2 Tesalawnəykəy ege 2
2
Səkan ma kanalaha mar Bay Madakal a nandaha
1Zlana ege, Bay Madakal ŋtakwaw Yesu Almasəyhu a nezenha, heje najamakwaw tewtew ara mbe. Mavəday anta, nene kajahune mbahw, 2mada ɗala a ndaha, a zlapahune, a ŋgaya: Pes maa Bay Madakal a kenezenha hwas, ca, kaw hune ɗaw ŋ ŋga ŋkwaɓ səkwaw, hune ɗaw ŋ lalak səkwaw. Kaw ɗala a ndaha a zlapahune, a ŋgaya: Ara zlap ma ndaha aka ara Gazlavay, askwaw ca, a zlapahune, ara nene ma ŋter ka ŋ ɗerewel, ca, 3kaw hune ɗaw ŋ lamza a baɗzahune a metəwle kaw vekey səkwaw. Pes anta a kanahwasha na ŋgha kwagwa askwaw, səy hejəye mayakza ŋ lamza ma mala Gazlavay aka, a zeney, səy ɗala mala dadawar ma pa ma day maghwalha aza kwagwa. Heje anta ca, ara ɗala ma kenefətek anta. 4Ɗala mala dadawar ma pa ma day anta ca, a natakata hejəye aka ŋ wenzene ha aka kaw ŋ Gazlavay, kaw ŋ kwakwas ege tewtew maa hejəye əy kahəmanzata, a naca ha anta aza ca, mbəy pa ma day aha səkan anta ege tewtew. A nanda a ha anta ŋ nja ka ŋ ujek kwakwas mala Gazlavay, a nazlap mbe ca, mbəy Gazlavay.
5Zlana ege, ata vah maa sa ara hune wese ca, sa kázlapahune ma ŋghe anta, ca, hune kéheseŋza aza vaw? 6Na ŋgha ca, ɗala mala dadawar ma pa ma day anta ca, a kanandaha na ŋgha kwagwa askwaw, hune kasan səkan ma takaw ŋ ndaha. Cemey, a nandaha ca, səy pes anta macaca hwas. 7Njenjəwen, ɓarɓar maɓahaɓah mala dadawar anta, a kala zlan na ŋgha. Cemey, mada ɗala ma katak ka wese mbəy ɗak ca, a kanala zlan maɓahaɓah zeney ca, askwaw. 8A dəwze anta ca, ɗala mala dadawar ma pa ma day wese, a naghwalha, aya, Bay Madakal ŋtakwaw Yesu, a najaza a tatəɗam ma ŋ pakam anta, a nakuɗapza aza a ɓarɓar landaha anta. 9Ɗala mala dadawar ma pa ma day wese, a nandaha a ɓarɓar mala Sayɗanu, a nala səkan ma ɓarɓar, a nala zaɓəla ege vedəye vedəye, leŋ səkan ma a kaŋga ŋkwaɓ ege ŋ baɗzata hejəye. 10Ŋ lala zlan ma kadak səkwaw kaw vekey ca, a nabaɗzata hejəye ma kenefətek tata ege aza. Hejəye anta ege ca, ara hejəye ma fətek ege, mavəday əy kálamza ma ma njenjəwen ma kula ŋ rehzata aza askwaw, əy kaɗawaw, askwaw. 11Mavəday anta, Gazlavay a leɓetene ɓarɓar ma kadak səkwaw ŋ baɗzata hejəye ŋ lamza metəwle. 12Ana ebe ŋghe, hejəye ma kalamza ma ma njenjəwen səkwaw, cemey, ma kaɗaw ŋ la səkan ma dadawar ege ca, əy kéghemeye.
Lanja ma ɓarɓar ŋ lalam
13Zlana ege, hune ca, Bay Madakal ŋtakwaw a kaɗawahune dakala. Ŋcene ca, səy nene lene wasay ŋ Gazlavay ata pes ata pes mavəday hune. Gazlavay kámayahune aza mpar mar aka ata lamar ŋ rehzahune, ta ŋ Zəwet ma keweɗ ma bawzahune aza ŋ hejəye ma keweɗ ege, mavəday maa hune lamza ma ma njenjəwen aza. 14Gazlavay a yahune ŋ rehzahune ca, ta ŋ Ma Mewe ma Taŋtaŋ maa nene ghwalzahune wese, ndar hune lem ŋ dam ŋ ɓardakw mala Bay Madakal ŋtakwaw Yesu Almasəyhu. 15Ana ebe ŋghe, zlana ege, hune nja aka ɓarɓar, ma maa nene sasərakzahune kaw a lazlap ŋcene ege, kaw a leŋter ege wese ca, hune mbalata aka kadak kadak ŋ ŋkwaɓ ŋkune ege kaw vepey. 16A ɗaw ca, Bay Madakal ŋtakwaw Yesu Almasəyhu a ha anta, ey Gazlavay Vana ŋtakwaw, ma ɗawaheje aza, ma valaheje ledeɓ unaf aza kaw vepey, ma valaheje laca ŋkwaɓ ma taŋtaŋ aka ata səkan maa heje kenelemakwaw a zəhay anta, 17medeɓahune unaf aka, mavalahune ɓarɓar ŋ la zlan ege ma taŋtaŋ leŋ ŋ zlap ma ma taŋtaŋ ege ata pes ata pes.
© 2025 CABTAL