2 Tesaluniŋki 3
3
Huni tarha aska ni
1Səkən ma finha meni, zlina aagi, huni tarha aska ni, aska zlap ataa Bay Madagal a ɓizh tə kahkah, aska a lima sləf, andza ma ndza ara huni. 2Azha aska həji areh takwa ara həji mshiɗ aagi abə həji ma gamak aagi: Ara ndə a ɗa, ɗal awa ara həji aagi tiwtiw akas. 3Bay Madagal a ɗa ala ma dəlili: A abəwahuni ka a həji ma ɓərɓər aagi, azha a arehahuni bəza ara Ala ma gamak. 4Bay Madagal ma vəlani tsa ŋkwaɓ aska huni. Ni kasən ci səkən ŋtaɗ aka: Huni kateh ma ndə ni kaghalahuni aagi, azha huni kanjini a heɗe heɗe. 5Bay Madagal manjin ꞌunəf kuni, a huni a may Bizlaf, aska huni a səw ma andza Kərist.
Kwa vaye maɗal zlən
6Zlina mana aagi, ni kavəlahuni ma watsə ata zləm ataa Bay Madagal Yesu Kərist: Huni ɗiw a ji a ciwir abə həji Kərist ma ɗa masagal aagi səku, ma ŋkula ji a lamzə sərək ma ma ndaha ara ni aagi. 7Huni, huni kasənə katkadək avaŋga abə huni ji basl zlən cini. Ara ndə a ɗa, ni ndzaha ara huni andza həji masagal aagi səku. 8Kwa ni taɗiwzə wəda ndə ni zəmə ara ala akas, ara ndə a kaaɗalanə ndəlndəl a kwa vaye a taba kuni, ama ni taɗal zlən ma ndəlndəl, ni ŋtəɓəl, zaɗə abə bishkit ni kaɗal zlən. 9Ŋter ci, təf ara ni aka, aska huni alamzani, ama ni ma may a ɗalə ikwa aska huni a basl zlən cini. 10Ara ndə a ɗa, tiɗa ndə ni kandza ara huni, ni tazlapahuni ma watsə ka ikwa: Andza ala kaji zlən a ɗal səku ci, a ɗiw a zəm səkən tep səku! 11Avəli ni kazlima aa kazlap ikwa: a taba kuni, həji ndiɓi aagi aa ɗa masagal aagi, kwa aa kaɗal səkən minja akas, aa tsa kanda ta a səbarɓa zlən ataa həji ndiɓi aagi. 12Ataa həji watsa aagi meni, ni kaɗiwzahuni, zhana ni kaghalahuni ma watsə ata zləm ataa Bay Madagal Yesu Kərist: huni ɗal zlən abə ŋkwaɓ, aska huni alima wəda zlən kuni, huni abə ha kuni.
13Azha huni, zlina mama aagi, huni ləm a ɗal zlən ma təwah, ara masagal a dza huni. 14Andza həji ndiɓi aagi taji a lamzə ma ndə ni kaghalə a ɗerewal watsə aka səku, həji watsa aagi ya, huni taŋata ka katkadək, ara huni a kərəɗ abəra təmta, aska haw a dzata. 15Huni ɗiw a tsata ka andza həji jaga kuni aagis, ama huni ghalatana ma andza zlina matsuh kuni aagi.
Pish bəzla ma abə zlapzatana a həji aagi
16Bay Madagal ma mar təwah, sha abə ha tə, mavəlahuni təwah kapish kapish abə təf ma parpar parpar tiwtiw. Bay Madagal mandza abə huni tiwtiw kwa abə təf ma vatəy.
17Sa ma ŋtir ma watsə abə ra naka: Sa Pul sa ma kazlapzatana a həji aagi. Tsakwa avaŋgəy abə sa meɗ ata ɗerewal naka aagi tiwtiw, ikwa abə sa kaŋtir. 18Sənma ataa Bay Madagal takwa Yesu Kərist mandza abə huni tiwtiw.
Currently Selected:
2 Tesaluniŋki 3: GOU
Highlight
Copy
Compare
Share
Want to have your highlights saved across all your devices? Sign up or sign in