Rawma ege 1

Pawl a zlepzetene ŋ hejəye

1Ara sa Pawl, mala zlan mala Yesu Almasəyhu ma ŋterahune ɗerewel ŋghe. Gazlavay kéyekey aza ŋ la a malaɓ leŋ kémeyekey aza ŋ ghwalza Ma Mewe ma Taŋtaŋ anta. 2Gazlavay kázlap zlezle ŋ valza ta ŋ pakam uzəye ma zlap ma anta ege ŋ Ɗerewel ma keweɗ ege. 3Ma Mewe ma Taŋtaŋ anta a zlap ca, ata Mba anta ma mbawaha ta ŋ ata ŋseŋ Dawuda ana heje dakənak. 4Cemey, Gazlavay kácaza aza a Mba anta ma ɓarɓar a Zəwet ma keweɗ a pes maa a gwarzamaza aza ata lamac. Ara Yesu Almasəyhu, Bay Madakal ŋtakwaw. 5Gazlavay kévelekey zəhay aza ŋ la a malaɓ ŋ jeɓzata hejəye vedəye tewtew ŋ lamza ma anta, ŋ wenzene ha leŋ ŋ həmanza zlam anta. 6Hune yam, hune ŋ taba hejəye ŋghe anta ege, hune maa Yesu Almasəyhu a yahune aza ege.

7Sa kazlapzahune tewtew hune hejəye ma ŋ Rawma ege, hune hejəye maa Gazlavay a kaɗawahune ege ey maa a yahune ege ŋ la ŋ hejəye anta ege. Gazlavay Vana ŋtakwaw ey Bay Madakal ŋtakwaw Yesu Almasəyhu mavalahune bəzla ey zəhay.

Pawl a ɗaw ŋ nda ara hejəye ma lamza ma mala Yesu aza ege, ma ŋ Rawma

8Mampar anta, sa kelene wasay ŋ Gazlavay naka ta ŋ Yesu Almasəyhu, mavəday hune tewtew, mavəday əy kazlap ŋ manhayak tewtew, hune kálamza ma Yesu aza. 9Maa sa kaghwalza Ma Mewe ma Taŋtaŋ mala Mba Gazlavay ca, sa kelene zlan ŋ Gazlavay a unaf teŋguleŋ. Mbe ca, a kasanaw, sa zlap ma ma njenjəwen. Kaw vepey, sa kedeŋza ata hune maa sa karak Gazlavay. 10Sa karak Gazlavay ata pes ata pes, ndar a laɗaw anta ca, sa lem taf ŋ nda ara hune. 11Cemey, sa kaɗawza mambaza ŋ gərehune ata nje, ŋ valahune səkan maa Zəwet ma keweɗ a kavalza, ndar hune lem ɓarɓar. 12Askwaw ca, mada sa hwas ara hune ca, heje lemakwaw ɓarɓar ŋ la anta, sa, mavəday lalam ŋkune, hune yam, mavəday lalam naka. 13Zlana ege, sa ɗaw ca, hune san ka, sa kédeŋ ŋkwaɓ ŋ gas vəram ŋ nda ara hune, ndar zlan naka a daha taŋtaŋ ara hune ana maa sa lem ara hejəye vedəye ma ŋ manhayak ege, cemey, ha na ŋgha, sa kélem taf ŋ nda, askwaw. 14Səy sa cekzetene ŋ hejəye tewtew, hejəye Yunanəyŋkaw#1.14 Hejəye ma kasan səkan ege ŋ taf kwakwas ege Hejəye Yunanəyŋkaw. ege ey hejəye ma kasan səkan ege səkwaw, hejəye ma kəleŋ ege ŋ ha ey hejəye ma kəleŋ ege ŋ ha, askwaw. 15Mavəday anta, sa ɗaw ŋ ghwalzahune Ma Mewe ma Taŋtaŋ ŋ hune hejəye ma ŋ hayak Rawma ege yam.

Ɓarɓar Ma Mewe ma Taŋtaŋ

16Cemey, hawa a kejekey ŋ ghwalza Ma Mewe ma Taŋtaŋ, askwaw. Ara ɓarɓar Gazlavay ŋ rehza kaw vayay ma lamza Yesu Almasəyhu aza, mpar anta ca, Yahudu ege, a dəwze anta, hejəye ma tata Yahudu ege səkwaw. 17Cemey, ta ŋ Ma Mewe ma Taŋtaŋ anta ca, Gazlavay a kaghwalza maa hejəye əy kanabaw tata a hejəye ma tuwah ege a tama anta ca, vaŋgay? aza. Səy a lalam gagaha. Ana maa kéŋtereye, a ŋgaya: «Ɗala maa mbəy tuwah a tama Gazlavay a lalam ca, heje anta a nelem lanja.»

Gay mala hejəye vedəye

18Cemey, Gazlavay a kaghwalza laghwaɗ unaf anta mgba ata uzlaf mavəday gay ege tewtew ey dadawar ege tewtew maa hejəye, əy kalata. Mavəday zlan tata ma kadak səkwaw ege wese, əy katakata hejəye aka ŋ san ma ma njenjəwen. 19Ayaw, səkan maa heje kula ŋ san ata Gazlavay ca, kéghweleye aza ŋ tata. Mavəday Gazlavay a ha anta, kéghweletene aza kadak kadak. 20Njenjəwen ca, ɗala kula ŋ gəre Gazlavay a nje anta, səkwaw. Cemey, mar aka maa a baza manhayak ha na ŋgha ca, ɗala kula ŋ san aza ta ŋ səkan maa a bata ege. A kasanaw, njenjəwen ca, ara Gazlavay Mawacawaca, ɓardakw anta a kaŋtakw səkwaw kaw vepey. Ana ebe ŋghe, hejəye əy kanala kula ŋ zlapɓa ma wende aza zeney, ndar Gazlavay a senzetene hahar ca, askwaw. 21Mavəday əy kasan Gazlavay, cemey, əy kahəmanza, askwaw, əy kelene wasay ana maa a kaɗawaw, askwaw. Ana ebe ŋghe, ledeŋ ŋkwaɓ tata kábaw anta kadak səkwaw, unaf tata ma kasan səkan səkwaw kábaw anta ŋ kuzle. 22Əy cakza ca, tata hejəye ma kasan səkan ege, enjekeɗe ara hejəye ma kawak ege. 23Əy káyakza ŋ həmanza Gazlavay ma kamac, səkwaw, aka. Karba əy həman ca, səkan ege maa əy lamata a ra tata ege ana heje dakənak ma kamac, vəgem ege, səkan ma kanda a ŋgas ŋfaɗ ege leŋ səkan ma kenjew dəmas ata hayak ege.

24Mavəday anta, Gazlavay káyakzata ka ŋ la səkan dadawar ege maa unaf tata ege a kaɗawaw. Ana ebe ŋghe, tata a ha tata, əy kagayza kusam tata ege aka ŋ la səkan ma kala hawa. 25Əy kábawza ma ma njenjəwen mala Gazlavay aza ŋ metəwle. Karba, əy həman leŋ əy wenzene ha aka ca, ŋ səkan maa Gazlavay a bata ege, aha Gazlavay ma bata səkan anta ege, maa hejəye əy nahəmanza kaw vepey! Aməyna! 26Mavəday anta, Gazlavay káyakzata ka ŋ la səkan ege ma kala hawa maa əy kaɗawata ŋ unaf tata ege. Weləye tata ege, əy kaŋta kusam a mawal ege zeney, askwaw, cemey, əy ŋta kusam ca, ŋ taba tata. 27Mawal ege yam, əy la ana mbe, əy káyakza laŋta kusam aka a weləye, əy káɗawza mambaza ŋ ŋta kusam ŋ taba tata, ana ebe ŋghe, ara hawa. Tata yam, əy nelem laŋtar tete ata zlan tata ma kadak səkwaw maa əy kalata ege, 28mavəday əy kálamza ŋ san Gazlavay, askwaw. Ana ebe ŋghe, Gazlavay káyakzata ka ŋ səbar ledeŋ ŋkwaɓ tata ma kadak səkwaw ege, aya, əy la səkan maa kəɗe əy kanalaw, askwaw. 29Unaf tata ege ghef a səkan ma kadak səkwaw. Əy kala dadawar, əy kala nje ata səkan hejəye, əy keletene səkan ma kadak səkwaw ŋ hejəye, unaf tata ege ghef a sərah. Əy kaja hejəye, əy kagulak, əy kabaɗzata hejəye vedəye, əy kala səkan ege ana maa əy kaɗawaw. Əy kazla metəwle ata hejəye, 30əy kazlap ma ma kadak səkwaw ege ata hejəye. Əy kaɗaw Gazlavay səkwaw, əy karata hejəye vedəye, əy kaŋta ha tata aza day aha hejəye vedəye, əy kampam kaw vepey taf ma ata la səkan ma kadak səkwaw ege. Əy kewenzetene ha aka ŋ mambaw tata ege, askwaw. 31Ŋkwaɓ ŋ ha tata ege, askwaw, əy kala səkan ege ana maa əy zlap ŋ law, askwaw. Əy kaɗaw hejəye vedəye səkwaw, əy kasan hahar askwaw. 32Cemey, əy kasan njenjəwen ca, Gazlavay a nejetene guma ŋ hejəye. Hejəye ma kala səkan mada ebe ŋghe ca, a tata ca, əy namac. A mbe anta tewtew ca, əy kavas ŋ lata səkan ma kadak səkwaw anta ege leŋ əy kalamzata hejəye ma kala səkan anta ege war.

Currently Selected:

Rawma ege 1: BHS

Highlight

Copy