə. Kwa həji tagəra ma ma dzəvahəji ka a ɗi aka səku.» Ndə a kəɗaŋ zlapatana bəza, dəba a awiɗata ka.

Currently Selected:

Zlən ataa həji ta zlən aagi 19: GOU

Highlight

Copy