Yoshua 2
2
Yoshua abhatuma bhapelelezi ku Yeliko
1Bhela Yoshua mwana waka Nuni kwa sili akabhatumiki bhapelelezi bhabheli kuhuma ku Shitimu, akabhapwaghile, “Njendaje mkajikaghulyaje inchi jeniheje, nakanopi muchi wa Yeliko.” Bhela bhakapiti na kujingila mu nyumba jaka nkemi jumu lihina laki Lahabu na kutama monihomo. 2Nkolongwa wa ku muchi wa Yeliko akapwaghakike, “Lingalyaje! Bhaizilaeli bhakumu bhahikiki kongoni ikilu jenu kujipeleleza inchi.” 3Bhela nkolongwa wa ku Yeliko akatumiki bhandu kwaka Lahabu, akapwaghaje, “Ubhapihaje bhandu bhala bhabhakuhikile na kujingila munyumba jaku, maghambu bhahikiki kujipeleleza inchi jokapi!”
4Nambu mbomba hoju akabhi abhatoi bhandu bhabheli habha na kubhahiya. Akapwaghike, “Ena, bhandu bhanihaba bhakahikiki kwangu, nambu ngachemanyi kobhahumike. 5Palwajingi lubhendu, chikahi cha kujighila ndyangu wa muchi, bhandu bhanihabha bhakabhokike, ngachemanyi kobhapite. Mubhalonda manyata, pangi muweza kabhapata.” 6Nambu Lahabu akabhi abhakwehiki kunani kugholu akabhayekalili kwa mapei gha kulenganakela ingobhu jinyahi jihuhu, ghaghakabhi aghajaliki kugholu. 7Bhela bhandu bhanihabha bhabhakatumakiki na nkolongwa bhakabhajengalili kupetela indela jejijenda mu ilombukelu ya nkoka Yoludani. Chikahi pela bhandu bhabhakabhi bhajengalela bhapelelezi pabhapitiki kunja. Ndyangu ukolongwa wa muchi ukajighalike. 8Mangani ja bhapelelezi bhala kughonela, Lahabu akabhajendili kunani kugholu kola, 9akabhapwaghile, “Manyi kubha Bambo Chapanga ampekihi inchi jenjenu na lujoghopu lukolongwa lutuhabhukili kwa ndandi jinu, na kubha bhenei bhokapi bha muchi ghongoni bhahekatiki mtima kwa ndandi jinu. 10Ndandi tujowini ntundu Bambo Chapanga moaghatendili machi gha bahali ja Shamu kujomalela palongi jinu pamukabhi mboka mu inchi ja Misili, na lijambu lela lemubhatendili Sihoni na Ogu, bhakolongwa bhabheli bha Bhaamoli bhabhakabhili kwihi ja nkoka Yoludani, yani Sihoni na Ogu, ambabhu mkabhayoningi nakanopi. 11Chikahi pela patukajowini mambu ghanihagha, mitima jitu jakapotile, na kila jumu witu akalepiki kubha na ukangamalu kwa ndandi jinu. Maghambu sajenu nimanyi kubha Bambo Chapanga, Chapanga winu, nde Chapanga wa kunani kumahunde na pahi pani pundema. 12Chikai chenu, nundobha, chondi mnapilaje kwaka Bambo Chapanga, kubha anandendilaje ghamboni nepani na bhalongu bhaka tati wangu, maghambu nepani nuntendili ghamboni. Mbekyaje nginyulila ja kundenda nepani nunhobhalya mwehapa. 13Mnaghilaje kubha anamughalamihaje matamu ghaka tati wangu na mabhu wangu, bhalongu bhangu bha chikambaku na bhalongu bhangu bha chimbomba, papamu na bhokapi bhabhabhili mu nyumba yabhu, na kutukengalela na nyiwa.”
14Akanalomi bhala bhakayangike, “Chapanga na aghatolaje matamu ghitu ngati ngatwihengi ngati motupwaghila! Ngati ngawibhohi malobhi gha chindu bholi chetuhenga, chikahi Bambo Chapanga paatupekyaje inchi jenjenu, anatukuhengilaje kwamboni na kwa ulongwana.”
15Bhela Lahabu akabhahelihi bhandu bhanihabha kwa ngonji kupetela palidilisha, maghambu nyumba jaki jakachengakiki kwa kulombana na lumatu lwa muchi wa Yeliko. 16Akabhapwaghile, “Njendaje ku itombi kujobhalela nahuli bhala bhabhunjengalela ngabhunhimanila. Ntamanya konihoku kwa machobha ghatatu, mbaka pabhikelabhukaje, na panihapa nde mwijendaje.”
17Bhandu bhala bhakamuyangike, “Tepani anatuhengaje lijambu lenu leututendiki tulaghilaje kwa kulapa. 18Lingalyaje, lendenu nde lelikupalika kulihenga. Patwihikaje mu inchi jenjenu, ukongaje ngoji ghongoni ukeli pa lidilisha lela leutuhelihe, na ubhaletaje munyumba jaku tati waku, mabhu waku, bhalongu bhaku na bhandu bhokapi bha munyumba jaka tati waku. 19Ngati mundu jokapi anaapitiki kunja ja nyumba jaku, tepani ngatwikubhi na hatia panani ja kupotela kwaki. Nambu mundu jola joanakubhaje mkati papamu na wehapa, ngati chiwoku chaka mundu jokapi anachibhili panani jaki, bhela kupotela kwaka mundu hoju anakukubhaje panani jitu. 20Nambu anaubhohiki malobhi gha lihengu litu letuhenga, anatubya tuhoghuliwi kuhuma mu kulapa akoku koututendiki tulapaje.” 21Najombi akayangike, “Na kukubhaje bhelabhela ngati mompwaghile.”
Panihapa akabhapihiki, nabhombi bhakapite, najombi akakongiki ngoji ukeli ghola palidilisha.
22Bhapelelezi habha pabhabhokike, bhakapiti ku itombi na kutama konihoku machobha ghatatu, mbaka bhala bhabhakabhi bhajengalela pabhakelawike, na bhandu bhala bhabhakabhi bhajengalela bhakabhajengalili mu indela jenijela jokapi, nambu ngachebhawene. 23Bhela bhapelelezi bhabheli habha bhakehelili kuhuma ku itombi, bhakalombwiki nkoka wa Yoludani na kunjendela Yoshua mwana waka Nuni, na kumpwaghila kila chindu chechabhapatike. 24Bhakumpwaghili Yoshua, “Chakaka Bambo Chapanga atupekihi inchi jokapi mu mabhoku ghitu, maghambu bhandu bhokapi bhahekatiki mitima kwa kutujoghopa tepani.”
Currently Selected:
Yoshua 2: MpBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.