2 Tesaroníka 2
2
Até éyé é mó jínámó hɔrɔ́ Okí a arɔ́wɔ́ ka jine
1Va mbísó, Okí wa visó ójó Yésusu Kirítu a mó urámó, kó to mó riyámó wónjéénérí na kɔ́ŋgɔ́ ráá. Na wusó mwané, até éyé to nó súsámó kéeyé: 2Ŋgé moto a járá na vinó anáá isí yá Okí yó ojiné, vinó ká sóŋgíyé odéŋgyé munú, wokótó ka nó ambaana. Vá hítyámó o nó hwá cómó mwané ámó maró ámá má endámó uré na Irɔŋgɔ, tɔɔ hónó ámó epéŋgé ŋgé kárate ójó a endámó uré na visó. 3Vinó ká mice anáá moto a nó jyeénye ukú omó. Esené hɔrɔ́ isí mwané yó arɔ́wɔ́ ka jine, vató vá mó manámó béyá icé na Irɔŋgɔ, kó ombé wa motó ójó mwaná wa ndáŋgéná a mó vátíhíyámó, 4ómwané ójó a pékáanámó a wunde onywaana na wandá wimé ówó vá béráanámó anáá sambé, ítɔɔ ówó vato vá gúmíyámó, a mó éndámó honó ondo nuumana naáté yá yanje yá Irɔŋgɔ woja anáá a ámó Irɔŋgɔ. 5Ará ŋgo ma ríí ŋgo arɔ́wɔ́ na vinó, ŋgo ma nó ojáná wandá mwané, ye no ma béríhyé? 6Kó tetee ojó, no jembámó até éyé yá ré me timbé ukú ójó anáá a vátíhíye bɛ́ŋ na itíndíkáná ráá. 7Esené ndímbé ra wobé yo éta na manɔnɔwɔ tetee ojó. Wó etá súsé bɛ́ŋ anáá ojo a me timbámó vá me baketa. 8Ɔ́wɔ́ kówo ombé wa moto a né vátíhíyámó, kó Okí Yésusu a né me onámó na pépénɔ́ ráá éjé na uŋgúté, kó a mó me ndeérámó na enoma yá wuré wáa. 9Ará ombé wa moto a né urámó na ŋguru ra Saátana, a né eŋgámó vikáné vyá mamba má ŋguru, na mesimbá, na vidimé índi a jeénye vato. 10A mó éŋgámó ombunu rá vambé vá mamba kó a mó jyeényámó vato ává vá dáŋgámó, esene éyé vá ma váráŋgá waka andiŋgé rá vatɔ́ɔ́tɔ́ ájá á ma hítí o wó sótyé. 11Wandá mwáne kówo Irɔŋgɔ a wó tóménámó ŋguru ra ndáŋgéná éjé yo eŋgámó anáá vá atɔ́wɔ́ viváná, 12ukú ójó anáá bimé ává vá ta ma atɔ́wɔ vatɔ́ɔ́tɔ́, ává vá ma váá andiŋgé ráwó na weŋga ówó wobé, vá jósyévena.
Orií kírítítí na ŋgɔ́tééná
13Va mbísó ává Okí a cakámó odiŋge, to géremenámó otéŋgyé Irɔŋgɔ itíndíkáná iŋgímé na wusó wá vinó, esene éyé Irɔŋgɔ a ma nó ijátá okésyé ówó na makésyé anáá índi a no sótyé. Kó no ámó sótyérí esene éyé Mwáŋ mwáŋ wa Ireréŋgi a eŋgámó anáá no sɔ́tɔ́ esɔ́tɔ́ éyé mwáŋ mwáŋ, kó honó esene éyé no atɔ́wɔmó vatɔ́ɔ́tɔ́. 14Wandá ówó a ma nó bérááná ɔ́wɔ́ kóomó, naná kówo a ma eŋgá anáá to nó ojána Usi wa Cómó, índi no timbe ŋgava na niimí ná Okí Yésusu Kirítu. 15Wandá mwané kówo va mbísó, ovágíyámáno na ŋgɔ́tééná, vinó obeerye ntumu íjí to ma nó yééré wusi na wusi na enjárá ra uŋgúté tɔɔ na va kárate ává to katé nó tírena. 16Ŋgá Okí wa visó maté ójó Yésusu Kirítu, na Irɔŋgɔ ójó Tetáŋgá wa visó, ójó a ma só diŋgé kó a ma só réryé notó na kɔ́rɔ́tɔ́tɔ́ owunde o só hwá usi wa ipitínaáté yá ntá raá, 17vá nwiyé etémá ra vinó na wonótó, vá wúnde o nó hwá ŋguru anáá no eŋga wusi itíndíkáná iŋgímé na ŋgéŋgéná kó na njáréna!
Currently Selected:
2 Tesaroníka 2: tii
Highlight
Copy
Compare
Share
Want to have your highlights saved across all your devices? Sign up or sign in
© 2024, CABTAL