Mata 7

Hune ɗaw ŋ ghemata hejəye səkwaw

1Yesu a zlepetene zeney, a ŋgaya: «Hune ɗaw ŋ ghemata hejəye səkwaw, aya, Gazlavay yam, a keneghemahune ata gay ŋkune ege, askwaw. 2Cemey, Gazlavay a neghemahune ana maa hune keghemata hejəye vedəye yam, a naslaŋgalahune səkan ana maa hune kesleŋgeletene səkan ŋ hejəye vedəye yam. 3Hwa kula ŋ gəre mba ŋkusaf ŋ nje zlanahw ca, hwa kula ŋ gəre mpe ma nje ŋkwa səkwaw ca, vaŋgay? 4Ca, hwa san ŋ zlepene ŋ zlanahw, hwa ya: “Kwagwa, sa daɗahwaw mba ŋkusaf ma nje ŋkwa aza” ca, enjekeɗe mpe ma dakal ŋ nje ŋkwa aka ca, vaŋgay? 5Hwa ɗala ma a ganana gbak gbak ŋgha, daɗ aza mpe ma a nje ŋkwa aza mpar, ndar hwa gəre la kadak kadak ŋ daɗ aza mba ŋkusaf ma ŋ nje zlanahw aza. 6Hune ɗaw ŋ veletene səkan mala Gazlavay ege ŋ həza ege səkwaw, askwaw ca, əy nezenha aha hune, əy naŋcahune. Hune ɗaw ŋ nehzetene gavda ŋkune ege ŋ galdam ege səkwaw, askwaw ca, əy nadak ŋgas ata tata, əy naŋgata aza.»

Larak səkan ara Gazlavay

7Yesu a zlepetene zeney, a ŋgaya: «Sa kazlapahune, hune rak səkan ara Gazlavay, hune nelemew, hune mpam səkan, hune nendewzene, hune ɗaf ma a ma ujek, əy nazlarzahune.» 8Njenjəwen, kaw vayay ma ɗawza səkan ara mbe ca, a nelemew. Kaw vayay ma mpam səkan ara mbe, a nendewzene. Kaw vayay ma ɗaf ma a ma ujek ca, əy nezlerzene. 9Hune cen uzəye, mada uzəye ŋkune ege əy ɗawzahune a səkan ta zam ca, hune neveletene ŋkəɗaŋ vaw? 10Akwaw ca, mada əy ɗawzahune a ŋkəlef ca, hune neveletene zezekw vaw? 11Cemey, hune hejəye dadawar ege, hune kasan ŋ veletene səkan ma tuwah tuwah ŋ uzəye ŋkune ege, ana ebe ŋghe ca, Cehw ŋkune, Gazlavay ma mgba ata uzlaf ca, mbəy kula aza ŋ veletene səkan ma tuwah tuwah ŋ hejəye ma ɗawza ege səkwaw vaw?

12Səkan ege tewtew maa hune kaɗaw hejəye lahune ca, hune letene ana mbe yam. Ma maŋkanaŋkan mala Musa ey ma maa uzəye ma zlap ma mala Gazlavay ege, əy sesərekzetene ŋ hejəye ca, ara ebe ŋghe.

Ma ujek ege gbak

13Yesu a zlepetene zeney, a ŋgaya: «Hune tal ŋ dam ta ŋ ma ujek ma lez, mavəday ma ujek ma hubaŋw ca, ladam ta ŋ ŋma ca, a gef askwaw, cemey, ara taf ma kejeɓza ɗala ata la fətek. Hejəye vəram, əy kanda ta ŋ ŋma. 14Cemey, ma ujek ma lez ca, ara taf ma ata dam ata lanja. Landa ta ŋma ca, a gef, hejəye ma lem ŋ səbar taf anta ege ca, tata vəram askwaw.»

Uzəye ma zlap ma metəwle ege

15Yesu a zlepetene a ŋgaya: «Hune sla aka kadak kadak ata uzəye ma zlap ma metəwle ege. Əy nandaha ara hune ana hejəye ma caha bukəla ŋtəməye, cemey, enjekeɗe uza ŋ unaf tata ege ca, əy nja ana menjernjer ege. 16Hune nasanata ca, ta ŋ zlan tata ma kadak səkwaw ege, maa əy kalata. Cemey, əy kambal mba mpe mavaw ata mpe jəkeɗ vaw? A zeney, əy kambal mba səke ata mpe maŋgartataw vaw? 17Ana mbe yam, mpe ma taŋtaŋ ca, a mbaw mba ma taŋtaŋ. Mpe ma kadak səkwaw ca, a mbaw mba ma kadak səkwaw yam. 18Mpe ma taŋtaŋ ca, mbəy kula ŋ mbaw mba ma kadak səkwaw, səkwaw. Mpe ma kadak səkwaw ca, mbəy kula ŋ mbaw mba ma taŋtaŋ səkwaw yam. 19Mpe ma kambaw mba ma taŋtaŋ səkwaw ca, əy nabalza, a dəwze anta, əy nahza aza ŋ kwahwaw. 20Ana ebe ŋghe, hune nasanata uzəye ma zlap ma metəwle ege ca, ta ŋ zlan tata ma kadak səkwaw ege, maa əy kalata.»

Madarlaŋw ma njenjəwen ege

21Yesu a zlepetene zeney, a ŋgaya: «Hune san ka, hejəye ma kaya zlam naka: “Bay Madakal, Bay Madakal” ende ŋghe gagaha ca, əy kanadam tewtew tata ŋ lazam bay ma mgba ata mgba uzlaf ca, askwaw, cemey, səy hejəye ma kala səkan ege ana maa Vana, Bay Madakal ma mgba ata uzlaf a kaɗawaw. 22A pes maa sa kanandaha ŋ jetene guma ŋ hejəye ca, hejəye vəram əy nezlepekey, əy ŋgaya: “Bay Madakal, nene kághwal zlap a zlam ŋkwa, nene kágamata zəwet malula ege a zlam ŋkwa, nene kála zaɓəla ege vəram a zlam ŋkwa!” 23A təwse ca, sa nezlepetene ca, sa ya: “Kaw sa kásanahune a pes wende askwaw. Hune kes aza ara sa ete ŋghe, hune hejəye ma kala gay ege.”»

Laslaŋgal ma ata ujek ege gbak

24Yesu a zlepetene zeney, a ŋgaya: «Cemey, kaw vayay ma zləme ma maa sa zlap ŋgha leŋ ma la səkan ana mbe ca, a nja ana ɗala ma ŋkwaɓ ŋ ha anta aka, ma lam ujek ka ata kefe. 25A təwse ca, van a ɗaha, zlazlar a daha yam, bargadaŋ a babaraha hwas ata ujek anta, cemey, ujek anta kághwaram askwaw, mavəday kélemeye ata kefe. 26Cemey, kaw vayay, ma zləme ma maa sa zlap ŋgha, ma la ana mbe askwaw ca, a nja ana ɗala ma ŋkwaɓ ŋ ha askwaw, ma lam ujek ka ata vakw. 27A təwse ca, van a ɗaha, zlazlar a daha yam, bargadaŋ a babaraha hwas ata ujek anta, kághwaram anta balhaɗay.»

Yesu a sasərakzata hejəye a ɓarɓar

28Aya, maa Yesu káŋtakwza zlap anta aza ca, hejəye tewtew əy kédeŋ ŋkwaɓ dakala mambaza ata lasasərak anta, 29mavəday, a sasərakzata ca, ana maghwal ma maŋkanaŋkan ege səkwaw, cemey, a sasərakzata ca, a ɓarɓar maa Gazlavay a velene.

Currently Selected:

Mata 7: BHS

Highlight

Copy