2 Tesaluniŋki 2
2
Səkən ma kaaghal ndaha Bay Madagal
1Zlap ma ndza ata landaha ataa Bay Madagal takwa Yesu Kərist, abə ladzam takwa ma ndza abəra, ni katarahuni, zlina mana aagi, 2andza ala i huni iŋgaya: Vah ataa Bay Madagal taa tə i huni ci, huni ɗiw a dzəvəɗ ŋkwaɓ kuni ka kahkah səku. Ara ŋzliŋ adzahuni. Həji aagi azlapahuni shiŋ ma watsa aagi andza ma ma ndaha ara Bizlaf, aka səku həna ma ma ndaha ara ni aagi, zhana həna ɗerewal ma ŋtirha ara ni aagi. 3Ara huni apəlha kuni ka ana ala a ghutahuni ka, abə ma gaɗaɗaŋ ma ɓəlaakaka aagi. Ara ndə a ɗa, ma vah watsa a aɗal bəza mpər aha ndə həji aagi aŋkalzə ma Bizlaf. Səy ala ma gamak ma dzawaya mapayha bəza kwagwa. 4Ala jaga watsa, a abəw ha tə ka a səkən ma ghwaɗeɗe, abə səkən ndə həji aagi aa kahawanə aagi tiwtiw. A aji deŋ a ndza a jak kwakus Bizlaf. Azha a abəw ha tə ka andza Bizlaf.
5Huni kasənakənə a ma ndə sa va a ghalahuni tiɗa ndə sa ndza naka abəra huni aka wəra? 6Ama anawatsə, huni kasən səkən ma tak ala jaga ka, ara ndə, a payha ci, ata ndə vah a kagwar tə. 7Ara ndə a ɗa ya, ɓərɓər ataa ala ma gamak ma ɓah aka watsa a kaɗal zlən anawatsə ndə, səkən ma katak watsa a aŋkula ndza aka, a kaazhina a ɗal zlən tə ata digh akas. 8A tsutsa, ala ma gamak a apaya tə, azha Bay Madagal Yesu a adzə ka abə miɗ ma ndaha a bəza a takam tə . A asafay bəza abə ɓərɓər landa tə. 9Ndə ala ma gamak a kaandaa tə abə ŋgalaŋ Gətili ci, a aɗal səkən ma parpar parpar aagi abə ɓərɓər, a aɗal səkən ma kaghərnək ŋkwaɓ həji aagi abə tsufa aska a ghut həji aagi. 10A zlən ma gamak ma parpar parpar watsa aagi, a aghut həji ma kafəcak ta aagi bəza. Ara ndə aa ŋkula a ji a lamzə ma ma ɗa ŋter ma kaarehata bəza, abə aa fəcak ta. 11Sha ana ndə Bizlaf a zlənatana ɓərɓər ta ghut həji aagi, aska aagi a ɗal awa aska ma gaɗaɗaŋ. 12Azha kwa vaye ma ŋkula ɗal awa aska ma ma ŋter, ama, dəba aagi aɗalɓa səkən ma gamak ndə aa kamayə aagi ci, aagi adzaw ta.
Huni tadəmaya aska huni areh kuni
13Aŋcini ci, səy ni ɗalanə wasiy a Bizlaf kapish kapish dawna huni, huni zlina mama ndə Bay Madagal a mayahuni aagi, ara ndə a ɗa, Bizlaf tadəmahuni bəza ꞌwa aka ata diw tə aska a huni alima reh gwara ara Miɗ ma ghwaɗeɗe ma kayaɓahəji, zhana gwara ara ɗal awa ataa ma ma ɗa ŋter. 14Dawna sha abə Bizlaf a yaahuni gwara Ma wiyə ma təwah ndə ni ghalahuni aagi, aska a huni alima landza kuni a sləf ataa Bay Madagal takwa Yesu Kərist. 15Ikwa azha, zlina mama aagi, huni ŋcah, huni mbəla ŋkwaɓ katkadək ata səkən ndə ni sərəkahuni abə ma aagi, kwa ndə ni ŋtirahuni ŋtir aagi. 16Bay Madagal takwa Yesu Kərist sha abə ha tə, abə Bizlaf Vava takwa, ma mayahəji, ma vəlahəji sakw ꞌunəf ma ŋkula kəɗaŋ abə tsa deŋ ma ŋtan abə sənma tə, 17madiɓahuni ꞌunəf kuni ka aska huni aŋcah, mavəlahuni ɓərɓər ta ɗal səkən ma ŋtan pal, kwa a zlən, kwa a ma.
Currently Selected:
2 Tesaluniŋki 2: GOU
Highlight
Copy
Compare
Share
Want to have your highlights saved across all your devices? Sign up or sign in