Mateo 19

Jesúcã “Mʉjã nʉmosãrõmiãrẽ cõãherimocãña” ĩ buerigue

(Mc 10:1-12; Lc 16:18)

1Jesús tiere wedetuwacogʉra Galilea ditapʉ niãrigʉ ʉ̃sã cʉ̃ bueramena Judea ditapʉ dia Jordán apenʉãpe muĩpʉ̃ mʉãtirisopepe wawi. 2Cʉ̃cã topʉ wañerõcã basoca pajʉ cʉ̃rẽ quetatuwa. Tairo tigʉ Jesús topʉ diara nirãrẽ ñujeañerõcã tiwi. 3Ĩcãrã fariseo basoca cʉ̃cã tairo tiñerõcã ĩñarã Jesús cʉtiropʉ wati, cʉ̃rẽ merĩãpe yʉñerõcã wedesãrãda ĩrã abiro ĩ sãĩñawã:

—¿Marĩrẽ dotire ‘Ĩcʉ̃ ʉmʉ cʉ̃ nʉmorẽ noboreye wapagãmenarã cõãmasĩgʉagawi’ ĩ dotiri? ―ĩwã.

4Jesús cʉ̃jãrẽ yʉwi:

—¿Mʉjã Manigʉ̃ye wederucũrẽ ojariapũpʉ nirẽrẽ wãcũheriri? Abiro ojayoriaro niwʉ̃: «Manigʉ̃ mamarõpʉra atibʉreco maquẽrẽ tigʉpʉra ʉmʉrẽ, nomiõrẽ tirigʉ niwĩ» ĩ ojayoriaro niwʉ̃.#Gn 1:27. 5Tuwanʉcõ abiro ĩrigʉ niwĩ: «Tairo tigʉ ʉmʉ cʉ̃ pacʉre, cʉ̃ pacore dicawatigʉagawi merĩã cʉ̃ nʉmomenape ĩcãrõrã nigʉ̃ eagʉdagʉ. Anorã abiro cʉ̃jã pʉ̃ãrã ĩcã ũpʉ̃rã abiro pʉtʉara eagawa»#Gn 2:24. ĩ ojayoriaro niwʉ̃. 6Tairo tira pʉ̃ãrãpʉra abiro niheriwa; ĩcã ʉ̃pʉ̃rã abiro ñawã. Tairo tiro anorã abiro Manigʉ̃pʉra cʉ̃jã pʉ̃ãrãrẽ ĩcã ũpʉ̃rã pʉtʉara eañerõcã tiyoriasiro niñerõcãrã manʉ nigʉ̃rẽ cʉ̃ nʉmorẽ cõãdotiheri#19:6 Ano pʉawãme wederugaro ya. Socoro: “Ĩcʉ̃ nʉmocʉtigʉ cʉ̃ nʉmorẽ cõãmasĩherigawi” ĩrõ ya. Apero: “Ãpĩpʉ manʉrẽ o nʉmorẽ came cõãñerõcã timasĩherigawi” ĩrõ ya. Ĩñaña Dt 24:1-4. ―ĩwĩ Jesús.

7Cʉ̃cã tairo ĩñerõcã tʉora fariseo basoca sãĩñawã tamʉ:

—Topʉare mʉcã tairo ĩcapetacãrã Moisépe dairo tigʉ abiro ĩ ojayuri: «Ĩcʉ̃ cʉ̃ nʉmorẽ cõãgʉ̃ ‘atieye wapamenarã mʉrẽ cõãgʉ̃ ya’ ĩrĩ paperapũrẽ nʉnigʉagawi» ĩ ojarigʉ niwĩ ―ĩwã.

8Jesús cʉ̃jãrẽ yʉwi:

—Mʉjãcã Manigʉ̃rẽ tʉorugahera cametʉanʉcãrẽpira nirẽye wapamenarã «Mʉjã nʉmosãrõmiãrẽ cõãmasĩ» ĩrigʉ niwĩ Moisés. Cʉ̃cã tairo ĩcapetacãrã Manigʉ̃ mamarõpʉre nʉmosãrõmiãrẽ cõãñerõcã boheririgʉ niwĩ. 9Mʉjãcã ĩrẽrẽ yʉpe mʉjãrẽ abiro ĩ: Ĩcʉ̃ cʉ̃ nʉmorẽ cocã ãpĩmena buirigʉ cʉtiheriariasiro nicapetacãrã core cõãmocã apeore nʉmocʉtigʉ comena ñañarẽ tigʉ tigawi ―ĩwĩ.

10Cʉ̃cã tairo ĩñerõcã tʉora ʉ̃sã cʉ̃ buera ĩwʉ̃:

—Topʉare tora abiro manʉrẽ, nʉmorẽ bire niñerõcã nʉmomaniñerõcã ñuga ―ĩwʉ̃.

11Jesús ʉ̃sãrẽ yʉwi:

—Basoca nipetirapʉ nʉmomanirãrã nimasĩherigawa. Manigʉ̃cã ‘nʉmomanirã nirãgawa’ ĩriara wado nimasĩrõãgawa. 12Buri tairo nicaperocã paje nimocã ʉmʉãrẽ nʉmocʉtimasĩheriñerõcã tire. Ĩcãrã ʉmʉã bajuarapʉra posariara ninirã nʉmocʉtimasĩherigawa. Ãpẽrã nʉmocʉtimasĩherigawa basoca cʉ̃jãrẽ nʉmocʉtidotihera posoariasiro niñerõcã. Ãpẽrã nʉmocʉtimasĩherigawa Manigʉ̃cã cʉ̃yarare dotire maquẽ wadore tirugara. Tairo tira atiecã buerora abiro ‘tairora niga’ ĩrãno tiwãmerã nirucũmocãro ―ĩwĩ.

Jesúcã wĩmarãrẽ ñapeo “cʉ̃jãrẽ ñurõ waro” ĩrigue

(Mc 10:13-16; Lc 18:15-17)

13Siro ĩcãrã cʉ̃jã pũna wĩmarãrẽ Jesús cʉtiropʉ nejeawa, cʉ̃rẽ cʉ̃jãrẽ ñapeo Manigʉ̃rẽ sãĩbosadotira. Buri ʉ̃sã cʉ̃ buerape cʉ̃jãrẽ neãtirare boca “Cʉ̃rẽ patocõherimocãña” ĩ tutisocowʉ.

14Ʉ̃sãcã tairo ĩñerõcã Jesúpe ʉ̃sãrẽ ĩwĩ:

—Cʉ̃jã wĩmarãrẽ yʉ cʉtiropʉ watiñerõcã tiya. Cʉ̃jãrẽ acutaherimocãña. Cʉ̃jã wĩmarã tirora abiro yʉre ñurõ ʉsearemena boca ñerãrã ñawã ʉmʉãwesepʉ Manigʉ̃cã cʉ̃yarare dotiropʉre wana ―ĩwĩ.

15Tairo ĩgʉ̃rã wĩmarãrẽ ñapeo, cʉ̃jãrẽ Manigʉ̃rẽ sãĩbosawi. Tuwagʉra tore witiwʉmʉã aperopʉ warisuawi.

Mamʉ paje bʉere cʉogʉ Jesúmena wederucũrigue

(Mc 10:17-31; Lc 18:18-30)

16Ĩcʉ̃ mamʉ Jesúre ĩñagʉ̃ watiarigʉ cʉ̃rẽ abiro ĩ sãĩñawĩ: —Buegʉ ¿ñeno ñurẽpere tirobori yʉre catire petiherere cʉogʉdagʉ? ―ĩwĩ.

17Jesús cʉ̃rẽ yʉwi: —¿Dairo tigʉ yʉre ñurẽ maquẽrẽ sãĩñari? Manigʉ̃ ĩcʉ̃rã ñugʉ̃ ñawĩ. Mʉ nirõrã catire petiherere cʉorugagʉ, cʉ̃cã dotire wadorena yʉquetatuya ―ĩwĩ.

18Cʉ̃cã tairo ĩñerõcã tʉogʉ, mamʉ abiro ĩ sãĩñawĩ tamʉ:

—¿Dieno dotirepere tigari? ―ĩwĩ.

Jesús yʉwi:

—Basocare sĩãherimocãña. Ãpĩ nʉmorẽ buirigo cʉtiherimocãña. Yajaherimocãña. Ĩritoremena ãpẽrãrẽ wedesãherimocãña. 19Mʉ pacʉre, mʉ pacore wedewõña. Mʉ cʉtiro nigʉ̃rẽ maĩña mʉbasurupe mʉcã maĩrõrã abiro ―ĩwĩ.

20Tiere tʉogʉ mamʉpe Jesúre ĩwĩ:

—Merẽ yʉ atie nipetire dotirerena cametʉanʉcãrõ manirõ queoro tipetiwʉmʉãtisiawʉ ¿topʉare dienope dʉsari yʉcã tinemobore?

21Jesús cʉ̃rẽ ĩwĩ:

—Mʉ Manigʉ̃cã dotirere queoro yʉquetatu, ñugʉ̃ nirugagʉ mʉcã cʉorere duagʉ waya. Mʉcã tiere dua, wapatariguere bopacarare nʉniña. Mʉ atiere tigʉ ʉmʉãwesepʉre paje bʉere ñurẽrẽ cʉogʉacu. Tituwanʉcõnigʉ̃ yʉre quetatuya ―ĩwĩ.

22Mamʉ cʉ̃cã tairo ĩñerõcã tʉogʉ bʉtoro wãcũpasʉticametʉagʉ warisuawi paje bʉere cʉogʉ ninigʉ̃.

23Cʉ̃cã wariasiro Jesús ʉ̃sã cʉ̃ buerapere abiro ĩwĩ:

—Yʉ mʉjãrẽ atiere diamacãrã wede: ¡Paje bʉere cʉoribasocʉre Manigʉ̃cã cʉ̃yarare dotiropʉre nocãrõ bʉtoro nirõgari! 24Mʉjãrẽ atiere wedegʉra ya. Waibʉcʉ camellore awiga copegãpʉre sãcamewitiñerõcã wisiojomocã. Tosotoape docare paje bʉere cʉogʉre Manigʉ̃cã cʉ̃yarare dotiropʉre sãwañerõcã wisiocametʉasu ―ĩwĩ.

25Cʉ̃cã tairo ĩñerõcã tʉora ʉ̃sã cʉ̃ buera sotoa tʉomaniãsu ʉ̃sãbasurupe:

—¿Topʉare tora abiro niñerõcãpʉare noãnope cametʉoyoroagari? ―ĩwʉ̃.

26Jesús ʉ̃sã diamacãrẽ ĩñacõã abiro ĩwĩ:

—Basocapʉare dairo timasĩñamani wisiojomocã. Buri Manigʉ̃pere nipetire cʉ̃cã timasĩrẽ wadora ña ―ĩwĩ.

27Cʉ̃cã tairo ĩñerõcã tʉogʉ Pedro cʉ̃rẽ:

—Ĩñaña. Ʉ̃sãpe mʉrẽ quetaturadara nipetire ʉ̃sãcã cʉomoãriguere cũpetiwʉmʉãtiawʉ. Tora abiro niñerõcãpʉare ʉ̃sãcã tairo tiarigue wapare ¿Ñenorẽ ʉ̃sã ñerõãgari? ―ĩ yʉwi.

28Jesúpe ʉ̃sãrẽ abiro ĩ wedewi:

—Yʉ mʉjãrẽ atiere diamacãrã wede. Atibʉreco petiariasiro nipetire mama wado wasoariwatoa yʉ Nipetira Sõwʉ̃ nirũpʉ̃ duiropʉ ñurõ asibateremena duigʉ eañerõcã mʉjã yʉre wedewõquetaturiaracã doce nirũpãrã duirepʉ duira ea, topʉmena Israelyabu doceburimacãrãrẽ dotiroacu. 29Nipetira yʉre wedewõrẽ wapamena wado cʉ̃jãyawiserire, cʉ̃jãyarare, cʉ̃jãyara nomiãrẽ, cʉ̃jã pacʉsʉmʉãrẽ, cʉ̃jã pũnarẽ, cʉ̃jãye ditarire cũwitiaranorẽ cʉ̃jãcã cũwʉmʉãrigue ciencãrõ sotoare cʉonemorõãgawa. Ĩñerõcã catire petiherere cʉoroagawa. 30Buri tairo nicapetacãrã marĩcʉorore pajʉ nirũpãrãrã abiro nirã siropʉre buri nira pʉtʉara earagawa. Marĩcʉorore pajʉ buri nirãpe siropʉre nirũpãrãrã abiro nirã earagawa ―ĩ wedewi Jesús ʉ̃sã cʉ̃ buerare.

Currently Selected:

Mateo 19: yui

Highlight

Copy