Yoshua 3
3
Bhaizilaeli bhalomboka nkoka Yoludani
1Yoshua na Bhaizilaeli bhokapi bhakabhokiki lukela pachibhombu kuhuma ku Shitimu, na kujenda mpaka ku nkoka Yoludani, na kubheka likambi konihoku mangane ja kulomboka. 2Paghapetiki machobha ghatatu ihongozi bhakapetiki pachilanda ja likambi lokapi, 3na kubhalaghalakila bhandu, “Pamwalibhonaje Lisanduku la Lulaghilu laka Bambo Chapanga, Chapanga winu, litolakeka na bhapenganyambiku ambabhu nde bhabhelakeka bha Bhalawi, mwibhokaje pandu pani pambile na kulijengalela. 4Bhenibhela nde momwimanyilaje indela jempalika kujipeta, maghambu ngachendabhalili kujipeta indela jeniheje. Nambu ngamwiheghalela pambipi na Lisanduku la Lulaghilu heli, impalika mkubhaje na utali wa ngati kilomita jimu pachilanda jinu na Lisanduku heli.”
5Bhela Yoshua akabhapwaghi bhandu, “Mligholulaje, maghambu chilabhu Bambo Chapanga anahengaje mambu gha kukangacha pachilanda jinu.” 6Yoshua akabhapwaghi bhapenganyambiku, “Mlijinulaje Lisanduku la Lulaghilu, na kulongulela palongi ja bhandu.” Bhela bhakalijinwihi na kulongulela palongi jabhu.
7Panihapa Bambo Chapanga akumpwaghi Yoshua, “Lalenu anandumbulaje kukulumbalila palongi ja bhandu bhokapi bha Izilaeli, nahuli bhapata kumanya kubha nepani mili papamu na wehapa, ngati monakabhelile papamu na Musa. 8Ubhapwaghila bhapenganyambiku bhabhatoghola Lisanduku la Lulaghilu, ‘Pamwihikaje mukengu ja machi gha nkoka Yoludani, njendaje mkajemaje mkati ja nkoka.’ ” 9Yoshua akabhapwaghi bhandu bha Izilaeli, “Muhikaje pambani njowanyaje malobhi ghaka Bambo Chapanga, Chapanga winu.” 10Yoshua akajendali kupwagha, “Chakaka kwa lijambu aleli anammanyaje kubha Chapanga joabhi mwomi abhili pachilanda jinu, na kubha anaabhatopulaje palongi jinu Bhakanaani, Bhahiti, Bhahivi, Bhapelizi, Bhagiligashi, Bhaamoli na Bhayebusi. 11Chikahi Lisanduku la Lulaghilu laka Bambo Chapanga wa ndema wokapi palandongulyaje palongi jinu na kujingila mu nkoka Yoludani. 12Bhela, sajenu mubhahaghulaje akanalomi komi na bhabheli kuhuma mu makabila gha Izilaeli, kila likabila mundu jumu. 13Chikahi pela lwaju ya bhapenganyambiku bhabhatotola Lisanduku la Lulaghilu laka Bambo Chapanga, Chapanga wa ndema wokapi, paijingalaje mu machi gha nkoka Yoludani, machi ghanihagha anaghakotukaje kunyila. Machi ghaghikubhaje ghanyila kuhuma upambala wa kundonda anaghalibhonganaje pandu pamu na kubha ngati chihogholu.”
14Bhela, bhandu pabhakabhokiki mu makambi ghabhu, nahuli kulomboka nkoka Yoludani, bhapenganyambiku koni bhakabya bhatotwili Lisanduku la Lulaghilu bhakabhalongulile. 15Chikahi chenu chakabhili chikahi cha mahunu, nawombi nkoka Yoludani ukabhi utwelili mbaka mukengu jaki ngati moukabhelili ntetu waki. Nambu chikahi pela bhapenganyambiku bhabhatotwili Lisanduku la Lulaghilu pabhahikiki punkoka na lwaju yabhu kujibhila mkati ja machi ghanighala, 16machi ghala ghaghakabhili ghanyila kuhuma upambala wa kundonda ghakajemiki na kulibhongana mbaka ku chijiji chechilowakeka Adamu, ku muchi wa Seletani. Machi ghaghakabhi ghanyila kujenda ku bahali ja Alaba, yani Bahali ja Mwinyu, ghakabhokiki ghokapi, bhela bhandu bhakalombwiki kujenda ku Yeliko. 17Bhapenganyambiku bhabhatotwili Lisanduku la Lulaghilu laka Bambo Chapanga bhala, bhakajemiki wichu pandu pajomu pachilanda ja nkoka Yoludani, chikahi Bhaizilaeli bhokapi pabhakabhi bhalomboka mu pandu pajomu, mbaka bhandu bhokapi bha Izilaeli pabhakajomwili kulomboka nkoka Yoludani.
The New Testament in Mpoto Language ©The Word for the World International and Mpoto Language Translation, 2020 All rights reserved.